އަންހެން ދަރިންނަށްޓަކައި މިއަދު ކުރާ އިންވެސްޓްމަންޓަކީ މުޅި މުޖުތަމައުގެ ފާގަތި މުސްތަގުބަލަކަށްޓަކައި ކުރެވޭ ވަރަށް މުހިންމު މަސައްކަތެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ، ބައިނަލްއަޤްވާމީ ގޮތުން މިއަދު ފާހަގަކުރަމުންދާ އަންހެން ކުދިންގެ ދުވަހުގެ މުނާސަބަތުގައި ސޯޝަލް މީޑިއާ މެދުވެރިކުރައްވައި ހިއްސާކުރެއްވި މެސެޖެއްގައެވެ.

އެ މަނިކުފާނުގެ މެސެޖުގައި، ދުނިޔޭގެ އެކި ކަންކޮޅުތަކުގައި ދިރިއުޅޭ އަންހެން ކުދިންގެ ހައްގުތައް ރައްކާތެރިކޮށް، އެ ހައްގުތައް ކުރިއެރުވުމަށް ބައިނަލްއަގުވާމީ ފެންވަރުގައްޔާއި ގައުމީ ފެންވަރުގައި ކުރެވެމުންދާ މަސައްކަތްތަކުގައި ދިވެހި ސަރުކާރުން ސާބިތުކަމާއެކު ދެމިއޮންނާނެ ކަމުގެ ފުރިހަމަ ޔަގީންކަން ވަނީ ދެއްވާފައެވެ.

ރައީސް ޑރ. މުއިއްޒު ވިދާޅުވީ، އަންހެން ކުދިންނާއި ޒުވާން އަންހެނުންނަކީ މުސްތަގުބަލުގައި ގައުމު ހިންގަން ތިބި ގާބިލު ލީޑަރުންނަށް ހެދުމަކީ ސަރުކާރުގެ މުހިންމު އަމާޒެކެވެ. އެގޮތުން އެކުދިންގެ ފުރިހަމަ ގާބިލުކަން އެންމެ އެދެވޭ ގޮތުގައި ބޭނުންކޮށްގެން، ރައްކާތެރި އަދި އެހީތެރި މާހައުލެއްގައި ގައުމީ ތަރައްގީގައި މާނަހުރި ދައުރެއް އަދާކުރުމަށް މަގުފަހިކޮށްދޭނެ ހަރުދަނާ ސިޔާސަތުތައް އެކަށައަޅައި، ފުރުސަތުތައް ފަހިކޮށްދިނުމަށް މި ސަރުކާރުން ހާއްސަ އިސްކަމެއް ދޭނެ ކަމަށް ވިދާޅުވިއެވެ.

މީގެއިތުރުން، މި މަތިވެރި އަމާޒަށް ވާސިލުވުމަށްޓަކައި ވަކިވަކި އާއިލާތަކާއި، މުޅި މުޖުތަމައު އަދި ކަމާގުޅުންހުރި އެންމެހައި މުއައްސަސާތަކުގެ ފުރިހަމަ އެއްބާރުލުމާއި ބައިވެރިވުން ނުހަނު ބޭނުންތެރި ކަމުގައި ރައީސް ވިދާޅުވިއެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވަމުން ވިދާޅުވީ، މިއަދު އަޅުގަނޑުމެންގެ އަންހެން ދަރިންގެ ކުރިއެރުމަށްޓަކައި ކުރާ ކޮންމެ ހޭދައަކާއި އިންވެސްޓްމަންޓަކީ، މުޅި މުޖުތަމައުގެ ހަމަހަމަކަމާއި އެންމެންގެ ބައިވެރިވުން ހިމެނޭ، އުޖާލާ އަދި ފާގަތި މާދަމައެއް ބިނާކުރުމަށްޓަކައި އެޅޭ އެންމެ މުހިންމު ބިންގާ ކަމަށެވެ.