އިންޑިއާގެ މިނިވަންކަމުގެ ބާނީ މަހާތުމާ ގާންދީގެ މުނިކާފަ ދަރިކަލުން ތުޝާރު ގާންދީ، މުމްބާއީގައި ބޭއްވުމަށް ހަމަޖެހިފައި ސީޖޭޕީގެ މުޒާހަރާއަށް ދިޔަމަގުމަތީގައި ފުލުހުންގެ ބެލުމުގެ ދަށަށް ގެންގޮސްފިއެވެ.
'ހަމް ބާރަތު ކޭ ލޯގް' ޖަމްއިއްޔާގެ ރައީސްގެ މަގާމުގައި މިހާރު ހުންނެވި ތުޝާރު ގާންދީ ހިފަހައްޓާފައިވަނީ، 'ކޮކްރޯޗް ޖަނަތާ ޕާޓީ' (ސީޖޭޕީ) އިން ދިއްލީގައި ކުރިއަށްގެންދާ މުޒާހަރާއަށް ތާއީދުކޮށް، މުމްބާއީގެ އޮގަސްޓް ކްރާންތީ މައިދާނަށް ވަޑައިގަންނަވަނިކޮށް ބަންދްރާ ސަރަހައްދުންނެވެ. ތުޝާރު ގާންދީއާއެކު އެ ޖަމްއިއްޔާގެ ބައެއް ބައިވެރިންނާއި، ނައިބު ރައީސް ގުއްޑީ އެސް.އެލް ވެސް ވަނީ ފުލުހުންގެ ބެލުމުގެ ދަށަށް ގެންދިޔަކަމަށް މީޑިއާތަކުން ވަނީ ބުނެފައެވެ.
މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ތުޝާރު ވިދާޅުވީ، އޭނާ ހައްޔަރުކޮށްގެން ގޮތް ނޭނގޭތަނަކަށް ގެންދިޔަކަމަށެވެ. ނަމަވެސް މުމްބާއީ ފުލުހުން ވަނީ އެކަން ދޮގުކޮށްފައެވެ. ފުލުހުން ބުނީ އޭނާ ހައްޔަރެއް ނުކުރާކަމަށާއި، މުޒާހަރާއަށް ހުރަސް އެޅުމުގެ ގޮތުން ވަގުތީ ގޮތުން ފުލުހުންގެ ބެލުމުގެ ދަށަށް ގެނައީކަމަށެވެ. ފުލުހުން ބުނީ މުޒާހަރާއެއް ބޭއްވުމަށްއެދި ހުށައަޅާފައި ނުވާކަމަށާއި، އެ ސަރަހައްދަކީ އާކިއޮލޮޖިކަލް ސާވޭ އޮފް އިންޑިއާގެ ބެލުމުގެ ދަށުގައި އޮންނަ ސަރަހައްދެއް ކަމަށެވެ.
ސީޖޭޕީން ކުރިއަށްގެންދާ މި މުޒާހަރާއަކީ އިންޑިއާގެ ޗީފް އިލެކްޝަން ކޮމިޝަނަރު ގިއަނޭޝް ކުމާރުގެ އިސްތިއުފާއަށް ގޮވާލާ ކުރިއަށްެގެންދާ މުޒާހަރާއެކެވެ މި މުޒާހަރާއާ ގުޅިގެން މަހާރާޝްތުރާ ސްޓޭޓްގެ ފުލުހުން ވަނީ ސަލާމަތީ ފިޔަވަޅުތައް ވަރުގަދަކޮށް، މުޒާހަރާގައި ބައިވެރިވުމަށް ދަތުރުކުރާ ބައެއް ފަރާތްތައް ހިފަހައްޓާފައެވެ.
ކްރާންތީ މައިދާނަކީ 1942 ވަނަ އަހަރު މަހާތުމާ ގާންދީ އިސްވެ ހުންނަވައި 'ކުއިޓް އިންޑިއާ މޫވްމަންޓް' ފެއްޓެވި ތާރީޚީ މައިދާނެވެ.
Advertisement
This content is created and paid for by advertisers and does not involve Voice Journalists
