ރާއްޖެއިން ކޮވިޑް19 ޖެހިގެން ފުރަތަމަ ފަހަރަށް ނިޔާވި މީހާ ވަޅުލައިފިއެވެ.

ރާއްޖޭގައި ފުރަތަމަ ފަހަރަށް ކޯވިޑް-19 ބަލީގެ ސަބަބުން މީހަކު ނިޔާވެފައިވާއިރު، އެމީހާ ހިނެވުމުގެ ކަންކަން ކުރިއަށް ގެންގޮސްފައިވަނީ އަންހެން ސިފައިން ކަމަށް ސަރުކާރުން ބުނެފިއެވެ. ރާއްޖޭގައި މިބަލީގައި ފުރަތަމަ ނިޔާވީ އަންހެނެކެވެ.

ނޭޝަނަލް އިމަޖަންސީ އޮޕަރޭޝަން ސެންޓަރު (އެންއީއޯސީ) ގައި ކުރިއަށްދާ ނޫސްވެރިންގެ ބައްދަލުވުމުގައި ހެލްތު މިނިސްޓަރު އަބުދު ﷲ އަމީން ވިދާޅުވީ މި މީހާއަކީ ކޮންޓެކްޓްރޭސިންގެ ތެރެއިން ފާހަގަވެ، ސާމްޕަލް ނަގާފައިވަނިކޮށް، މިއަދު މަރުވި 83 އަހަރުގެ، އާމިނަތު އާދަމު ކަމަށެވެ.

ކޮވިޑް19 ޖެހިގެން ރާއްޖެއިން ފުރަތަމަ މަރުވި މީހާއާ ގުޅިގެން އިތުރު މައުލޫމާތުތައް ފޯރު ކޮށްދިނުމުގެ ގޮތުން ނޭޝަނަލް އިމަޖެންސީ އޮޕަރޭޝަން ސެންޓަރުން ދަރުބާރުގޭގައި ބާއްވަމުން އަންނަ ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތު މިނިސްޓަރު އަބްދުﷲ އަމީން ވަނީ މަރުވި މީހާގެ އާއިލާއަށާއި ގާތް ތިމާގެ މީހުންނަށް ތައުޒިޔާ ދަންނަވާފައެވެ.

މިރޭގެ ނޫސްވެރިންގެ ބައްދަލުވުމުގައި ވޮއިސްއިން ކުރެއްވި ސުވާލަކަށް ޖަވާބުދެއްވަމުން ހެލްތު މިނިސްޓަރ އަމީން ވިދާޅުވީ އެ މަރުހޫމާ ކޮވިޑް-19 އަށް ޕޮޒިޓިވްވިކަން އެނގުނީ ނިޔާވި ފަހުންކަމަށާއި، އެ ފަރާތް ހޮސްޕިޓަލަށް ގެންދެވުނީ ނޭވާލުމުގެ މައްސަލަތަކެއް ހުރުމުން ކަމަށެވެ. ފާހަގަކޮށްލެވޭ ގޮތުގައި އެފަރާތަކީ މީގެ ކުރިންވެސް އެހެނިހެން ސިއްހީ މައްސަލަތަކެއް ހުންނަ ފަރާތެކެވެ.

މި އަންހެންމީހާ ވަނީ މިރޭގެ ވަގުތެއްގައި އާ ސަހަރާގައި ވަޅުލާފައެވެ. އަންހެންމީހާ ހިނެވުމުގެ ކަންތައްތައް ކޮށްފައިވަނީ މޯލްޑިވްސް ނޭޝަނަލް ޑިފެންސް ފޯސްގެ އަންހެން ސިފައިންތަކެކެވެ.

މި މަރާއި ގުޅިގެން އެ މަރުހޫމާގެ އާއިލާގެ ފަރާތުން ވަނީ އެޗްޕީއޭއިން މިކަމުގައި އިހުމާލުވެފައިވާ ކަމަށްބުނެ މީސް މީޑިޔާގައި ކަންބޮޑުވުން ފާޅުކޮށްފައެވެ. އެގޮތުން އެ މަރުހޫމާގެ ޓެސްޓް ހެދުން ވަރަށް ބޮޑަށް ލަސްވެފައިވާކަންވެސް ވަނީ ބުނެފައެވެ.

މި މަރުހޫމާއަށް ވޮއިސްގެ ޓީމްގެ ފަރާތުން ތައުޒިޔާ ކިޔާ، އާއިލާއަށް ކެތްތެރިކަން ދެއްވުން އެދި ދުއާކުރަމެވެ.