ޗައިނާއިން ރާއްޖޭގައި 22 ދުވަސް ތެރޭގައި 800 މީހުންގެ ކަރަންޓީން ފެސިލިޓީއެއް އަޅައިދީފި
ކޮވިޑް-19 އާއި ގުޅިގެން ޗައިނާގެ ސަރުކާރުން ފޯރުކޮށްދޭ އެހީތެރިކަމުގެ ތެރެއިން ހުޅުމާލެ ދެވަނަ ފިޔަވަހީގައި ޗައިނާ ސަރުކާރުން ހިލޭ އެހީގެ ދަށުން ހަދައިދިން 800 މީހުންގެ ކަރަންޓީނު ފެސިލިޓީގެ މަސައްކަތް 22 ދުވަސްތެރޭގައި ނިންމާލައިފިއެވެ.
މި ފެސިލިޓީގެ މަސައްކަތް ހަދަންފަށާފައިވަނީ މިމޭ މަހުގެ 27 ވަނަ ދުވަހުއެވެ.
ޖުމްލަ 4،987.5 އަކަމީޓަރުގެ ސަރަހައްދެއްގައި ގާއިމްކޮށްފައިވާ 2،443 އަކަމީޓަރުގެ މި ފެސިލިޓީ ގާއިމު ކުރުމުގެ ޕްރޮޖެކްޓުގެ ދަށުން ސީއެސްސީއީސީއިން ވަނީ ހަތަރު ފެބްރިކޭޓެޑް ސްޓީލް ސްޓްރަކްޗާ ގާއިމް ކޮށްދީ، ބަދިގެ އަށް ހާއްސަ ބްލޮކަކާއި ފާހާނާ ބަރިއެއްވެސް ގާއިމް ކޮށްފައެވެ.
މިހާރު ވަނީ މި ފެސިލިޓީ ހައުސިންގ ޑިވެލޮޕްމަންޓް ކޯޕަރޭޝަންއާއި ހަވާލުކޮށްފައެވެ.
މި މަސައްކަތުގައިޗައިނާ ސްޓޭޓް ކޮންސްޓްރަކްޝަން ކުންފުނި (ސީއެސްސީއީސީ) ގެ 200 އަށް ވުރެ ގިނަ މަސައްކަތެރިން 24 ގަޑިއިރު މަސައްކަތްކޮށްފައިވެ އެވެ.
މި ފެސިލިޓީ ހެދުމަށް މުވައްޒަފުންނާއި ވަސީލަތާއި ސާމާނާ އެކު، އެ ކަމަށް 280،000 ޑޮލަރު (4.3 މިލިއަން ރުފިޔާ) ގެ އެހީތެރިކަން ފޯރުކޮށް ދީފައިވާނެ ކަމަށް އަންޒާދާ ކުރެވޭ ކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖަންގް ލިޖޮންގް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists