ޕާކިސްތާނުގެ ސަރުކާރުން އިމްރާން ޚާންގެ ޕާޓީ އުވާލަން މަސައްކަތްކުރަނީ

ޕާކިސްތާނުގެ ކުރީގެ ބޮޑު ވަޒީރު އިމްރާން ޚާން ގެ ސިޔާސީ ޕާޓީ  ތަހްރީކް-އެ-އިންސާފް (ޕީޓީއައި) އުވާލަން ނިންމާފައިވާކަމަށް ޕާކިސްތާނުގެ ސަރުކާރުން ހާމަކޮށްފިއެވެ.

މިކަން ހާމަކުރައްވަމުން އެގައުމުގެ އިންފޮމޭޝަން މިނިސްޓަރު އަތާއުﷲ ތަރާރު ވިދާޅުވީ، އެ ޕާޓީ އުވާލުމުގެ އިތުރުން، އިމްރާން ޚާންގެ މައްޗަށް ޣައްދާރުވިކަމުގެ ދައުވާކުރުމަށް އެގައުމުގެ ސަރުކާރުން ނިންމާފައިވާކަމަށެވެ.

ޕީޓީއައި އުވާލަން ނިންމާފައިވަނީ ޕާކިސްތާނުގައި ބޭރުގެ މީހުންގެ އަތުން ފައިސާ ހޯދުމަކީ ޤާނޫނީގޮތުން މަނާކަމެއް ކަމަށްވާއިރު، އެޕާޓީއަށް ބޭރު ފަރާތްތަކުގެ ފަރާތުން ފައިސާ ލިބިފައިވާކަން "ސާބިތުވެފައިވާތީ" އާއި، ފާއިތުވި އަހަރު އެ ޕާޓީއަށް ތާއީދުކުރާ ފަރާތްތަކުން ސިފައިންގެ މަރުކަޒުތަކަށް އަމާޒުކޮށް ހިންގި ހަމަނުޖެހުންތަކާއި ގުޅިގެން ކަމަށް އަތާއުﷲ ތަރާރު ވިދާޅުވިއެވެ.

މި ނިންމުން އެގައުމުގެ ސަރުކާރުން ކެބިނެޓަށް ހުށަހަޅާނެ ކަމަށާއި، މި މައްސަލައާއި މެދު ގޮތެއް ނިންމުމުގެ ބާރު ކެބިނެޓަށް ލިބިގެންވާ ކަމަށް ވެސް އަތާއުﷲ ތަރާރު ވިދާޅުވިއެވެ.

މިކަމާއި ގުޅިގެން އިމްރާން ޚާންގެ ގާނޫނީ ވަކީލު ވިދާޅުވީ، ކޯޓުތަކަށް ބިރުދެއްކުމާއި ޕްރެޝަރުކުރުމުގެ ފުރުސަތު ނެތްކަން އެގައުމުގެ ސަރުކާރަށް ދޭހަވުމުން ގޮތްހުސްވެ، އަޅާ ފިޔަވަޅެއް ކަމަށެވެ.

މި ނިންމުމާއި ގުޅިގެން އެމެރިކާ އާއި އެނޫންވެސް ބައިނަލްއަގުވާމީ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.

ޕާކިސްތާނުގެ ސަރުކާރުން މިފަދައިން އިއުލާނުކޮށްފައިމިވަނީ ޕީޓީއައި އަށް ޕާލިމެންޓުގައި 20 އަށްވުރެ ގިނަ އިތުރު ރިޒާވް ގޮނޑި ލިބެންޖެހޭ ކަމަށް އެގައުމުގެ ސުޕްރީމް ކޯޓުން ވޭތުވެދިޔަ ހަފްތާގައި ނިންމާފައިވަނިކޮށެވެ. ކޯޓުގެ މި ނިންމުމާއިއެކު، މަޖިލީހުގައި އެ ޕާޓީ ތަމްސީލު ކުރާ މެންބަރުންގެ ޢަދަދު 100 އަށް އިތުރުވާނެ ކަމަށް ބެލެވެއެވެ.