އަމިއްލަ ބޭނުމެއް ނެތް، އެދެނީ ރައްޔިތުންނަށް އެންމެ ފައިދާހުރި ގޮތައް ކަންކުރަން: ރައީސް ޞާލިޙް

އަމިއްލަ އެއްވެސް ބޭނުމެއް ނެތް ކަމަށާއި، ބޭނުންވަނީ ރައްޔިތުންނަށް އެންމެ ފައިދާހުރި ގޮތައް ކަންކަން ކޮށް ރައްޔިތުނަށް ޚިދްމަތް ކުރަން ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ރައީސް ޞާލިޙް މިހެން ވިދާޅުވީ ޅ.އަތޮޅަށް ކުރައްވަމުން ގެންދެވި ކެމްޕޭނު ދަތުރުފުޅުގެ ތެރެއިން ނައިފަރަށް ވަޑައިގެން އެރަށު ރައްޔިތުންނާއި ބައްދަލު ކުރައްވައި ވާހަކަދައްކަވަމުންނެވެ.

"ތިޔަ ބޭފުޅުންގެ ވޯޓު އަޅުގަނޑަށް ދެއްވާ، އެއީ ގެއްލިގެން ދާނެ އެއްޗެއް ނޫން"

ރައީސް އިބްރާހިމް މުޙައްމަދު ޞާލިޙް

ރައީސް ވިދާޅުވީ މީގެ ކުރިން 15 އަހަރު ވަންދެން ޅ.އަތޮޅުގެ ރައްޔިތުން ތަމްސީލް ކުރުމުގެ މަސައްކަތް ރައްޔިތުންގެ މަޖިލީހުގައި ކުރެއްވެވި ކަމަށެވެ. އޭރު އެމަނިކުފާނު މަސައްކަތް ކުރެއްވެވި ގޮތް ނައިފަރުގެ ރައްޔިތުންނަށް އެނގޭނެ ކަމަށާއި މިއަދުވެސް އެމަސައްކަތް ކުރައްވަމުން ގެންދަވަނީ އެގޮތައް ކަމަށް ރައީސް ވިދާޅުވިއެވެ.

"އަޅުގަނޑުގެ ނެތް އަމިއްލަ ބޭނުމެއް، އަޅުގަނޑު ބޭނުންވަނީ ރައްޔިތުންނަށް ޚިދްމަތް ކުރަން، ރައްޔިތުންނަށް އެންމެ ފައިދާ ހުރި ގޮތައް ކަންތައްކުރަން، މިކަމުގައި އަޅުގަނޑު ދެމިހުންނާނަން"

ރައީސް އިބްރާހިމް މުޙައްމަދު ޞާލިޙް

ދެން އަންނަ ދައުރެއްގައި ނައިފަރަށް ޚާއްސަ ކުރެވިފައިވާ ކަންކަން ރައީސް ޞާލިޙުގެ ވާހަކަފުޅުގައި ވަނީ ވިދާޅުވެދެއްވައިފައެވެ.

އެގޮތުން ނައިފަރަށް ބޭނުންވާ ބިން ހަމަޖެއްސުމަށް 20 ހެކްޓަރުގެ ބިން ހިއްކުމަށް ނިންމާފައިވާ ނިންމުމަށް ބަދަލު ގެނެސް އެޢަދަދު އިތުރު ކުރައްވާނެ ކަމަށް ރައީސް ވިދާޅުވިއެވެ. އެއާއި އެކު ފުރަތަމަ ބުރުގައި އެބިމުގައި 200 ހައުސިންގްޔުނިޓް އަޅުއްވައި ދެއްވާނެ ކަމަށްވެސް ރައީސް ޞާލިޙް ވިދާޅުވިއެވެ.

ރައީސް ވިދާޅުވީ ނައިފަރުގެ ފެނާއި ނަރުދަމާގެ މަސައްކަތް ނިމިފައިވީނަމަވެސް އަދިވެސް ހަނިގޯޅި ތަކުގައި ހުރި ބައެއް ގޭގެއަށް ނަރުދަމާގެ ޚިދްމަތް ނުދެވި ހުރި ކަމަށާއި ދެން އަންނަ ދައުރެއްގައި އެގޭގެއަށް ޚިދްމަތް ދެއްވައި ފެނާއި ނަރުދަމާގެ ކަންކަން ނިންމަވައި ނައިފަރުގައި ހަދަން ޖެހޭ ހުރިހާ މަގެއް ތާރުއަޅައި ރަނގަޅު ފެންވަރަކަށް ހައްދަވައި ދެއްވާނެ ކަމަށެވެ.

މީގެ އިތުރުން ނައިފަރު ހޮސްޕިޓަލަށް ބޭނުންވާ ޢިމާރާތްތައް އިތުރުކޮށް އެހޮސްޕިޓަލުން ނަފްސާނީ ބައްޔަށް ފަރުވާދޭނެ ޑޮކްޓަރަކު ހަމަޖައްސައި އަދި ނުކުޅެދުންތެރިން ހުންނަ ފަރާތްތަކަށް ދޭން ޖެހޭ ތެރަޕީ ދެވޭނެ އިންތިޒާމް ހަމަޖައްސަވާނެ ކަމަށް ރައީސް ވިދާޅުވިއެވެ.

އަންނަ ދައުރުގައި ނައިފަރު މަދްރަސަތުލް އިފްތިތާޙަށް ބޭނުންވާ މަލްޓި ޕާޕަސް ހޯލް އަޅައިދީ ސައިންސް ލެބެއް ޤާއިމް ކޮށްދެއްވާނެ ކަމަށް ރައީސް ޞާލިޙް ވިދާޅުވިއެވެ.

ނައިފަރު ބަނދަރަށް ދިމާވެފައިވާ މައްސަލަތައް ހައްލު ކޮށްދެއްވުމަށް ބަނދަރު ފުންކޮށް އުތުރު ބަނދަރުގެ ފައިކަށި ރަނގަޅުކޮށް ބޭރުން 500ފޫޓުގެ ރިވެޓްމެންޓް ޖަހައި ކުދި އުޅަނދުފަހަރަށް އެތަނުގައި އެޅޭނެގޮތް ހަދައިދެއްވާނެ ކަމަށް ރައީސް ވިދާޅުވިއެވެ.

މީގެއިތުރުން ނައިފަރުގައި މިހާރު ކުއްޔަށް ދޫކުރެވިފައިހުރި ފްލެޓްތަކުގެ ކުލި ބޮޑު ކަމަށް ރައްޔިތުން ވިދާޅުވަމުން ދާކަމަށާއި، އެކަމަށް ލުޔެއް ހޯދައި ދިނުމަށް މަޝްވަރާ ކުރެވި ލުޔެއް ގެނައުމަށްފަހު އެކަން ޙިއްސާ ކުރައްވަވާނެ ކަމަށް ރައީސް ވިދާޅުވިއެވެ.