ތުލްކަރަމްގައި ނުކުޅެދޭ މީހަކަށް ބަޑިން ހަމަލާދީ ޝަހީދުކޮށްލައިފި

ފަލަސްޠީނުގެ ހުޅަނގު އައްސޭރީގައި އޮންނަ ތުލްކަރަމްގައި ނުކުޅެދޭ މީހަކަށް ބަޑިން ހަމަލާދީ ޝަހީދުކޮށްލައިފިއެވެ.

ވަފާ ނޫހާއި ހަވާލާދީ އަލްޖަޒީރާގައި ބުނެފައިވަނީ ހުޅަނގު އައްސޭރިއަށް އަރައި ތުލްކަރަމް ރެފިޔުޖީ ކޭމްޕަށް ވަދެގަތުމުން އެތަނުގެ ޢާންމުން އިޒްރާއިލް ސިފައިނާއި ކުރިމަތިލުމުގެ ތެރޭގައި އިޒްރާއިލް ސިފައިން ބަޑިޖަހައި ނުކުޅެދޭ މީހަކު ޝަހީދު ކޮށްލައިފައިވާ ކަަމަށެވެ.

އަދި އޭނާ އަކީ ޢުމުރުން 65 އަހަރުގެ، ނުކުޅެދުން ތެރިކަން ހުންނަ މީހެއްކަން ވަފާއިން ޔަޤީން ކޮށްދީފައިވާ ކަމަށް އަލްޖަޒީރާއިން ބުނެފައެވެ.

އިޒްރާއިލް ސިފައިން އޭނާ އަށް ބަޑިން ހަމަލާދިނުމާއި އެކު ފަރުވާ ހޯދުމަށް ތަބެތް ގަވަރމެންޓް ހޮސްޕިޓަލަށް ވަނީ ގެންގޮސްފައެވެ. އަދި ހޮސްޕިޓަލުގައި ފަރުވާ ހޯދަމުން ދަނިކޮށް އޭނާ ވަނީ ޝަހީދުވެފައި ކަމަށް އަލްޖަޒީރާގައި ބުނެފައިވެއެވެ.

އެމީހާއާއި އެކު އިއްޔެގެ 24 ގަޑިއިރުތެރޭގައި ހުޅަނގު އައްސޭރީގައި ދެމީހަކު ވަނީ ޝަހީދުކޮށްލައިފައެވެ. އިއްޔެ ހިބްރޫންގައި ވަނީ 16 އަހަރުގެ ކުއްޖެއްގެ ގަޔަށް ބަޑި ޖަހައި ޝަހީދުކޮށްލައިފައެވެ.

މިއާއި އެކު 7 އޮކްޓޫބަރ ގެ ފަހުން ހުޅަނގު އައްސޭރީގައި ޝަހީދުވި މީހުންގެ ޢަދަދު 120 ވަނީ އަރައިފައެވެ.

ތުލްކަރަމްގެ އިތުރުން އިޒްރާއިލް ސިފައިން ވަނީ ފަރްއޫން އަވަަށަށް ވަދެ އެއަވަށުން ބަޔަކު ހައްޔަރުކޮށްފައެވެ.