ޣައްޒާ ފަޅިން ރަފާ ބޯޑަރު ހުޅުވައިލައިފި

ފަލަސްޠީންގެ ޣައްޒާ އާއި މިޞްރު ގުޅުވައިދޭ ރަފާ ބޯޑަރު ޣައްޒާ ފަޅިން ހުޅުވައިލައިފިއެވެ.

މިއީ 7 އޮކްޓޫބަރުގައި ފެށުނު ހަނގުރާމައިގެ ފަހުން ޣައްޒާ ފަޅިން ރަފާ ބޯޑަރު ހުޅުވާލި ފުރަތަމަ ފަހަރެވެެ.

ރަފާ ބޯޑަރު ހުޅުވާލުމާއި އެކު ޣައްޒާއިން ބޭރަށް އެންމެ ފުރަތަމަ ބޭރަށް ގެންގޮސްފައިވަނީ ޣައްޒާގައި ތާށިވެފައިތިބި އެެހެން ޤައުމުތަކުގެ މީހުންނެވެ.

ރަފާ ބޯޑަރު ހުޅުވާލާނެ ކަމުގެ ޚަބަރާއި އެކު ގިނަ އަދަދެއްގެ ބަޔަކު ދަނީ ޣައްޒާއިން ބޭރަށް ދެވޭނެ ކަމުގެ އުއްމީދުގައި އެބޯޑަރުގެ ކައިރިއަށް ވެހިކަލް ތަކުގައި ޖަމާވަމުންނެވެ.

އަލްޖަޒީރާގައި ބުނެފައިވަނީ މިޞްރުން ރަފާ ހުރަސްކޮށް މިޞްރަށް އެތެރެވުމަށް ހުއްދަދީފައިވަނީ ހަމަލާތަކުގެ ސަބަބުން ޒަޚަމްވެ ވަރަށް ބޮޑަށް ޙާލު ދެރަވެފައިވާ 81 ފަލަސްޠީނުގެ މީހަކަށާއި، ޣައްޒާގައި ތާށިވެފައިތިބި އެހެން ޤައުމުތަކުގެ މީހުން ނުވަތަ އެހެން ޤައުމުތަކުގެ ރަށްވެހިކަން ލިބިފައި ތިބި ފަލަސްޠީނުގެ ބައެއް މީހުންނަށް ކަމަށެވެ.

އެހެން ޤައުމެއްގެ ރަށް ވެހިކަން ހޯދައިފައިވާ މީހެއް ނަމަވެސް ރަފާ ހުރަސް ކޮށް ދެވެނީ ރެޑް ކްރޮސް މެދުވެރިކޮށް އެޤައުމަކަށް އަނބުރާ ދިއުމަށް ހުއްދަ ލިބިފައިވާ ފަރާތްތަކަށެވެ.

އަލްޖަޒީރާގައި ބުނެފައިވަނީ އެމްބިޔުލާންސްތައް މަޑުމަޑުން ރަފާ ބޯޑަރު ކައިރިއަށް އެބަ އަންނަމުންދާ ކަމަށާއި އެއްވެސް މީހަކަށް އަދި އެއްވެސް ވެހިކަލަކަށް ރަފާ ހުރަސްކޮށް އަދި ނުދެވޭ ކަމަށެވެ. އަދި ރަފާ ބޯޑަރު ކައިރީގައި މިޞްރު ފަޅީގައި އެހީގެ ތަކެތި އަރުވައިފައިވާ ޓްރަކް ތައްވެސް ބޯޑަރު ހުރަސްކުރުމަށް ތައްޔާރަށް އެބަހުރި ކަމަށެވެ.