ފަލަސްޠީން ހަލާތާއި ގުޅޭ ޑރ. ޝަމީމްގެ ބޮޑު ދަރުހެއް މިމަހު 9 ގައި!

ހައްދުފަހަނައަޅާފައިވާ އިސްރާއީލުން ފަލަސްޠީން ރައްޔިތުން އަތުން ބިންތައް ފޭރިގަނެ މުޅި ފަލަސްތީނުގެ ނަސްލު ނައްތާލުމަށް ހިންގަމުންދ ޖަރީމާތަކާއިގުޅޭ މަޢުލޫމާތު ދިނުމަށް އަލް-ޢަޞްރުގެ ފަރާތުން ޚާއްސަ ދަރުހެއް ބޭއްވުމަށް ހަމަޖެހިއްޖެއެވެ.

"النكبة - އުންމަތުގެ ކާރިސާ" ނަމުގައި ބޭއްވުމަށް ހަމަޖެހިފައިވާ މި ދަރުސް އޮންނާނީ އަންނަ ނޮވެންބަރު މަހުގެ 9 ވާ ބުރާސްފަތި ދުވަހުގެރޭ 21:00 ގައި އާރޓިފިޝަލް ބީޗް ސަރަހައްދުގައެވެ.

ދަރުސް ދެއްވާނީ ރާއްޖޭގެ ފުންނާބު އުސް ދީނީ ޢިލްމުވެރިޔާ ޑރ.އާދަމް ޝަމީމެވެ.

އަލް-ޢަޞްރުން ބުނީ، މި ދަރުސްގައި ފަލަސްތީނާއި އިސްރާއީލާ ދެމެދު ހިނގަމުންދާ ކަންކަން ފެށިގެން އައި ގޮތަކީ، އެ މައްސަލާގައި އެކި މަރުހަލާ ތަކުގައި ކަން ހިނގާ ގޮސްފައިވާ ގޮތަށް އަލި އަޅުވާ ލެވޭނެ އެވެ. އަދި ފަލަސްތީނުގެ މިހާރުގެ ހާލަތާއި ގުޅޭގޮތުންވެސް އާއްމުންނަށް މައުލޫމާތު ތަކެއް އެނގިގެން ދާނެ ކަމަށްވެސް ބުނެއެވެ.

މީގެ އިތުރުން، ފަލަސްތީން ކާރިސާއިން މުސްލިމުންނަށް ލިބޭ ފިލާވަޅުތަކާ ބެހޭ ގޮތުންވެސް މިދަރުސްގައި ޝެއިޚް ވާހަކަ ދައްކަވާނެ ކަމަށް އަލް-ޢަޞްރުން މައުލޫމާތު ދެއެވެ.

އަލް-ޢަޞްރުން އިތުރަށް ބުނީ، މި ދަރުސް ކުރިއަށްދާ ވަގުތު ތަކުގައި، އެ ސަރަހައްދުގައި އައިއޭސީގެ ޣައްޒާ ރިލީފް ފަންޑަށް ފައިސާ ހަދިޔާ ކުރަން ބޭނުންވާ ފަރާތްތަކަށް އެ ފުރުސަތު ދިނުމުގެ ގޮތުން ފަންޑް ފޮއްޓެއް ބެހެއްޓިފައި ހުންނާނެއެވެ. އެހެންކަމުން ވީހާވެސް ގިނަ ފަރާތްތަކުން ދަރުހަށް އައުމަށް  އަލް-ޢަޞްރުން ވަނީ ދަޢުވަތު ދީފައެވެ.

އިޒްރާއިލްގެ މިފަހުން ދޭން ފެށި ހަމަލާތަކުގެ ސަބަބުން މިހާތަނަށް 8500 މީހުން ޝަހީދުވެފައިވާއިރު އޭގެ ތެރެއިން 3457 ޝަހީދުންނަކީ ކުޑަކުދިންނެވެ. 2136 ޝަހީދުންނަކީ އަންހެނުންނެވެ.

މީގެ އިތުުރުން 21،048 މީހަކު ވަނީ ޒަޚަމްވެފައެވެ. މީގެ ތެރެއިންވެސް ބޮޑު ބައެއް ހިއްސާކުރަނީ ކުޑކުދިންނެވެ.