އަޅުގަނޑު ގަބޫލުކުރަނީ ރާއްޖެއަށް އެންމެ ރަނގަޅު ވާނީ ރިޔާސީ ނިޒާމް ކަމަށް: ރައީސް ޞާލިހު
އެމަނިކުފާނު ގަބޫލުކުރައްވާ ގޮތުގައި ދިވެހިރާއްޖެއަށް އެންމެ ރަނގަޅު ވާނީ ރިޔާސީ ނިޒާމް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މިއަދު ވިދާޅުވެއްޖެއެވެ.
ރިޔާސީ އިންތިޚާބުގެ ނާކާމިޔާބަށް ފަހު، ރައީސް އިބްރާހިމް މުހައްމަދު ޞާލިޙް ނޫސްވެރިންނާ ބައްދަލުކުރައްވައި ވާހަކަދައްކަވަމުން ވިދާޅުވީ، އިއްޔެ އިންތިޚާބީ ރައީސް، ޑރ. މުހައްމަދު މުޢިއްޒާ ބައްދަލުކުރެއްވީ ޓްރާންސިޝަނަލް މަސައްކަތްތައް ވީހާ ވެސް އޮމާންކަމާ އެކު ކުރިއަށް ގެންދިއުމަށް ކަމަށެވެ.
އަދި، ދެ ބޭފުޅުން ބައްދަލުކުރެއްވުމަށް ފަހު، ޓްރާންސިޝަނަލް މަސައްކަތްތައް ކުރަން ކޮމިޓީއެއް އެކުލަވައިލަން ނިންމާފައިވާ ކަމަށާ، އެ މަސައްކަތްތައް މިހާރު ފަށާފައިވާ ކަމަށް ރައީސް ވިދާޅުވިއެވެ.
މިއާއެކު ރައީސް ޞާލިހް ވިދާޅުވީ ވެރިކަމަށް ވަޑައިގަންނަވަމުން ވައުދުވެލެއްވި ގޮތަށް ނޮވެމްބަރު 11 ގައި އިންތިޚާބީ ރައީސަށް ހުވާ ކުރެވޭނެ އިންތިޒާމުތައް ހަމަޖެއްސުމަށް މަސައްކަތް ކުރަމުންދާ ކަމަށެވެ. އެގޮތުން، ނޮވެމްބަރު 11 ގައި ހުވާ ކުރުމަށް ހުރި ގާނޫނީ ހުރަސްތަކާ މެދު މިހާރު ދިރާސާ ކުރަމުންދާ ކަމަށް ރައީސް ވިދާޅުވިއެވެ.
މީގެ އިތުރުން ރާއްޖޭގައި ވެރިކަން ކުރަން އޮންނަން ފެންނަނީ ކޮން ނިޒާމެއްތޯ ނޫސްވެރިއެއް ކުރި ސުވާލަށް ޖަވާބު ދެއްވަމުން ރައީސް ޞާލިހު ވިދާޅުވީ އެކަމާއި ގުޅިގެން އެމަނިކުފާނު އަމިއްލަ އަށް ދެކެވަޑައިގަންނަވާގޮތް މީގެ ކުރިންވެސް ހާމަކުރައްވާފައި ވާނެ ކަމަށެވެ. އެގޮތުން ނީގެ ކުރިން އެމަނިކުފާނު ވިދާޅުވެފައި ވަނީ ނިޒާމު ބަދަލު ކުރަންވާނީ ރައްޔިތުންގެ ވޯޓަކުން ކަމަށެވެ.
"އަޅުގަނޑު ޕާސަނަލީ ގަބޫލުކުރަނީ، ގައުމަށް އެންމެ ފައިދާ ކުރާނީ ރިޔާސީ ނިޒާމުން ކަމަށް. އެއީ އަޅުގަނޑުގެ އަމިއްލަ ވިސްނުން. ޕާޓީގެ ވިސްނުން ޕާޓީން ނިންމާނީ. އެހެންވީމާ އެއަށް (ޕާޓީ ދެކޭގޮތަަށް) އަޅުގަނޑު ނުދާނަން."
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހް މިފަދައިން ވިދާޅުވެފައި ވާއިރު، ނިޒާމު ބަދަލު ކުރަން ރައްޔިތުންގެ ވޯޓަކަށް ކުރިން އަހާފައި ވާނަމަ، އަލުން އެހުމުގެ ބަދަލުގައި މަޖިލީހުގައި ނަގާ ވޯޓަކުން ނިޒާމު ބަދަލު ކުރެވޭގޮތަށް ގާނޫނަށް އިސްލާހު ގެންނަން ޑިމޮކްރެޓްސްގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވަނީ މަޖިލީހަށް ބިލެއް ހުށަހަޅުއްްވާފައެވެ. އެ ބިލުގެ މަސައްކަތް މިއަދު ކުރިއަށް ނުގެންދެވުނީ މަޖިލީހުގެ ކޯރަމް ހަމަނުވެގެންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
