މަގާމަކަށްވުރެ ބޮޑަށް މިވަގުތު އަޅުގަނޑު މަސައްކަތް ކުރަމުން މިދަނީ ޕާޓީ ހިފެހެއްޓުމައްޓަކައި: ރައީސް ޞާލިހު
ޕާޓީގެ މަގާމަކަށް ވާދަކުރެއްވުމަށް ވުރެ ބޮޑަށް މިވަގުތު މަސައްކަތް ކުރައްވަމުންދަނީ ޕާޓީ ހިފެހެއްޓުމައްޓަކައި ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ އިންތިހާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 އިންސައްތަ ލިބިފައި ނުވާތީ ދެވަނަ ބުރެއްގެ ވޯޓުލުން ކުރިއަށް ގެންގޮސްފައިވާއިރު ދެވަނަ ބުރުގެ ނަތީޖާ އަށް ބަލާ އިރު، ޑރ. މުހައްމަދު މުއިއްޒު ވަނީ 129،159 ވޯޓު ހޯއްދަވައިފައެވެ. މުއިއްޒާ ވާދަކުރެއްވި އެމްޑީީގެ ރިޔާސީ ކެންޑިޑޭޓް ރައީސް އިބްރާޙިމް މުހައްމަދު ސޯލިހަށް ލިބިވަޑައިގެންފައި ވަނީ 109،868 ވޯޓެވެ. މިއީ 19،291 ވޯޓުގެ ތަފާތެކެވެ.
އެހެންކަމުން ދެވަނަ ދައުރަކަށް ރައީސް ޞާލިހު އިންތިހާބުވެ ވަޑައިނުގަންނަވާނެކަން ޔަގީންވެފައިވާއިރު، މިއަދު އެމަނިކުފާނު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ދެން އެމަނިކުފާނުގެ ޕާޓީ، އެމްޑީޕީގެ މަގާމަކަށް ވާދަކުރައްވަން ޝައުގުވެރިކަން ހުންނެވިތޯ ސުވާލުކުރައްވާފައެވެ.
އެ ސުވާލަށް ޖަވާބު ދެއްވަމުން ރައީސް ޞާލިހު ވިދާޅުވީ، ޕާޓީގެ އެތެރޭގައި ހުރި މަގާމުތަކަށް ވާދަކުރެއްވުމާމެދު އަދި ވަކިގޮތެއް ނުނިންމަވާ ކަމަށެވެ. އަދި މިވަގުތު އެމަނިކުފާނު ކުރައްވަމުންދާ މަސައްކަތްތަކީ ޕާޓީ ހީފެހެއްޓެވުމުގެ މަސައްކަތް ކަމަށް ވެސް ވިދާޅުވި އެވެ.
"ޕާޓީގެ އެތެރޭގައި ހުރި މަގާމުތަކަށް ކުރިމަތިލުމާއި ނުލުން އެއީ އަދި އަޅުގަނޑު ވަކި ގޮތެއް ނުނިންމަން. މި ވަގުތުގެ އަޅުގަނޑުގެ މަސައްކަތަކަށް ވެފައި މިއޮތީ ޕާޓީ ޔުނައިޓްކޮށް ހިފެހެއްޓުން. އެނގިވަޑައިގަންނަވާނެ ބުރަ މަސައްކަތްތަކެއް ކުރުމަށްފަހުގައި، އިންތިހާބަކުން ބަލިވެގެންދާއިރު ހުންނާނެ މާޔޫސްކަމެއް. އަދި އެކިއެކި ލޮޅުންތައް އަރާނެ. އެ ދަނޑިވަޅުގައި ޕާޓީގެ ލީޑަރޝިޕްގައި ތިބޭ ބައެއްގެ މަސައްކަތަކަށް ވާންޖެހޭނީ އަޅުގަނޑު ދެކޭގޮތުގައި ޕާޓީ އެއްކޮށް ހިފެހެއްޓުން"
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހް ވިދާޅުވީ ޕާޓީ ބައިބައި ވެގެން ދިޔަ ނުދީ ހިފެހެއްޓުމަކީ އެމްޑީޕީ އަށްވެސް އަދި ދިވެހިރާއްޖެއަށްވެސް އެންމެ ރަނގަޅު ގޮތް ކަމަށެވެ.
އެހެންކަމުން "މަގާމަކަށްވުރެ ބޮޑަށް މިވަގުތުގައި މަސައްކަތް ކުރައްވަމުން ގެންދަނީ ޕާޓީ އެއްކޮށް ހިފެހެއްޓުމަށް ޓަކައި" ކަމަށާ "ވަރުގަދަ އޮޕޮސިޝަނެއްގެ ގޮތުގައި މަސައްކަތް ކުރުމަށްޓަކައި ކުރަންޖެހޭ މަސައްކަތް ތައްް ކުރުމަށްޓަކައި" ކަމަށް ރައީސް ޞާލިހު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
