ރޭ އެކަނިވެސް ހުޅަނގު އައްސޭރިން 60 މީހުން ހައްޔަރުކޮށްފި

ފަލަސްޠީނުގެ ހުޅަނގު އައްސޭރިން ރޭ އެކަނިވެސް ފަލަސްޠީނުގެ 60 މީހަކު ހައްޔަރުކޮށްފައިވާ ކަމަށް އަލްޖަޒީރާ އިން ބުނެފިއެވެ.

އަލްޖަޒީރާގައި ބުނެފައިވަނީ ހުޅަނގުއައްސޭރީގެ އެކި ސަރަހައްދުތަކުން ރޭ 60 މީހަކު އިޒްރާއިލުން ހައްޔަރުކޮށްފައިވާ ކަމަށެވެ.

މީގެ އިތުރުން ހުޅަނގުއައްސޭރީގެ ޣަލްގިލްޔާ އާއި ރާމައްﷲ ގައި ހިނގި ކުރިމަތިލުން ތަކުގައި 2 މީހަކު ޝަހީދުވެ 6 މީހަކަށް ވަނީ އަނިޔާވެފައެވެ.

ހަމަމިއާއި އެކު ރާމައްﷲގައި ހުންނަ ބިރްޒެއިތް ޔުނިވާސިޓީ އިން ވެސް ވަނީ 3 މީހަކު ހައްޔަރު ކޮށްފައިވެއެވެ. އޭގެ ތެރޭގައި އެޔުނިވާސިޓީގެ ސްޓޫޑެންޓް އެސޯސިިއޭޝަންގެ ހެޑް ވެސް ހިމެނޭ ކަމަށް އަލްޖަޒީރާގައި ބުނެފައިވެއެވެ.

7 އޮކްޓޫބަރުން ފެށިގެން ހުޅަނގު އައްސޭރިން، އިޒްރާއިލުން ހައްޔަރުކުރި މީހުންގެ ޢަދަދު މިހާރުވަނީ 1800 އަށް އަރައިފައެވެ. އަދި ހުޅަނގުއައްސޭރިން ޝަހީދުވި މީހުންގެ އަދަދު 132 އަކަށް އަރައި ޒަޚަމްވި މީހުންގެ ޢަދަދު ވަނީ 2100 އަށް އަރައިފައެވެ.

ހުޅަނގުއައްސޭރި އަށް އެއްގަމު މަގުން އަރައި ޢިމާރަތްތަކަށް ގެއްލުންދީ، މީހުންނަށް ބަޑިން ހަމަލާދެމުންދާއިރު ޣައްޒާއަށްވެސް ވައިގެ މަގުން ދަނީ ވަރުގަދަ ނުރައްކާތެރި ހަމަލާދެމުންނެވެ.

އެގޮތުން ޣައްޒާގައި ހުންނަ އެންމެ ގިނަ މީހުން ދިރިއުޅޭ ޖަބަލިއްޔާ ކޭމްޕަށް ވަނީ ތިން ފަހަރަށް ހަމަލާދީފައި ވެއެވެ. އެތިން ހަމަލާގެ ސަބަބުން އެތަން ވަނީ ވަރަށް ބޮޑަށް ހަލާކުވެފައެވެ. އަދި ގިނަ ޢަދަދެއްގެ ބަޔަކު ވަނީ ޝަހީދުވެފައެވެ.

ވައިގެ މަގުން ޣައްޒާއަށް ނުރައްކާތެރި ހަމަލާތައް އިޒްރާއިލުން ދެމުންދާއިރު، އެއްގަމު މަގުން ޣައްޒާއަށް އެރުމަށް އިޒްރާއިލްގެ ޔަހޫދިން ކުރަމުންދާ މަސައްކަތަށް މާބޮޑު ކާމިޔާބެއް ލިބިފައެއް ނުވެއެވެ.

ޣައްޒާއަށް ވަނުމަށް އިޒްެރާއިލްގެ ސިފައިން ކުރަމުންދާ މަސައްކަތަށް ހުރަސް އަޅަމުން ދަނީ އަލް ޤައްސާމް ބްރިގޭޑްސްގެ ހިތްވަރުގަދަ މުޖާހިދުންނެވެ.