އައިއޭސީ އަދި މާރސީ އިން ފަލަސްޠީނަށްޓަކައި ބާއްވާ ވަރަށް ހާއްސަ ހަރަކާތްތަކެއް މާދަމާ!

ޒަޔަނިސްޓް ޔަހޫދީން ފަލަސްތީނުގައި ހިންގަމުންދާ އުދުވާނުގައި ހާލުގައި ޖެހިފައިވާ މުސްލިމުންނަށް އެހީވުމަށް އިންޓަރނޭޝަލް އެއިޑް ކެންޕެއިން ، އައިއޭސީ އާއި މާރސީ ޖަމިއްޔާ ގުޅިގެން ޚާއްސަ ހަރަކާތެއް މާދަމާ ބޭއްވުމަށް ހަމަޖެހިއްޖެއެވެ.

އައިއޭސީން ބުނީ، މި ހަރަކާތް އޮންނާނީ މާދަން ހަވީރު 4:00 އިން ފެށިގެން ރޭގަނޑު 9:00 އަށް އާޓިފިޝަލް ބީޗް ސަރަހައްދު ގައި ކަމަށެވެ.

މި އިވެންޓުގެ ތެރެއިން، ތަފާތުއެކިއެކި ކުޅިވަރުތައްވެސް ކުރިއަށްދާނެކަން އައިއޭސީން ފާހަގަކޮށްފައިވެއެވެ. އަދި ކުޅިވަރުތައް މެދުވެރިކޮށް ފަލަސްތީނުގެ ތާރީޚާއި، ފަލަސްތީނާއި ގުޅޭ މުހިންމު މައުލޫމާތު ތައް ލިބިގެންދާނެ ކަމަށްވެސް ބުނެފައިވެއެވެ.

އެގޮތުން، ކުޑަކުދިންނަށް ޚާއްސަ އެކިއެކި ގޭމް ތަކާއި، ޓްރެޝާ ހަންޓް އާއި، ޖަމްބަލް ސޭލް އާއި، މިއުޒިއަމް، ކުއިޒަކާއި، ފޮޓޯ ބޫތު، ކާއެއްޗެހި ސްޓޯލް އަދިވެސް މީހުންނާއި ކުދިން ގަޔާވާ ފަދަ އެތަކެއް ހަރަކާތްތައް ކުރިއަށް ދާނެ ކަމަށް އައިއޭސީން މައުލޫމާތު ދެއެވެ.

އެހެންކަމުން ކުދި ބޮޑު އެންމެން މިހަރަކާތް ތަކުގައި ބައިވެރިވެ، ފަލަސްތީނަށް އެހީވުމަށް އެ ޖަމިއްޔާއިން ވަނީ އެދިފައެވެ.

ހައްދުފަހަނައަޅާފައިވާ އިސްރާއީލުގެ ސިފައިން 7 އޮކްޓޫބަރުގައި ޣަައްޒާއަށް ދޭން ފެށި ހަމަލާތަކުގައި މިހާތަނަށް 8805 މީހަކު ވަނީ ޝަހީދުވެފައެވެ. އޭގެތެރޭގައިވެސް ގިނައީ މައުސޫމް ކުދިންނާއި އަންހެނުންނެވެ.

މި ހަނގުރާމަ ނިމުމުގެ ކޮޅުމަތިވެސް ފެންނަން ނެތް އިރު އިސްރާއީލުން އަންނަނީ ހުޅަނގުގެ ގައުމު ތަކުގެ އެހީއާއެކު އެމީހުންގެ އަސްކަރިއްޔާ ވަރުގަދަކޮށް ފަލަސްޠީނުގެ އެކި ސަރަހައްދު ތަކަށް ހުއްޓުމެއްނެތި ބޮން އަޅަމުންނެވެ. އެ ހަމާލާތައް ހޮސްޕިޓާ ތަކާއި ސުކޫލް ތަކާއި ރެފިޔުޖީ ކޭންޕު ތަކަށް ވެސް އެމީހުން އަންނަނީ އަމާޒުކުރަމުންނެވެ.