ދިވެހިންގެ އެހީގައި ޣައްޒާގެ އަޤްޞާ ހޮސްޕިޓަލަށް 20 ހާސް ލީޓަރ ތެޔޮ ފޯރުކޮށްދީފި!
ދިވެހިންގެ އެހީގައި، އިންޓަނޭޝަނަލް އެއިޑް ކެންޕެއިން, އައިއޭސީން، 20 ހާސް ލީޓަރުގެ ތެޔޮ ޣައްޒާގެ އަޤްޞާ މާޓިޔާރސް ހޮސްޕިޓަލަށް ހަދިޔާ ކޮށްދީފިއެވެ.
މިކަން ހާމަކޮށް އައިއޭސީން މީސްމީޑިއާގައި އާއްމުކުރި ވީޑިއޯއެއްގައި، އަޤްޞާ މާޓިޔާރސް ހޮސްޕިޓަލްގެ ކޮމިޔުނިކޭޝަން ޑައިރެކްޓަރ މުޙަންމަދު އަލް ޙާޖް ވަނީ، ދިވެހި ރައްޔިތުންނަށާއި އައިއޭސީއަށް ވަރަށް ބޮޑަށް ޝުކުރު އަދާކުރައްވާފައެވެ.
އަޅުގަނޑު ތިބޭފުޅުންނާއި މިއަދު 2 /11/ 2023 ގައި މި ވާހަކަދައްކަނީ އަޤްޞާ ހޮސްޕިޓަލްތެރޭގައިހުރެ. މިއަދު އަޅުގަނޑު މި ބައްދަލުކޮށްލީ ދިވެހިންނަށާއި އަދި އިންޓަރނޭޝަނަލް އެއިޑް ކެންޕެއިންއަށް ވަރަށް ބޮޑު ޝުކުރެއް އަދާކޮށްލުމަށް! އެއީ ޣައްޒާގެ އުތުރުގައި އިޒްރޭލުން ޢުދްވާން ހިންގަމުން ދާއިރު އަޤްޞާ ހޮސްޕިޓަލް ގައި ހުރި ޖަނަރޭޓަރުތަށް ހިންގާ ހޮސްޕިޓަލް އަށް ކަރަންޓުލިބި ސިއްޙީ ޚިދުމަތްތަށް ދޭންފެށުމަށްޓަކައި އެބޭފުޅުން މި ހޮސްޕިޓަލް އަށް 20 ހާސް ލީޓަރ ތެޔޮ ހޯދާ ފޯރުކޮށްދެއްވީތީ! ވަރަށް ބޮޑަށް ޝުކުރިއްޔާ!
އަޤްޞާ މާޓިޔާރސް ހޮސްޕިޓަލްގެ ކޮމިޔުނިކޭޝަން ޑައިރެކްޓަރ މުޙަންމަދު އަލް ޙާޖް
މިކަމާއި ގުޅިގެން އައިއޭސީން ބުނީ، ޔަހޫދީންގެ އަނިޔާތައް ކިތަންމެވަރަކަށް ދިންނަމަވެސް އައިއޭސީން ޣައްޒާއަށް އެހީތެރިކަން ފޯރުކޮށްދިނުން ހުއްޓާ ނުލާނެ ކަމަށެވެ. އަދި ޔަހޫދީން ބޮން އަޅާތީ ބިރުން ޣައްޒާގެ ރައްޔިތުނަށް ދެވެން ހުރި އެހީއެއް ނުދީ ނުތިބޭނެ ކަމަށްވެސް އައިއޭސީން ވަނީ ބުނެފައެވެ.
"މި ތެލަކީ އައިއޭސީގެ ގްރައުންޑް ޓީމުގެ ބުރަ މަސައްކަތުން ޣައްޒާގެ އެތެރޭން ހޯދުމަށްފަހު ރައްކާތެރިކަމާއެކު ހޮސްޕިޓަލަށް ފޯރުކޮށްދެޗުނު ތެޔޮ. އެބޭފުޅުން މަސައްކަތުގައި ބަރަކާތް ލައްވާ ރައްކާތެރިކުރައްވާށި. އާމީން" އައިއޭސީން ބުނެފައިވެއެވެ.
އައިއޭސީން އިތުރަށް ބުނީ، އެންމެހާ ދިވެހީން ތިބީ ފަލަސްޠީނާއެކުކަން، ދިވެހީން މުޅި ދުނިޔެއަށް ހާމަކޮށްދެމުންދާ ކަމަށެވެ. އަދި ފަލަސްތީނުގެ ހައްގުގައި އަޑުއުފުލުމުގައި ދެމި ތިބުމަށް ވެސް އައިއޭސީން ވަނީ އެދިފައެވެ.
އިސްރާއީލުން ޣައްޒާއަށް ދެމުންދާ ހަމަލާތައް ވަރުގަދަކޮށް، މުޅި ޣައްޒާ ހިފުމަށް ކުރަމުންދާ މަސައްކަތުގައި، ޣައްޒާ އެއްކޮށް ބަންދުކޮށް ޒަރޫރީ ޚިދުމަތްތައް ފޯރުކޮށްދިނުމަށްވެސް ހުރަސް އަޅަމުންދާ އިރު، ޣައްޒާއަށް ތެޔޮ އެތެރެ ކުރުންވެސް ވަނީ ބަންދުކޮށްފައެވެ. އެހެންކަމުން، ޣައްޒާގެ ހޮސްޕިޓަލްތައް ހިންގުމަށް ދަތިވާން ވަނީ ފަށާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
