ނަސްރުގެ ދުވަހުގެ ތަހުނިޔާ ރައީސް ޞާލިހު ފޮނުއްވައިފި

މިއަދު ފާހަގަކުރާ 35 ވަނަ ނަސްރުގެ ދުވަހުގެ ތަހުނިޔާ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ދިވެހިރައްޔިތުންނަށް ފޮނުއްވައިފިއެވެ.

ރައީސް ޞާލިހު މިއަދު ކުރެއްްވި ޓުވީޓެއްގައި، ނަޞްރުގެ ދުވަހުގެ ތަހުނިޔާއާއިހެޔޮ އެދުންތައް އެންމެހައި ލޮބުވެތި ދިވެހި ރައްޔިތުންނަށް ދަންނަވައި ޤައުމުގެ ދިފާއުގައި ޤުރުބާން ވެވަޑައިގަތް ޝަހީދުންގެ ޒިކުރާ އައުކުރައްވާ ކަމަށް ވަނީ ވިދާޅުވެފަ އެވެ.

"މާތް لله މި ރާއްޖެ އަކީ އަބަދުވެސް މިނިވަން ޤައުމެއްގެ ގޮތުގައި ލައްވާށި." ރައީސް ޞާލިހު ވިދާޅުވި އެވެ.

ނަސްރުގެ ދުވަހަކީ ދިވެހިންގެ ތެރޭގައި ހިމެނޭ ޚާއިނުންތަކެއް ބައިވެރިވެގެން 1988 ވަނަ އަހަރުގެ ނޮވެމްބަރ 03 ވަނަ ދުވަހު ރާއްޖެ އަށް ދިން އުދުވާނީ ހަމަލާގައި ރާއްޖެއަށް ލިބުނު ނަސްރު ފާހަގަ ކުރާ ދުވަހެވެ. އެދުވަހު ހަމަލާ ދިނުމުގައި އިސްކޮށް އެކިސިފަސިފައިގައި ބައިވެރިވި މީހުންނާއި، ހަމަލާ ރޭވުމުގައި ބައިވެރިވި މީހުންގެ އާއިލާ މެންބަރުން މިހާރު ސަރުކާރުގެ މަގާމުތަކުގައި އެބަތިއްބެވެ.

އަދި ރައީސް ޞާލިހުގެ މި ވެރިކަމުގައި ނަސްރުގެ ދުވަހަކީ ރަސްމީކޮށް ފާހަގަކުރާ ދުވަސްތަކުގެ ތެރެއިން، ބީ ކެޓަގަރީގެ ދުވަހެއްކަމަށް ކަނޑައަޅައި ދައުލަތުގެ މީޑިއާ ޕަބްލިކް ސާވިސް މީޑިއާ (ޕީއެސްއެމް)އިން އެ ދުވަސް ފާހަގަކުރުމަށް ކަނޑައަޅާފައިވާ ވަގުތު ވަރަށް ބޮޑަށް ވަނީ މަދުކޮށްފައެވެ.