ފަސޭހަކަމާއި އެކު އެފްސީ ހެސަ ވާދަ ބަލިކޮށް ޗެމްޕިއަންކަން ސްޓްރީޓް ބްރަދާސްއަށް!

އިނގުރައިދޫ ކައުންސިލް ފުޓްސަލް ފިއެސްޓާ 2023 ގެ ޗެންޕިއަންކަން ސްޓްރީޓް ބްރަދާސް އިން ހޯދައިފި އެވެ. އެޓީމު ޗެމްޕިއަންކަން ހޯދީ ރޭ ކުޅެވުނު މުބާރާތުގެ ފައިނަލް މެޗުގައި އެފްސީ ހެސަ ވާދަ އާއި ވާދަކޮށް ފަސޭހަކަމާ އެކު 7-0 ގެ ނަތީޖާއަކުން މެޗު ކާމިޔާބުކޮށްގެންނެވެ.

ފައިނަލް މެޗުގެ ފުރަތަަމަ ހާފުގައި ސްޓްރީޓް ބްރަދާސް އިން ހަތަރު ލަނޑުގެ ލީޑެއް ނެގިއިރު ދެވަަނަ ހާފުގައި އެޓީމުން ވަނީ އިތުރު ތިން ލަނޑު ކާމިޔާބުކޮށްފައެވެ.

ރޭގެ މެޗުގައި ސްޓްރީޓް ބްރަދާސްގެ އަހުމަދު އައިހަމް ހަ ލަނޑު ކާމިޔާބުކޮށްދިން އިރު އެޓީމުގެ އަނެއް ދެ ލަނޑު ކާމިޔާބުކޮށްދިނީ ފައިނަލް މެޗުގެ މޮޅު ކުޅުންތެރިޔަކަށް ހޮވުނު މުހައްމަދު އިސާމް އެވެ.

މުބާރާތުގެ އެންމެ ގިނަ ލަނޑުޖެހި ކުޅުންތެރިޔާގެ މަގާމު ލިބުނީ ސްޓްރީޓް ބްރަދާސްގެ އަހުމަދު އައިހަމް އަށެވެ. އޭނާ ވަނީ މި މުބާރާތުގައި 16 ލަނޑު ކާމިޔާބުކޮށްފައެވެ. މުބާރާތުގެ އުންމީދީ ކުޅުންތެރިއަކަށް ހޮވުނީ އެފްސީ ހެސަ ވާދައިގެ ހަސަން މާއިލް އެވެ.

މުބާރާތުގެ އެންމެ މޮޅު ފަސް ކުޅުންތެރިންނަކީ މުހައްމަދު މަމްދޫހު (އެފްސީ ހެސަ ވާދަ), އިބްރާހީމް ހަލީމް (އެފްސީ ހެސަ ވާދަ), އަހުމަދު އައިހަމް (ސްޓްރީޓް ބްރަދާސް), މުހައްމަދު ޖުމާން (ސްޓްރީޓް ބްރަދާސް), އަބްދުލް މުހައިމިން އަސްލަމް ( ހަލަފް އެފްސީ) އެވެ.

މުބާރާތުގެ އެންމެ މޮޅު ކޯޗުގެ މަގާމު ލިބުނީ ސްޓްރީޓް ބްރަދާސްގެ ކޯޗު ހުސެއިން ސާޖިދުއަށެވެ. މުބާރާތުގެ ފެއާޕްލޭ ޓީމަކަށް ހޮވުނީ އެފްސީ ބްރަދާސްއެވެ. އަދި މުބާރާތުގެ އެންމެ ޝަރަފްވެރި މަޤާމް ކިންގް އޮފް ދަ ޓޯނަމެންޓްގެ މަގާމް ލިބުނީ ސްޓްރީޓް ބްރަދާސްގެ އަހުމަދު އައިހަމް އަށެވެ.