އެފްއޭއެމް އެޓޯލް ޗެމްޕިއަންޝިޕްގެ ރ.އަތޮޅު ޗެމްޕިއަންކަން ދުވާފަރަށް

މިހާރު ކުރިއަށްދާ އެފްއޭއެމް އެޓޯލް ޗެމްޕިއަންޝިޕްގެ ރ އަތޮޅު ޗެމްޕިއަންކަން ދުވާފަރު ހޯދައިފިއެވެ.

މިއަދު ހަވީރު އިނގުރައިދޫގައި ކުޅުނު ފައިނަލްމެޗް އިނގުރައިދޫ ޓީމް ބަލިކޮށް ދުވާފަރު މެޗް ކާމިޔާބުކުރީ 3-1 ގެ ނަތީޖާއިންނެވެ. މިމެޗްގައި އެންމެ ފުރަތަމަ ލަނޑެއްޖަހައި ކުރީ ހޯދީވެސް ދުވާފަރު ޓީމުންނެވެ. ދުވާފަރުން ލީޑް ނަގާފައިވަނިކޮށް އިނގުރައިދޫ ޓީމުން ވަނީ ފުރަތަމަ ހާފް ނިމުމުގެ ކުރިން ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ.

މެޗްގައި ދުވާފަރުން ޖެހި އަނެއް ދެ ލަނޑު ޖަހާފައިވަނީ ފަހު ހާފްގައެވެ. މެޗްގައި އިނގުރައިދޫ ޓީމަށްވެސް ވަނީ ލަނޑު ޖަހާނެ ރަނގަޅު ފުރުސަތުތައް ލިބިގެންގޮސްފައެވެ.

މެޗް ނިމުމުން ޗެމްޕިއަން ޓީމަށް ޝީލްޑް ހަވާލުކުރިއިރު، މި މެޗް ނިމިގެންދިޔައީ ކުރިން ހީކުރިގޮތާ ހިލާފަށް ކުޅިވަރުގެ ރޫހާ އެއްގޮތަށެވެ. އާއްމުކޮށް ދުވާފަރާއި އިނގުރައިދޫ ބައްދަލުކުރާ މެޗްތަކުގައި މީގެ ކުރިން ހަމަނުޖެހުންތައް ފެނިގެންދިޔަ ނަމަވެސް، މި މެޗްގައި ފެނިގެން ދިޔައީވެސް އެންމެ ރީނދޫ ކާޑެކެވެ. މިމެޗްގައި ދެޓީމްގެ ފަރާތުން ވަރަށް ރީތި ކުޅުމެއް ފެނިގެންދިޔައިރު، ސަޕޯޓަރުންގެ ފަރާތުންވެސް ފެނިގެންދިޔައީ ކުޅިވަރުގެ ރޫހާ އެއްގޮތަށް ސަޕޯޓްދިން މަންޒަރެވެ.