އެފްއޭއެމް ފުޓްސަލް ނޯތް ޒޯން؛ ހިންނަވަރު ބަލިކޮށް އިނގުރައިދޫ ސެމީފައިނަލަށް

މިހާރު ކުރިއަށްދާ އެފްއޭއެމް ފުޓްސަލް މުބާރާތުގެ ނޯތް ޒޯންގައި ރޭ ހިންނަވަރާއި އިނގުރައިދޫ ބައްދަލުކުރިމެޗް އިނގުރައިދޫ ކާމިޔާބުކޮށް ސެމީފައިނަލަށް އެޓީމް ދަތުރުކޮށްފިއެވެ.

މަނަދޫގައި ކުޅުނު މިމެޗް ހިންނަވަރުގެ މައްޗަށް އިނގުރައިދޫ ކުރި ހޯދީ 4-1 ގެ ނަތީޖާއިންނެވެ. ވަރަށް ވާދަވެރި ކުޅުމެއް ފެނިގެންދިޔަ މިމެޗްގައި އިނގުރައިދޫ ޓީމަށް ގޯލް ހުޅުވާލަދިނީ މުބީން އަހުމަދު ރަޝީދެވެ. މި މެޗްގައި އޭނާ ވަނީ ދެ ގޯލް ކާމިޔާބުކޮށްފައެވެ.

މެޗްގައި އިނގުރައިދޫ އިން ޖެހި އަނެއް ދެ ލަނޑު އެޓީމަށް ކާމިޔާބުކޮށްދިނީ ކެޕްތަން އަލީ ހާފިޒްގެ އިތުރުން ބިދޭސީ ކުޅުންތެރިޔާ އުލާނެވެ.

މިމެޗްގައި ހިންނަވަރަށް ސުންކަނޑުވާލަދިނީ އަހުމަދު އަޝްރަފެވެ. މުބާރާތުގެ ސެމީފައިނަލުގެ ޖާގައެއް އިނގުރައިދޫ ކަށަވަރުކުރިއިރު، ސެމީގެ ދެވަނަ ޖާގައިގެ ވާދަވެރިކަން ވަނީ ބޮޑުވެފައެވެ. ސެމީގެ ޖާގަ ހޯދަން ދެން ހިންނަވަރު ނިކުންނާނީ ތުޅާދޫ އާއެވެ. މީގެ ކުރިން މެޗްގައި ތުޅާދޫ އާއި އިނގުރައިދޫ ބައްދަލުކުރިމެޗް އިނގުރައިދޫ މޮޅުވީ 5-2 ގެ ނަތީޖާއިންނެވެ.

މުބާރާތުގައި ހިންނަވަރާއި ތުޅާދޫ ބައްދަލުކުރާމެޗް މާދަމާ ރޭ ކުޅުމަށް ތާވަލްކޮށްފައިވާއިރު، މިރޭ ކުޅޭ މެޗްގައި ބައްދަލުކުރާނީ އޭދަފުއްޓާއި މަގޫދޫއެވެ.