ޕާކިސްތާނުގައި ހުއްދަނެތި ދިރިއުޅޭ މީހުން ނޮވެމްބަރުގެ 1ގެ ކުރިން ފޭބުމަށް އަންގައިފި

ޕާކިސްތާނުގައި ހުއްދަނެތި ދިރިއުޅޭ މީހުން ނޮވެމްބަރުގެ 1ގެ ކުރިން ޕާކިސްތާނުން ފޭބުމަށް އެޤައުމުގެ ސަރުކާރުން އަންގައިފިއެވެ.

ޕާކިސްތާނުގެ ސަރުކާރުން އަންގައިފައިވަނީ އެޤައުމުގައި ހުއްދަ އާއި ނުލައި އުޅޭ މީހުން ނޮވެމްބަރު 1ވަނަ ދުވަހުގެ ކުރިން ފޭބުމަށެވެ. ޕާކިސްތާނުގައި ހުއްދަ އާއި ނުލައި ދިރިއުޅޭ ގިނަ މީހުންނަކީ އެޤައުމާއި އިންވެގެން އޮންނަ އަފްޣާނިސްތާންގެ ރައްޔިތުންނެވެ.

ހުއްދައާއި ނުލައި ޕާކިސްތާނުގައި ހުއްދަ ނެތި ދިރިއުޅޭ އަފްޣާން ރައްޔިތުންގެ ޢަދަދު 1.73 މިލިއަނަށް އަރާނެ ކަމަށް ވަނީ ލަފާކޮށްފައެވެ.

ޕާކިސްތާނުގެ އިންޓީރިއަރ މިނިސްޓަރ ސަރަފްރާޒް ބުގްތީ ވިދާޅުވެފައިވަނީ ޕާކިސްތާނުގައި ހުއްދަ ނެތި އުޅޭ މީހުން ޤައުމު ދޫކޮށް ދިޔުމަށް ނޮވެމްބަރު 1 ވަނަ ދުވަހާއި ހަމައަށް މުހުލަތު ދީފައިވާ ކަމަށެވެ.

ސަރަފްރާޒް ތުހުމަތު ކޮށްފައިވަނީ މިއަހަރު ތެރޭގައި ޕާކިސްތާނުގައި ދީފައިވާ ޖާނުން ފިދާވުމުގެ ހަމަލާތަކަކީ އެޤައުމުގައި ދިރިއުޅޭ އަފްޣާނިސްތާނުގެ ރައްޔިތުން ދީފައިވާ ހަމަލާތަކެއް ކަމަށް ތުހުމަތު ކޮށްފައިވެއެވެ.

ސަރަފްރާޒް ވިދާޅުވެފައިވަނީ ޕާކިސްތާނުގައި ދިރިއުޅޭ 4.4 މިލިއަން އަފްޣާން މީހުންގެ ތެރެއިން 1.73 މިލިއަން މީހުންނަކީ ހުއްދަނެތި ދިރިއުޅޭ މީހުން ކަމަށެވެ.

"ޕާކިސްތާނުގައި މިއަހަރުތެރޭގައި ދީފައިވާ ޖާނުން ފިދާވުމުގެ ހަމަލާތަކަކީ އަފްޣާން ރައްޔިތުންގެ ބައިވެރިވުން ހިމެނިގެން ދީފައިވާ ހަމަލާތަކެއްކަން ދެބަސްވެވޭ ކަށް ނެތް، މިކަމުގެ ހެކިތައް ވެސް އެބަހުރި" ސަރަފްރާޒް ވިދާޅުވެފައިވެއެވެ.

ސަރަފްރާޒް ވިދާޅުވެފައިވަނީ އަންގައިފައިވާ ތާރީޚަށް އެމީހުން ޕާކިސްތާނުން ނުފައިބައިފިނަމަ ގަދަކަމުން އެމީހުން ބާލާނެ ކަމަށް ވަނީ ބުނެފައެވެ.

ޕާކިސްތާނުގެ ސަރުކާރުގެ މިނިންމުމާއި ގުޅިގެން ޕާކިސްތާނުގައި ދިރިއުޅޭ އަފްޣާންގެ ރައްޔިތުން އެދެމުންދަނީ އެމީހުން ޕާކިސްތާނުގައި އާބާދުކޮށްފައިވާ އެމީހުންގެ ދިރިއުޅުން ނެރެ ޕާކިސްތާނުން ބޭރުކޮށް ނުލުމަށެވެ.