ޣައްޒާގައި ކަރަންޓު އުފައްދާ ވަސީލަތް ކަމަށްވާ ސޯލަރ ޕެނަލްތަކަށް އިޒްރާއިލުން ހަމަލާދީފި

ފަލަސްޠީނުގެ ޣައްޒާގައި ކަރަންޓު އުފެއްދެން އޮތް ވަސީލަތް ކަމަށްވާ ސޯލަރ ޕެނަލްތަކަށް އިޒްރާއިލުން ހަމަލާދީފިއެވެ.

ޣައްޒާގައި ހުރި ނޫސްވެރިޔެއް ކަމަށްވާ ހިންދު ޚުދްރީ އަށް ހަވާލާދީ އަލްޖަޒީރާގައި ބުނެފައިވަނީ މިހާރު އިޒްރާއިލުން ވައިގެ މަގުން ދެމުންދާ ހަމަލާތައް ދެމުންދަނީ ސޯލަރ ޕެނަލްތަކާއި ކަރަންޓު އުފައްދާ ޖަނެރޭޓަރު ތަކަށް އަމާޒުކޮށް ކަމަށެވެ.

“އަހަރެންގެ ލޮލުން ދެކުނިން ދެތިން ފަހަރަކަށް ސޯލަރ ޕެނަލް ތަކަށް އަމާޒުކޮށް ހަމަލާދިން މަންޒަރު، އެއީ ޣައްޒާގެ ރައްޔިތުންނަށް ކަރަންޓު އުފެއްދުމަށް މިވަގުތު ބޭނުން ކުރެވެެން އޮތް ހަމައެކަނި ވަޞީލަތް، އެއީ މިވަގުތު ފޯނު ތައް ޗާޖުކޮށް ދުނިޔެއާއި މުޚާތަބު ކުރެވެން އޮތް ހަމަ އެކަނި ގޮތް” ހިންދް ބުނެފައިވެއެވެ.

ޣައްޒާއަށް ދޫކުރާ ކަރަންޓާއި ފެން އަދި ތެޔޮ ވެސް އިޒްރާއިލުން ހުއްޓައިލައިފައިވާއިރު ރަފާހް ބޯޑަރު ހުރަސްކޮށް އެހީގެ ތަކެތި ވައްދާއިރުވެސް ތެޔޮ ވެއްދުން ވަނީ މަނާކޮށްފައެވެ.

ކަރަންޓު ނެތުމުގެ ސަބަބުން ހޮސްޕިޓަލްތަކުގެ ހިންގުމަށް ޖަނެރޭޓަރުން އުފައްދާ ކަރަންޓު ބޭނުން ކުރަން ޖެހިފައިވާއިރު ގިނަ ހޮސްޕިޓަލުތަކުގެ ޚިދްމަތް ޖަނެރޭޓަރަށް އަޅާނެ ތެޔޮ ނެތުމުގެ ސަބަބުން ނުލިބެއެވެ.

ތެޔޮ ނުލިބި ޖަނެރޭޓަރު ހުއްޓިގެން މިއަދު ވަނީ ޣައްޒާގެ ކަމަލް އަދްވަން ހޮސްޕިޓަލްގެ ޚިދްމަތް އެއްކޮށް ހުއްޓާލައިފައި ކަމަށް ފަލަސްޠީނުގެ އިންޓީރިއާ މިނިސްޓްރީ އިން ވަނީ ހާމަކޮށްފައެވެ.