ނަޝީދުގެ އިތުބާރު ނެތް މައްސަލައިގައި ދަ ޑިމޮކްރެޓްސް ތަދައްހުލްވުމަށް ނިންމައިފި

ސުޕްރީމް ކޯޓަށް އެމްޑީޕީން ހުށައަޅާފައިވާ ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ އިތުބާރު ނެތް ކަމަށް ފާސް ކުރަން ހުށައަޅާފައިވާ މައްސަލަ ކުރިއަށް ނުގެންދާ މައްސަލަ އަށް ތަދައްހުލް ވާން ދަ ޑިމޮކްރެޓްސް އިން ނިންމައިފިއެވެ.

ޑިމޮކްރެޓްސްގެ ޕީޖީ ލީޑަރު އަލީ އާޒިމް މިއަދު އެޕާޓީގެ އިންޓަރިމް ކޮމެޓީއަށް ހުށައެޅި ގަރާރުގައި ވަނީ އެމައްސަލައަށް ތަދައްހުލް ވާން އެޕާޓީގެ ނުވަ މެމްބަރުންނަށް ސުޕްރީމް ކޯޓުން ފުރުސަތު ނުދޭން ނިންމުމުން، ސީދާ ޕާޓީން ތަދައްހުލް ވުމަކީ މުހިންމު ކަމެއްކަމަށެވެ.

މީގެ އިތުރުން ވެސް މިގަރާރުގައި ވަނީ،ދަ ޑިމޮކްރެޓިކްސް އަކީވެސް ދިވެހި ރާއްޖޭގެ ގާނޫނީ ޝަޚުސަކަށް ވުމާއިއެކު، އެ ޕާޓީ އަކީ ރައްޔިތުންގެ މަޖިލީހުގެ މައިނޯރިޓީ ޕާޓީއަށް ވާތީ، ސުޕްރީމްކޯޓުން މައްސަލައާއި މެދު ނިންމާ ގޮތަކީ، ދަ ޑިމޮކްރެޓްސްގެ ހައްގުތަކަށާއި މަސްއޫލިއްޔަތު ތަކަށް އަސަރުކުރުވާނެ ކަމެއް ކަމަށެވެ.

މިފަދައިން ޕާޓީގެ ފަރާތުން ކޯޓުގައި ތަދައްހުލް ވާން ނިންމީ މިއަދު ބޭއްވި އެޕާޓީގެ އިންޓަކޮމް ބައްދަލުވުމުގައި ކަމަށް އާޒިމް ވިދާޅުވިއެވެ.

ސުޕްރީމް ކޯޓުން ދަ ޑިމޮކްރެޓްސް ގެ ވަކި ވަކި މެމްބަރުންނަށް ތަދައްހުލް ނުވެވޭނެ ކަމަށް ނިންމީ އެއީ ދުސްތޫރީ މައްސަލަ އެއް ކަމުގައި ވާތީ ކަމަށް އަންގާފައެވެ.

އެެހެންނަމަވެސް، އިދިކޮޅު ޕީޕީއެމް/ޕީއެންސީން އެމައްސަލަ އަށް ތަދައްހުލް ވާން ހުށައެޅުމުން ސުޕްރީމް ކޯޓުން ވަނީ އެފުރުސަތު ދޭން ނިންމާފައި ކަން ފާހަގަ ކޮށްލަން ޖެހެއެވެ.

ރައީސް ނަޝީދުގެ އިތުބާރު ނެތް ކަމަށް މައްސަލަ ހުށައަޅާފައި ސަބަބު ތަކުގެ ތެރޭގައި މަޖިލީހުގެ އެޖެންޑާ ކަނޑައެޅުމާއި މަޖިލީހުގެ ތަޅުމަށް ކަންކަން ގެނައުމުގައި ރައީސް ނަޝީދުގެ އަމިއްލަ މަސްލަހަތު އިސްކޮށް ވަކި ފަރާތަކަށް ބުރަވެ، މަޖިލީހުގެ ގަވާއިދާއި ހިލާފަށް ކަންކަން ނިންމަމުން ދާ ކަމަށް މަޖިލީހުގެ ޕާލަމެންޓްރީ ގްރޫޕުން ފާހަގަ ކޮށްފައިވެއެވެ.

އަދި އެމްޑީޕީން ވަނީ ރައީސް ނަޝީދު އެތައް ދުވަހެއް ވަންދެން މަޖިލީހުގެ ޖަލްސާތައް ހުއްޓުވިކަމަށާއި ރައީސް ނަޝީދުގެ ޕާޓީ ކަމުގައިވާ ދަ ޑިމޮކްރެޓަސް އަށް މަސްލަހަތު އޮތް މައްސަލަތަކެއް މަޖިލީހުގެ އެޖެންޑާގައި ތާވަލުކޮށް، މަގާމުގެ ދަހިވެތިކަން އިސްކޮށްފަައިވާކަމަށްވެސް ތުހުމަތު ކޮށްފައެވެ.

މާދަމާ ސުޕްރީމް ކޯޓުގައި ކުރިއަށް ގެންދިއުމަށް ތާވަލު ކޮށްފައި އޮތް މިމައްސަލައިގެ ދައުވާ ލިބޭ ފަރާތް ކަމުގައިވާ ރައްޔިތުންގެ މަޖިލީސް ތަމްސީލް ކުރާނީ ބަންޑާރަ ނައިބެވެ.