ސްޓެލްކޯ މަހިބަދޫ އިންޓަ އޮފީސް ވޮލީ މުބާރާތް: ސްޓެލްކޯ-ކޭ38 އާއި ފުލުހުންނަށް ފަސޭހަ މޮޅެއް

އދ. މަހިބަދޫގައި ކުރިއަށްދާ "ސްޓެލްކޯ މަހިބަދޫ އިންޓަ އޮފީސް ވޮލީބޯޅަ މުބާރާތް 2024" ގައި ކުޅުނު މެޗުތަކުން ސްޓެލްކޯ-ކޭ38 އަދި ޕޮލިސް ޓީމު ފަސޭހަކަމާއެކު މޮޅުވެއްޖެއެވެ.

މި މުބާރާތުގެ 25 ވަނަ މެޗުގައި ބައްދަލުކުރީ ޕޮލިސް ޓީމާއި އެލްޖީއޭ އަތޮޅު ކައުންސިލް ގޮފީގެ ޓީމެވެ.

މި މެޗު ސީދާ ދެ ސެޓުން ކާމިޔާބުކުރީ ޕޮލިސް ޓީމެވެ. މެޗުގެ ފުރަތަމަ ސެޓު 25-07 އިން ޕޮލިސް ޓީމު ގެންދިޔައިރު، ދެވަނަ ސެޓު އެ ޓީމުން ކާމިޔާބުކުރީ 25-08 ގެ ބޮޑު ތަފާތަކުންނެވެ.

މި މެޗުގެ މޮޅު ކުޅުންތެރިޔާގެ މަގާމު ހޯދީ ޕޮލިސް ޓީމުގެ ޖާޒީ ނަންބަރު 19، މަހުދީ މުހައްމަދެވެ.

މުބާރާތުގެ 26 ވަނަ މެޗުގައި ސްޓެލްކޯ (ކޭ-38) ޓީމު ނުކުތީ ކޮމްބައިން 1 އާ ދެކޮޅަށެވެ. މި މެޗުވެސް ސީދާ ދެ ސެޓުން ކާމިޔާބުކުރީ ވާދަވެރި މޮޅު ކުޅުމެއް ދެއްކި ސްޓެލްކޯ-ކޭ38 ޓީމެވެ. މި މެޗުގެ ފުރަތަމަ ސެޓު 25-18 އިން ސްޓެލްކޯ ގެންދިޔައިރު، ދެވަނަ ސެޓު އެ ޓީމުން ކާމިޔާބުކުރީ 25-08 ގެ ނަތީޖާއަކުންނެވެ.

މެޗުގެ މޮޅު ކުޅުންތެރިޔަކަށް ހޮވުނީ ސްޓެލްކޯ (ކޭ-38) ޓީމުގެ ޖާޒީ ނަންބަރު 10، އަބްދުލް ބާސިތެވެ.

މި ނަތީޖާތަކާއެކު މުބާރާތުގެ ފިރިހެން ޑިވިޝަނުގެ ގްރޫޕް ސްޓޭޖުގެ ފޯރި މިހާރު ވަނީ ވަރަށް ގަދަވެފައެވެ. އެގޮތުން ފިރިހެން ޑިވިޝަނުގެ ގްރޫޕް 'އޭ' ގެ އެއްވަނައިގައި އެންމެ ގިނަ ޕޮއިންޓާއެކު އޮތީ ހޮސްޕިޓަލް އޭ ޓީމެވެ. މި ގްރޫޕުގެ ދެވަނައިގައި އޮތީ ރޯޑް އެސްއެސްއޭ އެވެ.

މީގެއިތުރުން، ގްރޫޕް 'ބީ' ގެ އެއްވަނައިގައި ސްޓެލްކޯ-ކޭ38 އޮތްއިރު، މި ގްރޫޕުގެ ދެވަނައިގައި އޮތީ ފެނަކަ ޓީމެވެ.

މަހިބަދޫގައި ފޯރިއާއެކު ކުރިއަށްދާ މި މުބާރާތަކީ އެ ރަށުގެ އޮފީސްތަކުގެ މެދުގައި އެކުވެރިކަން އާލާކޮށް، ކުޅިވަރުގެ ރޫހު އާލާކުރުމުގެ މަގުސަދުގައި ބާއްވާ މުބާރާތެކެވެ.