ޗެމްޕިއަންސް ލީގު: ސެވިއްޔާ އަތުން ސިޓީއަށް ބޮޑު މޮޅެއް

ޗެމްޕިއަންސް ލީގުގައި ސްޕެއިންގެ ސެވިއްޔާ އަތުން އިނގިރޭސި ވިލާތުގެ ޗެމްޕިއަނުން މެންޗެސްޓާ ސިޓީ އަށް ބޮޑު މޮޅެއް ލިބިއްޖެއެވެ.

ސެވިއްޔާގެ ދަނޑުގައި ކުޅުނު މި މެޗު ސިޓީއިން ކާމިޔާބުކޮށްފައިވަނީ 0-4 ގެ ނަތީޖާއަކުންނެވެ. މި ސީޒަނުގައި ސިޓީގެ އެންމެ ބޮޑު މަގްސަދަކީ ޗެމްޕިއަންސް ލީގު ކާމިޔާބުކުރުން ކަމަށް މީގެ ކުރިންވެސް އެ ޓީމުގެ ކޯޗު ޕެޕް ގާޑިއޯލާ ވަނީ ބުނެފައެވެ.

މި މެޗު ފެށުމާއި އެކު ސިޓީއިން ވަނީ ބޯޅަ ހިފަހައްޓާ ރަނގަޅު ކުޅުމެއް ދައްކާފައެވެ. މެޗުގައި ސިޓީއަށް ލީޑު ނަގައިދިނީ 20 ވަނަ މިނަޓުގައި އާލިންގ ހާލަންޑެވެ. މެޗުގެ ދެވަނަ ހާފުގައި ސިޓީގެ ފޮޑެން ލީޑު ފުޅާކޮށްދިން އިރު ތިންވަނަ ގޯލު ޖަހައިދިނީވެސް ހާލަންޑެވެ. މިއީ ހާލަންޑު ޗެމްޕިއަންސް ލީގުގައި މިހާތަނަށް ކުޅުނު 20 މެޗުގައި އޭނާ ޖަހާފައިވާ 25 ވަނ ގޯލެވެ.

މެޗުގައި ސިޓީއިން ޖެހި ފަހު ގޯލު އިތުރު ވަގުތުގައި ޖަހައިދިނީ ޕޯޗުގަލްއަށް ނިސްބަތްވާ ޑިފެންޑަރު ރުބެން ޑިއާޒް އެވެ.

ސިޓީ އާއި ސެވިއްޔާ އާއި އެކު ގުރޫޕް ޖީ ގައި ހިމެނޭ އަނެއް ދެ ޓީމު ކަމުގައިވާ ޖަރުމަނުގެ ބުރޫޝިއާ ޑޯޓްމަންޑު ވަނީ ކޯޕަންހޭގަން 0-3 ގެ ނަތީޖާއަކުން ބަލިކޮށްފައެވެ. މިއާއި އެކު ސިޓީ އެއްވަނައިގައި އަދި ޑޯޓްމަންޑު ދެވަނައިގައި އޮތް އިރު ކޯޕަންހޭގަން އޮތީ ތިންވަނައިގައެވެ. ސިޓީއަތުން ބަލިވި ސެވިއްޔާ އޮތީ ގްރޫޕުގެ ފުލުގައެވެ.