ިއިންޑިޔާގެ ނަން "ބާރަތް" އަށް ބަދަލު ކުރަނީ

އިންޑިޔާގެ ނަން "ބާރަތް"އަށް ބަދަލު ކުރުމަށް އެޤައުމުގެ ސަރުކާރުން ނިންމާފައިވާ ކަމަށް ބައިނަލް އަޤްވާމީ މީޑިއާ ތަކުން ބުނެފިއެވެ.

އިންޑިޔާގެ ކޮންގްރެސްގެ ލީޑަރު ޖައިރާމް ރަމޭޝް ވިދާޅުވެފައިވަނީ އެހެން އަހަރުތަކާއި ޚިލާފަށް ޖީ20 ގެ ރަސްމީ ރޭގަނޑުގެ ފަރީއްކޮޅަށް ދައުވަތު އަރުވައިފައިވާ "އިންޑިޔާގެ ރައީސް" ގެ ބަދަލުގައި "ބާރަތްގެ ރައީސް"ގެ ނަމުގެ ދަށުން އައިސްފައިވާ ކާޑަކުންކަމަށެވެ.

އިންޑިޔާ ސަރުކާރުގެ މި ނިންމުމަށް ވެރިކަން ކުރާ ބީޖޭޕީގެ މެމްބަރުން ދަނީ ތާއީދު ކުރަމުންނެވެ.

އެގޮތުން އާސާމްއަށް ކަނޑައަޅައިފައި ހުންނަ ޗީފް މިނިސްޓަރު ހިމަންތް ބިސްވާ ސަރްމާ ބުނެފައިވަނީ  ޤައުމު އޭރުވެސް އަދި އޮންނާނީވެސް "ބާރަތް"ގެ ގޮތުގައެވެ.

އިންޑިޔާގެ އެޑިޔުކޭޝަން މިނިސްޓަރ ދަރްމެންދްރަ ޕްރަތާން ވަނީ ޖީ20ގެ ދަޢުވަތުގެ ފޮޓޯ އެއް ޓްވިޓަރ ގައި ހިއްސާކޮށް އެކަމަށް ތާއީދު ކުރާ ކަން ހާމަކޮށްފައެވެ.

"ބާރަތް" ނުވަތަ ހިންދުސްތާން އަދި އިންޑިޔާ މިތިން ނަމަކީވެސް އެކި އެކި މުނާދަބަތުތަކުގައި އިންޑިޔާގެ ސަރުކާރުން އެޤައުމުގެ ނަމުގެ ގޮތުގައި ބޭނުން ކޮށްއުޅޭ ތިންނަމެވެ. ނަމަވެސް ދުނިޔެއަށް އެންމެ މަޝްހޫރު އަދި ޢާންމުކޮށް ބޭނުން ކޮށް އުޅޭ ނަމަކީ އިންޑިޔާއެވެ.

"ބާރަތް" އަކީ މީގެ ވިއްސަކަށް ހާސް އަހަރުކުރިން ސަންސްކްރިތް ބަހުން ލިޔެފައިވާ ފަތްފުއްތަކުގައި އިންޑިޔާއަށް ނިސްބަތްކޮށް ލިޔެފައިވާ ނަމެވެ. އޭގައި ބޭނުން ކޮށްފައިވާ "ބާރަތްއަވަރްސާ" އަކީ އިންޑިޔާއިން ފެށިގެން އިންޑޮނޭޝިޔާއާއި ހަމައަށް އޭރު އިންޑިޔާގެ ބާރު އޮތްއިރު ބޭނުން ކުރާ ނަމެކެވެ.

އިންޑިޔާގެ މިހާރުގެ ވެރިކަން ކުރާ ބީޖޭޕީ އިން މިހާރުވެސް ވަނީ އިންޑިޔާގެ އެކި އަވަށްތަކަށާއި ސްޓޭޓް ތަކަށް ކިޔާ ނަންތައް ބަދަލުކޮށްފައެވެ. ބަދަލު ކޮށްފައިވާ ނަންތައް ގުޅެނީ އިންޑިޔާގައި ކުރިން ވެރިކަން ކުރި މުސްލިމުންގެ ބައެއް ކަމަށްވާ މުޤަލުންގެ ނަމާއި ނުވަތަ އޭރުގެ ހާދިސާތަކާއެވެ.

އެގޮތުން "މުޤަލް ގަރޑަން" ގެ ނަމުން ނަންދީފައިވާ ނިއު ދިއްލީގައި ހުންނަ ރައީސްގެ ގެކޮޅުގެ ނަން ވަނީ "އަމްރިތް އުދްޔާން" އަށް ބަދަލު ކޮށްފައެވެ.

ފާޑު ކިޔާ ފަރާތްތަކުން ބުނެފައިވަނީ އިންޑިޔާގެ ސަރުކާރުން މަސައްކަތް ކުރަނީ އިންޑިޔާގެ ތާރީޚާއި ގުޅިފައިވާ މުސްލިމުންގެ ނަމާއި ހާދިސާތައް ފުހެލަން ކަމަށެވެ.