ރައީސް ޞާލިހް އަށް ދޭ ވޯޓަކީ އަޅުވެތި ކަމަށް ދޭ ވޯޓެއް: ސަޢީދު

ހޮނިހިރު ދުވަހު ބާއްވާ ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަށް ދޭ ވޯޓަކީ އަޅުވެތި ކަމަށް ދެވޭ ވޯޓެއް ކަމަށް ޕީއެންސީގެ ނާއިބު ރައީސް އަދި މާވަށު ދާއިރާގެ މެންބަރު މުހައްމަދު ސަޢީދު ވިދާޅުވެއްޖެއެވެ.

ޕީޕީއެމް/ ޕީއެންސީގެ ލީޑަރޝިޕްގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސަޢީދު ވަނީ, މި އަހަރުގެ ޖުލައި މަހުގެ 15 ވަނަ ދުވަހު، އިންޑިޔާ ގެ ޚާރިޖީ ވަޒީރު ޑރ.ސުބްރަމަނިޔަން ޖައިޝަންކަރު ރާއްޖޭގެ ޚާރިޖީވަޒީރު އަބްދުالله ޝާހިދަށް ފޮނުއްވާފައިވާ ކަމަށް ބުނެ މީސްމީޑިއާގައި ދައުރުވަމުންދާ ސިޓީ އާއި މެދު ކަންބޮޑުވުން ފާޅުކުރައްވާފައެވެ.

"މި ސިޓީގައި އެބަބުނޭ، މިހާރުވެސް އިންޑިއާއަށް ދޫކޮށްފައި އޮތް އުތުތިލަފަޅުގެ އެއްބަސްވުން، މިލިޓަރީ އެންޑު ސަވައިލަންސް ކެޕޭސިޓީ އިތުރު ކުރުމަށްޓަކައި އިތުރު ޖާގަ ބޭނުންވާކަން. އަދި އެކަމާއި ގުޅުވައިގެން ބައެއް ކަންތައްތައް ކުރާ ވާހަކަ. މިސާލަކަށް، 11 އިތުރު އިންޑިއާ ގެ މަތިންދާ ބޯޓެއް ރާއްޖެއަށް ގެންނަ ވާހަކަ. މީގެ އެބައިން ކެޕޭސިޓީ ހުރި ވަރަކަށް ދިވެހި ސިފައިންނޭ ބޭނުން ކުރާނީ. އެކަމަކު މި ކެޕޭސިޓީއެއް މިހާތަނަށް ސޮއި ކުރި އެއްވެސް އެއްޗެއްގައި ނައި. ދިވެހި ޕައިލެޓުންގެ ޓެލެންޓެއް އެމީހުންނަކަށް ނުފެނުނު."

ޕީއެންސީގެ ނާއިބު ރައީސް މުހައްމަދު ސަޢީދު

ސައީދު އިތުރަށް ވިދާޅުވީ އެސިޓީގައި ދެން އޮތް އަނެއްކަމަކީ ހަނިމާދޫއިންނާއި އައްޑޫ އިން އިތުރު 15 ހެކްޓަރުގެ ބިން 99 ބޭނުންވާ ކަމަށް، އިންޑިޔާ އިން ބުނެފައިވާ ކަން ކަަމަށެވެ. އަދި އޭގެ ބަދަލެއްގެ ގޮތުން އިންޑިޔާގެ އެގްޒިމް ބޭންކުން ލައިން އޮފް ކްރެޑިޓް އަށްދޭ ލޯނު އިތުރު ކޮށް، 1.9 ބިލިއަން ޑޮލަރަށް އިތުރު ކުރާނެ ކަމަށްވެސް އެ ސިޓީގައި ބުނެފައިވާ ކަމަށް ސައީދު ފާހަގަކުރެއްވިއެވެ.

ސަޢީދު ވިދާޅުވީ، އަންނަ ހޮނިހިރު ދުވަހު ވޯޓު ލުމުގެ ކުރިން، އެ ސިޓީ ބަޔާން ކޮށްފައިވާ ކަންކަމާއި ގުޅިގެން އަދުގެ ސަރުކާރުން ޖަވާބުދާރީވާންޖެހޭ ކަމަށެވެ. އަދި ސަރުކާރުން އެ ސިޓީއަށް ޖަވާބު ނުދޭ ނަމަ، "ކޮންމެ ކުލައަކަށް ސަޕޯޓްކުރާ މީހެއް ނަމަވެސް" ޕީޕީއެމް އާއި ޕީއެންސީން ކުރަމުންދާ "ޖިހާދު" ގައި ރައްޔިތުން ބައިވެރިވާން ޖެހޭ ކަމަށް އޭނާ ވިދާޅުވި އެވެ. ސައީދު ވިދާޅުވީ ޕީޕީއެމް/ޕީއެންސީން ކުރަމުންދާ ޖިހާދަކީ މިނިވަންކަމުގެ ދިފާއުގައި ކުރަމުންދާ ޖިހާދެއް ކަމަށްވެސް އޭނާ ވިދާޅުވި އެވެ.

"ހުރިހާ ދިވެހި ރައްޔިތުންނަށް އަޅުގަނޑު ކުރާ އިލްތިމާސްއަކީ، އިބްރާޙީމް މުހައްމަދު ޞާލިހު އަށް ދެއްވާ ވޯޓަކީ، ހަގީގަތުގައި ވެސް، ދިވެހިރާއްޖެ އަޅުވެތި ކުރުމަށް ދެއްވާ ވޯޓެއް. މިއީ، ސިޔާސީ ގޮތުން ހިތްދަތި ކަމެއް އެ ކުލައަށް ނިސްބަތްވާ ޕާޓީއަށް އަޔަސް، އަޅުގަނޑުމެން ވަރަށް އާދޭހާއެކު މި ދަންނަވަނީ. ހެޔޮ ނުވާނެ އިބްރާޙީމް މުހައްމަދު ޞާލިހަށް ވޯޓު ދީގެން، މި ރާއްޖެ އެހެން ބައެއްގެ އަޅުވެތިކަމަށް ދާން ދޫކޮށްލަން." ސަޢީދު ވިދާޅުވިއެވެ.