ކުޑަކުދިން ވަޅުލާ ސަހަރާއަކަށް ޣައްޒާ ނުވަނިސް ހަމަލާތައް ވަގުތުން ހުއްޓާލާ: ގުޓްރެސް

ކުޑަކުދިން ވަޅުލާ ސަހަރާއަކަށް ޣައްޒާ ނުވަނިސް ހަމަލާތައް ވަގުތުން ވަގުތައް ހުއްޓާލުމަށް އދ ގެ ޗީފް އެންޓޯނިއޯ ގުޓްރެސް ގޮވައިލައިފިއެވެ.

ޣައްޒާގައި ޝަހީދުވި މީހުންގެ ޢަދަދު 10،000 މައްޗަށް އެރުމާއި އެކު ޣައްޒާގައި ހިނގަމުންދާ ހަމަލާތައް ވަގުތުން ވަގުތައް ހުއްޓާލުމަށް ގުޓްރެސް ގޮވައިލާ ގޮވައިލުން ގަދަ ކޮށްފިކަމަށް އަލްޖަޒީރާގައި ބުނެފައިވެއެވެ.

ޣައްޒާ ކުޑަކުދިން ވަޅުލާ ސަހަރާއަކަށް ވަމުންދާ ކަމަށާއި، 4100 ކުދިން މިހާރު ޝަހީދު ވެފައިވާ ކަމަށާއި، ޣައްޒާ ކުޑަކުދިންގެ ސަހަރާއަކަށް ނުވަނީސް ހަމަލާތައް ހުއްޓާލުމަށް ގުޓްރެސް ވަނީ ގޮވައިލައިފައި ކަމަށް އަކލްޖަޒީރާގައި ބުނެފައިވެއެވެ.

“އެތައް ސަތޭކަ އަންހެން ކުދިންނާއި ފިރިހެން ކުދިން ދަނީ ކޮންމެ ދުވަހަކު ޝަހީދުވަމުން އަދި ޒަޚަމްވަމުން، ފާއިތުވި ތިން ދަހަރު ތެރޭގައި ނޫސްވެރިން މަރުނުވާވަރަށް މިފާއިތުވި 4 ހަފްތާގެ ތެރޭގައި ވަނީ މަރުވެފައި، އދ ގެ މުޅި ތާރީޚުގައި އދ.ގެ މަސައްކަތްތެރިން މަރުނުވާވަރަށް މި ކުޑަ ދުވަސްކޮޅުގެ ތެރޭގައި ވަނީ މަރުވެފަ” ގުޓްރެސް ބުނެފައިވެއެވެ.

ގުޓްރެސް ބުނެފައިވަނީ ޣައްޒާގައި އެއްވެސް މީހަކަށް ރައްކާތެރި ކަމެެއް ނެތް ކަމަށެވެ.

އިޒްރާއިލުން ވަނީ ޣައްޒާ ހިޞާރުކޮށްފައެވެ. ފެނާއި ކާބޯތަކެއްޗާއި ކަރަންޓާއި ފެނާއި ތެޔޮ ލިބޭނެ މަގުވެސް ވަނީ އިޒްރާއިލުން ބަންދުކޮށްފައެވެ. ހަމަލާތަކުގެ ސަބަބުން 1.5 މިލިއަން މީހުން ވަނީ ގެދޮރު ގެއްލިފައެވެ. ޝަހީދުންގެ ޢަދަދު 10،000 މައްޗަށް އަރައިފައި ވާއިރު 25،000 ވުރެ ގިނަ މީހުން ވަނީ ޒަޚަމްވެފައެވެ.