ޣައްޒާގެ އުތުރުގައި ހުރި ހުރިހާ ބޭކަރީއެއްގެ ޚިދްމަތް ވަނީ މެދުކެނޑިފައި

ޣައްޒާގެ އުތުރުގައި ހުރި ހުރިހާ ބޭކަރީއެއްގެ ޚިދްމަތް ވަނީ މެދިކެނޑިފައި ކަމަަށް ފަލަސްޠީނުގެ އިންޓީރިއަރ މިނިސްޓްރީ އިން ބުނެފިއެވެ.

ފަލަސްޠީނުގެ އިންޓީރިއާ މިނިސްޓްރީ އާއި ހަވާލާދީ އަލްޖަޒީރާގައި ބުނެފައިވަނީ ޣައްޒާގެ އުތުރުގައި ހުރި ހުރިހާ ބޭކަރީއެއް ޚިދްމަތް ހުއްޓިފައިވާ ކަމަށެވެ. އެއްބައި ބޭކަރީތައް ހުއްޓިފައިވަނީ އިޒްރާއިލުން ބޮން އެޅުމުގެ ސަބަބުން ތަނުގެ ޢިމާރާތް ހަލާކުވެގެން ކަމަށާއި، އަނެއް ބައިތަންތަން ހުއްޓިފައިވަނީ ތެލާއި ފުށް ނުލިބުމުގެ ސަބަބުން ކަމަށް އަލް ޖަޒީރާގައި ބުނެފައިވެއެވެ.

މިދިޔަ މަހު އެމެރިކާގެ އޮކްސްފާމް ނަމަކަށް ކިޔާ ޗެރިޓިބަލް އޮގަނައިޒޭޝަން އަކުން ބުނެފައިވަނީ އިޒްރާއިލުން ޣައްޒާގެ ރައްޔިތުން މެރުމަށް ބަނޑުހައިހޫނު ކަން ބޭނުން ކުރާ ކަމަށް ވަނީ ބުނެފައެވެ.

އޮކްޓޫބަރު މަހުގެ 21 ވަނަ ދުވަހުން ފެށިގެން ޣައްޒާގެ ދެކުނުގައި ހުންނަ ރަފަޙް ބޯޑަރު ހުރަސްކޮށް ވައްދައިފައިވަނީ 569 އެހީގެ ޓްރަކް ކަމަށެވެ. ނަމަވެސް އެ އެހީގެ ތަކެތީގެ އެއްވެސް މިންވަރެއް ޣައްޒާގެ އުތުރަށް ލިބިފައި ނުވާ ކަމަށެވެ.

އޮކްޓޫބަރު 7 ގައި ފެށުނު ހަނގުރާމައިގެ ކުރިން ދުވާލެއްގެ މައްޗަށް 750 އާއި 850 ދެމެދުގެ ޢަދަދަކަށް އެހީގެ ޓްރަކް ޣައްޒާއަށް ވައްދާ ކަަމަށް އަލްޖަޒީރާގައި ބުނެފައިވެއެވެ.

މިއަދު ޣައްޒާ އަށް ރަފަޙް ބޯޑަރުން ވަނީ އެހީގެ ތަކެތީގެ 93 ޓްރަކެއް ވަނީ ވައްދައިފައިވެއެވެ. އެ ޓްރަކް ތަކުގައި ވައްދައިފައިވަނީ ކާނާ އާއި ފެން، އަންނައުނާއި ރަޖާ، ބޭސް އަދި މެޑިކަލް ސާމާނު ކަމަށް އަލްޖަޒީރާގައި ބުނެފައިވެއެވެ.

އަދިވެސް ރަފަޙް ހުރަސްކޮށް ތެޔޮ ވެއްދުން ވަނީ މަނާކޮށްފައެވެ.