ޓިކްޓޮކްގައި ދަރިވަރަކަށް ބުލީކުރި މައްސަލަ ފުލުހުން ބަލަން ފަށައިފި

ސެންޓްރަލް ޕޮލިސް ޑިވިޜަންގައި ހިމެނޭ ރަށެއްގެ ސްކޫލު ދަރިވަރުންތަކެއް، އެހެން ދަރިވަރަކަށް އިންޓަނެޓް މެދުވެރިކޮށް ބުލީކުރި ކަމަށް ތުހުމަތުކުރެވޭ މައްސަލައެއް ކަމާގުޅުންހުރި އިދާރާތަކާ ގުޅިގެން ތަހުގީގު ކުރަން ފަށައިފިއެވެ.

ސޯޝަލް މީޑިއާ ޕްލެޓްފޯމެއް ކަމަށްވާ ޓިކްޓޮކްގައި އެކައުންޓެއް ހަދައިގެން، ދަރިވަރަކަށް އަމާޒުކޮށް ވަރަށް ބޮޑަށް ބުލީކޮށްފައިވާ މައްސަލައެއް ދާދިފަހުން ވަނީ ފެންމަތިވެފައެވެ.

އެގޮތުން އަނިޔާ ލިބުނު ކުއްޖާގެ ޒާތީ ސިފައަށް ބަދުބަސް ބުނެ ފުރައްސާރަކުރުމުގެ އިތުރުން، އެ ކުއްޖާގެ ފޮޓޯވެސް އާންމުކޮށްފައިވެއެވެ.

މީގެއިތުރުން، އެ އެކައުންޓް މެދުވެރިކޮށް އެ ކުއްޖާއަށް އެކި ކަހަލަ އިންޒާރުތައް ދީ، ނަފްސާނީ ގޮތުން ބޮޑެތި އަސަރުތަކެއް ކުރާނެ ފަދަ މޭރުމުން ވާހަކަތައް ލިޔެފައިވެއެވެ.

މިކަމާ ގުޅިގެން ފުލުހުން މިއަދު ބުނީ މި މައްސަލަ ކަމާބެހޭ އިދާރާތަކާ ގުޅިގެން ބަލަމުންދާކަމަށެވެ.

އިންޓަނެޓާއި ސޯޝަލް މީޑިއާގެ ޒަރީއާއިން ކުދިންނަށް ކުރާ މިފަދަ ސައިބާ ބުލީއިންގެ އަމަލުތަކަށް ސަމާލުވެ، ދަރިވަރުންގެ އުޅުމާއި އިންޓަނެޓް ބޭނުންކުރާ ގޮތް މައިންބަފައިންނާއި ބެލެނިވެރިން ގާތުން ބެލުމަށް ކަމާބެހޭ އިދާރާތަކުން އަބަދުވެސް އިލްތިމާސްކުރެއެވެ.