ލ. ގަމުން ރުއްގަސް ބޭރުކުރާނަމަ ފީއެއް ނަގަނީ

ލ. ގަމުގެ ފެހިކަމާއި ގަސްކަރަ ޙިމާޔަތްކުރުމަށް، އެ ރަށުން ރުއްގަސް ކެނޑުމާއި، އުފުރުމާއި، ކޮނެގެން ނެގުން އަދި ރަށުން ބޭރުކުރުމާ ގުޅޭ ޚާއްޞަ އުސޫލެއް އެކުލަވައިލައި ސަރުކާރުގެ ގެޒެޓުގައި ޝާއިޢުކޮށްފިއެވެ.

މި އުސޫލުގެ ދަށުން ވިޔަފާރި ބޭނުމަށް ރަށުން ބޭރުކުރާ ރުއްގަހުން ފީއެއް ނެގުމަށް ވަނީ ކަނޑައަޅައިފައެވެ.

ގަމު ކައުންސިލުން ޢާންމުކޮށްފައިވާ "ލ. ގަމުން ރުއްގަސް ނެގުމާއި، އުފުރުމާއި ރަށުން ބޭރުކުރުމުގެ އުސޫލު"ގައިވާގޮތުން އޭގެ މައިގަނޑު މަޤްޞަދަކީ ގަމުގެ ޤުދުރަތީ ރީތިކަމާއި ފެހިކަން ދެމެހެއްޓުމާއެކު، ދުވަސްވީ ގަސްގަހާގެހި ރައްކާތެރިކުރުމާއި، ނެގޭ ރުއްގަހުގެ ބަދަލުގައި އައު ރުއްގަސް އިންދައި އާލާކުރުން ހަރުދަނާ ނިޒާމެއްގެ ތެރެއިން ކުރިއަށް ގެންދިއުމެވެ.

އަލަށް ޢަމަލުކުރަން ފެށި މި އުސޫލުގައިވާ ގޮތުން، ލ. ގަމުން ރުއްގަސް ނެގުމަށާއި ބޭރުކުރުމަށް އެދި ހުށަހަޅާ ފޯމު ޕްރޮސެސިންގ ފީއެއްގެ ގޮތުގައި 50 ރުފިޔާ ނަގާނެއެވެ. އަދި ވިޔަފާރި ބޭނުމަށް ރަށުން ބޭރުކުރާ ކޮންމެ ރުކަކަށް 100 ރުފިޔާގެ ފީއެއް ނަގާއިރު، ރަށުން ބޭރުކުރާ ކޮންމެ ގަހެއްގެ ވަށަމިނުގައި 10 ސެންޓިމީޓަރު ހަމަވާނަމަ ގަހަކަށް 25 ރުފިޔާ އަދި އިތުރުވާ ކޮންމެ ސެންޓިމީޓަރަކަށް 5 ރުފިޔާ ނެގުމަށް ވަނީ ހަމަޖެހިފައެވެ.

މީގެއިތުރުން، ދަރުގެ ގޮތުގައި ބޭނުންކުރުމަށް ކަނޑާ ކޮންމެ ގަހަކަށް 10 ރުފިޔާގެ ފީއެއް ނަގާއިރު، ހުއްދައިގެ މުއްދަތު އިތުރުކޮށްދޭ ކޮންމެ ފަހަރަކު 2,000 ރުފިޔާގެ ފީއެއް ދައްކަންޖެހެއެވެ. ނަމަވެސް، ރަޖިސްޓްރީކޮށްފައިވާ ނާސަރީތަކުގައި ހައްދާ ގަސްތަކުން އެއްވެސް ފީއެއް ނުނަގާނެއެވެ.

އުސޫލުގައި ބަޔާންކޮށްފައިވާ ގޮތުގައި، ކައުންސިލްގެ ހުއްދަ ނެތި ރަށުގެ އެއްވެސް ސަރަޙައްދަކުން ރުއްގަސް ކެނޑުމާއި ބޭރުކުރުމަކީ މަނާކަމެކެވެ. ޚާއްޞަކޮށް ރަށުގެ ގޮނޑުދޮށުން ފެށިގެން އެއްގަމަށް 20 މީޓަރުގެ ސަރަޙައްދުގައި ހުރި ރުއްގަހާއި، ޙިމާޔަތްކޮށްފައިވާ ސަރަޙައްދުތަކާއި ތަކެތި އަދި ނެތިދިއުމުގެ ބިރުހީވެފައިވާ ގަސްގަހާގެހި ކެނޑުމާއި ބޭރުކުރުން ވަނީ މަނާކޮށްފައެވެ. މީގެ އިތުރުން ދިރިއުޅުމަށް ދޫކޮށްފައިވާ ގޯތިތަކާއި ކުއްޔަށް ދޫކޮށްފައިވާ ބިންތައް ފިޔަވައި ރަށުގެ ޢާންމު ސަރަޙައްދުތަކުގައި ހެދިފައިވާ ރުއްގަސް ނެގުންވެސް ވަނީ މަނާކޮށްފައެވެ.

ހުއްދަ ދޫކުރުމުގެ އިޖުރާއަތުތަކަށް ބަލާއިރު، 50 ރުކަށްވުރެ މަދުން ނަގާނަމަ ކައުންސިލުން ސީދާ ހުއްދަ ދޫކުރި ނަމަވެސް، 50 އާއި 200 އާ ދެމެދުގެ އަދަދަކަށް ރުއްގަސް ނަގާނަމަ ތިމާވެށްޓާ ބެހޭ އިދާރާގެ ހުއްދަ ހޯދަންޖެހެއެވެ. އަދި 200 އަށްވުރެ ގިނަ ރުއްގަސް ނަގާނަމަ ނުވަތަ 4000 އަކަފޫޓަށްވުރެ ބޮޑު ސަރަޙައްދެއް ސާފުކުރާނަމަ، އީއައިއޭ ހަދައި ފާސްކުރަން ލާޒިމުވެއެވެ.

ތިމާވެށި ރައްކާތެރިކުރުމުގެ މިންގަނޑުތަކުގެ ތެރޭގައި، ގަމުން ކަނޑާ ނުވަތަ ނަގާ ކޮންމެ ރުކަކަށް ނުވަތަ ގަހަކަށް 2 ރުއް ނުވަތަ ގަސް، ކައުންސިލުން ކަނޑައަޅާ ސަރަޙައްދެއްގައި އިންދަންޖެހެއެވެ. އަދި ޚާއްޞަ ޙާލަތްތަކުގައި ހުއްދަދެވޭ ގަސްތަކަށް ކޮންމެ ގަހަކަށް 4 ގަސް އިންދަންޖެހޭނެއެވެ. މީގެއިތުރުން، ރުއްގަސް ނެގުމަށްފަހު ހެދޭ ވަޅުގަނޑުތަކަށް ވެލިއަޅައި ބިންގަނޑު އެއްވަރުކުރުމާއި، ބޭރުކުރާ ގަސްތަކުގައި ކައުންސިލްގެ ޓްރޭސަބިލިޓީ ނަންބަރު ޖެހުން ވަނީ މަޖުބޫރުކޮށްފައެވެ.

މި އުސޫލާ ޚިލާފުވާ ފަރާތްތަކާމެދު ފެހިކަމާއި ގަސްކަރަ ޙިމާޔަތްކުރުމާބެހޭ ޤަވާއިދުގެ ދަށުން ފިޔަވަޅު އަޅައި ބޮޑެތި ޢަދަދުތަކުން ޖޫރިމަނާ ކުރެވޭނެ ކަމަށާ އަދި އުސޫލާ ޚިލާފުވެގެން ހުއްދަ ބާޠިލްކުރެވޭ ފަރާތްތަކަށް އަލުން ހުއްދަ ދޫކުރެވޭނީ 1 އަހަރު ދުވަހުގެ މުއްދަތެއް ފަހުން ކަމަށްވެސް ގަމު ކައުންސިލުން ވަނީ ކަނޑައަޅައިފައެވެ.