"އިސްރާއީލުން ފަލަސްތީނުގެ ބިންފޭރި، ހިންގަނީ ގަތުލު އާއްމު؛ ސްޕެއިން އިން އެމީހުންނާ ގުޅުން ކަނޑާލަން ޖެހޭ"

ފަލަސްޠީނުގެ ބިންތަކަށް ގަދަކަމުން ވެރިވެގެން ދިރިއުޅެމުންދާ އިސްރާއީލުގެ ޔަހޫދީން ފަލަސްތީނުގައި ހިންގަމުންދަނީ ގަތުލު ޢާއްމު ކަމަށް ވިދާޅުވެ، ސްޕެއިން އިން އިސްރާއީލާއެކު ޑިޕްލޮމެޓިކް ގުޅުންތައް މިހާރުން މިހާރަށް ކަނޑާލަން ސްޕެއިންގެ ސޯޝަލް ރައިޓްސް މިނިސްޓަރ، އިއޮނޭ ބެލާރާ ގޮވާލައްވައިފިއެވެ.

ފަލަސްތީނުގައި އިސްރާއީލުން ހިންގަމުންދާ ގަތުލު އާއްމާއި ގުޅިގެން ޖަލްސާއެއްގެ ތެރެއިން ވާހަކަދައްކަވަމުން ބެލާރާ ވަނީ ފަކަސްތީނުގައި އިސްރާއީލުން ހިންގަމުންދަނީ ގަތުލު އާއްމު ކަމަށާ، އެއީ ނަސްލު ނައްތާލުމަށް ކުރަމުންދާ މަސައްކަތެއް ކަމަށެވެ.

"އިސްރާއީލުން އެ ކުރަނީ ނަސްލެއް އެކީއެކަށް ނައްތާލުމުގެ މަސައްކަތް." ބެލާރާ ވިދާޅުވި އެވެ.

އިސްރާއީލުން ވަނީ ގާނޫނާއި ޚިލާފަށް ފަލަސްތީނުގެ ބިން އެމީހުންގެ އަތުން އަތުލާފައި. އަދި ފަކަސްތީނުގެ ރައްޔިތުންގެ ގެތައްވެސް އެމީހުން އަތުން ފޭރެމުން އެދަނީ. ފުރައްސާރަކޮށް، ހުއްޓުމެއްނެތި ރެއާދުވާލު އެދަނީ ފަލަސްތީނުގެ ރައްޔިތުންނަށް އަނިޔާ ކުރަމުން. އަދި ހަމަ އެހެންމެ އިސްރާއީލުގެ ޖަލަށް ލައިގެންވެސް އެތަކެއް އަނިޔާތަކާއި ގޯނާތައް ފަލަސްތީނުގެ ރައްޔިތުންނަށް އެދަނީ ކުރަމުން. އަހަރެމެންނަށް ފެންނަމުން މިދަނީ ބިރުވެރި މަންޒަރު ތަކެއް.

ސްޕެއިންގެ ސޯޝަލް ރައިޓްސް މިނިސްޓަރ، އިއޮނޭ ބެލާރާ

މިއާއެކު ބެލާރާ ވަނީ، ފަލަސްތީނުގެ ބިންތަކަށް އަބަދާއި އަބަދު ބޮން އަޅަމުންދާކަން ފާހަގަކުރައްވައި އެކަމަށް ތާއީދު ކުރަންތޯ ސުވާލު ކުރައްވާފައެވެ. އަދި އިސްރާއީލުގެ ހަމަލާތަކުގެ އަމާޒަކަށްވެ އެތަކެއް ހާސް ކުޑަކުދިން ޝަހީދުވެގެން ގޮސްފައިވާއިރު، އެއްމަސް ދުވަހުގެ ތެރޭގައި ޝަހީދުވި ކުޑަ ކުދިންގެ އަދަދު، ފާއިތުވި އެއް އަހަރު ތެރޭގައި ހިނގި ހުރިހާ ހަނގުރާމައެއްގައި ޝަހީދުވި ކުދިންގެ އަދަދަށްވުރެ ގިނަ ކަމަށް އޭނާ ވިދާޅުވި އެވެ.

ބެލާރާ އިތުރަށް ވިދާޅުވީ ސްޕެއިންގެ މެޖޯރިޓީ އަކީ ސުލްހައާ އަމާން ކަމަށް ލޯބިކުރާ ބައެއް ކަމަށެވެ. އަދި އެކަން ހާމަ ކުރުމަށް ސްޕެއިންގެ ސަރުކާރުން ކުރަންވީ ކަންތައްވެސް ވަރަށް ފަސޭހަ ކަމަށް އޭނާ ވިދާޅުވި އެވެ.

"އިސްރައީލާއިއެކު ޑިޕްލޮމޭޓިކް ގުޅުންތައް ކަނޑާލަންވީ. މިހާރުން މިހާރަށް ކަނޑާލަންވީ."

ސްޕެއިން އިސްރާއީލާއެކު ޑިޕްލޮމެޓިކް ގުޅުން ގާއިމްކޮށްފައިވަނީ 1986 ގައެވެ. އެފަހުން މިހާތަނަށް އައި އިރު އެދެ ގައުމުގެ ގުޅުން ވަނީ ވަރަށް ބަދަހިވެފައި ކަމަށް މީޑިއާ ރިޕޯޓްތައް ބުނެއެވެ.