ޓެކްސް ބަޔާން ހުށަ ނާޅައިގެން އިތުރު ކުންފުނިތަކެއްގެ ނަންތައް އާއްމުކޮށްފި

ޓެކްސްބަޔާން ހުށަ ނާޅައިގެން އިތުރު ކުންފުނިތަކެއްގެ ނަންތައް ދައުލަތުގެ ޓެކްސް އިދާރާއިން މިއަދު އާއްމުކޮށްފިއެވެ.

ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީން ގެޒެޓްގައި ނެރެ އާއްމުކޮށްފައިވާ ޓެކްސް ބަޔާން ހުށަ ނާޅާ މި ލިސްޓްގައި 39 ކުންފުންޏެއް ހިމެނެއެވެ. މި ލިސްޓްގައި އާއްމުކޮފައިވާ ނަންތަކަކީ 2024 ވަނަ އަހަރުގެ ޑިސެމްބަރުމަހުގެ 31 ވަނަ ދުވަހުގެ ނިޔަލަށް ފުރުސަތު ދިނުމުންވެސް ބަޔާން ހުށަނާޅާ ކުންފުނިތަކެވެ.

މީރާއިން ބުނީ، މި ލިސްޓްގައި ކުދި އަދި މެދުފަންތީގެ ވިޔަފާރިތައް ނުހިމެނޭކަމަށެވެ. ލިސްޓަށް ބަލާއިރު، ޓޫރިޒަމް ވިޔަފާރީގައި ހަރަކާތްތެރިވާ ރިސޯޓްތައް ހިންގާ ކުންފުނިތަކާއި ރާއްޖެއިން ބޭރަށް ނިސްބަތްވާ ކުންފުނިތައްވެސް ހިމެނެއެވެ.

މީރާއިން ވަނީ މިއަހަރުގެ ފެބުރުއަރީމަހު ދައުލަތަށް ޓެކްސް ނުދައްކާ 25 ފަރާތެއްގެ ނަންތައްވެސް ގެޒެޓްގައި އާއްމުކޮށްފައެވެ. އެފަހަރު ނަންތައް އާއްމުކުރި ފަރާތްތަކުގެ ތެރޭގައި ހިމެނެނީ، އެއްލައްކަ އަށްވުރެ މަތީ އަދަދުތަކުން ޓެކްސް ނުދައްކާ ފަރާތްތަކެވެ. މި ފަރާތްތަކުގެ ތެރޭގައި ހިމެނެނީ 2024 ވަނަ އަހަރު އާމްދަނީން ނަގާ ޓެކްސް ނުދައްކާ ފަރާތްތަކެވެ.

ދައުލަތަށް ނުލިބިވާ ފައިސާ ހޯދުމަށް މީރާއިން މިދިޔަ އަހަރު ކުރި މަސައްކަތްތަކުން 1.46 ބިލިއަން ރުފިޔާ ވަނީ ހޯދާފައެވެ. ދައުލަތަށް ނުލިބިފާ ފައިސާގެ އަދަދު 13.8 ބިލިއަން ރުފިޔާއަށް އަރާކަމަށް މީރާގެ ތަފާސްހިސާބުތަކުން ދައްކައެވެ