17 ޓީމާއެކު މައިލޯ ރަމަޒާން ހާފުކޯޓް ނެޓްބޯޅަ ޗެލެންޖް 2025 ފަށައިފި

ފިއޮންޓީ ސްޕޯޓްސް އެކަޑަމީގެ ފަރާތުން ކުރިއަށް ގެންދާ "މައިލޯ ރަމަޒާން ހާފުކޯޓް ނެޓްބޯޅަ ޗެލެންޖް 2025" ގެ ކުޅުން ބުރާސްފަތި ދުވަހުގެ ރޭ ފަށައިފިއެވެ.

މުބާރާތުގައި ރޭ އަށް މެޗު ކުޅުނުއިރު، ޖޫނިއަރ ޑިވިޝަންގެ ދަބޯލްޓް އާއި އެޓޭކާސް ވާދަކުރި މެޗު 4-5 ގެ ނަތީޖާއަކުން އެޓޭކާސް ކާމިޔާބުކުރިއިރު، ހައި ފްލަޔަރސް އާއި ޝޫޓާސް ވާދަކުރި މެޗު 4-9 ނަތީޖާއަކުން ކާމިޔާބުކުރީ ހައި ފްލަޔަރސް އެވެ. އަދި ސީނިއަރ ޑިވިޝަންގައި ފައިޓާރސް އާއި ވޯރިއާރސް ވާދަކުރި މެޗު 7-5 ގެ ނަތީޖާއަކުން ފައިޓާރސް ކާމިޔާބުކުރުއިރު، ސްވިފްޓް ސްޓާރސް އާއި ފަލްކަންސް ވާދަކުރި މެޗު 4-9 ގެ ނަތީޖާއަކުން ކާމިޔާބުކުރީ ސްވިފްޓް ސްޓާރސް އެވެ.

މުބާރާތުގެ އޯޕަން ކެޓަގެރީގައި ރޭ ހަތަރު މެޗު ކުޅެފައިވާއިރު، ފުރަތަމަ މެޗުގައި ނިއު އެޓޭކާސް އާއި ކުއީންސް ވާދަކުރި މެޗު 15-5 ގެ ނަތީޖާއަކުން ނިއު އެޓޭކާސް ކާމިޔާބުކުރިއިރު، ދެވަނަ މެޗުގައި ނެޓާރސް އާއި ފާސްޓް ފައިވް ވާދަކުރި މެޗު 16-9 ގެ ނަތީޖާއަކުން ކާމިޔާބުކުރީ ފާސްޓް ފައިވް އެވެ. އަދި ޑްރަގަންސް އާއި ލޮރެންސޯ ވާދަކުރި މެޗު 1-14 ގެ ނަތީޖައަކުން ޑްރަގަންސް ކާމިޔާބުކުރިއިރު، ނިއު އެޓޭކާސްގެ ދެވަނަ މެޗުގައި ޑީއެޗްއޭއެޗް އެސްސީ އާއި ވާދަކޮށް 17-2 ގެ ތަފާތުބޮޑު ނަތީޖާއަކުން ކާމިޔަބުކުރީ ނިއު އެޓޭކާސް އެވެ.

13 މާރިޗު 2025 އިން 19 މާރިޗު 2025 ގެ ނިޔަލަށް ކުރިއަށްދާ މިމުބާރާތުގައި ތިން ކެޓަގަރީއަކުން ޖުމްލަ 17 ޓީމަކުން ބައިވެރިވެފައިވާއިރު، އޭގެތެރޭގައި ހިމެނެނީ ޖޫނިއާ ފަސް ޓީމައި ސީނިއަރ ފަސް ޓީމުގެ އިތުރުން އޯޕަން ކެޓަގެރީގައި ވާދަކުރާ ހަތް ޓީމެވެ.

މުބާރާތުގެ ތިން ކެޓަގެރީގެ މެޗުތައް ވެސް ކުރިއަށް ގެންދިއުމަށް ހަމަޖެހިފައި ވަނީ ލީގު އުސޫލުންނެވެ. އެގޮތުން ޖުނިއާރ އަދި ސީނިއަރ ކެޓަގެރީގެ ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭއިރު، އޯޕަން ކެޓަގެރީގެ ކޮންމެ ޓީމެއް ކޮންމެ ޓީމަކާއި އެއްމެޗު ކުޅުމަށްފަހު ލީގުބުރުގެ ގަދަ ހަތަރު ޓީމުގެ މެދުގައި ސެމީފައިނަލް ދެމެޗު ކުޅުމަށް ވަނީ ހަމަޖެހިފައެވެ.