މާޒިޔާ އާއި ނިއުރޭޑިއަންޓްގެ ކުރިމަތިލުން ނިމުނީ އެއްވަރުވެގެން

މިހާރު ކުރިއަށްދާ ކަޕްވިނާސްކަޕް މުބާރާތުގައި ރޭ ނިއުރޭޑިއަންޓް ސްޕޯޓްސް ކްލަބާއި މާޒިޔާ ބައްދަލުކުރިމެޗް އެއްވަރުވެގެން ނިމިއްޖެއެވެ.

ގަލޮޅު ދަނޑުގައި ކުޅުނު މިމެޗް ނިމުނީ 1-1 ގެ ނަތީޖާއިންނެވެ. ފޯރިގަދަ ކުޅުމެއް ފެނިގެންދިޔަ މި މެޗަކީ ކަޕްވިނާސްކަޕް ފައިނަލުގެ ކުރިން ކުޅޭނޭ އެންމެ ފަހު މެޗެވެ. ކަޕްވިނާސްކަޕް ފައިނަލަށްވެސް ދަތުރުކޮށްފައިވަނީ މި ދެޓީމެވެ. ރޭގެ މެޗް ފޯރިގަދަ ވެގެން ދިއުމުގެ މައިގަނޑު އެއް ސަބަބަކީވެސް އެއީއެވެ.

ރޭގެ މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ މާޒިޔާއެވެ. އެއީ ދެވަނަ ހާފްގައި ނާސިހު އަހުމަދު ތަނަވަސްކޮށްދިން ފުރުސަތެއްގައި ޗަބެލް ގޮމޭޒް ކާމިޔާބުކޮށްދިން ލަނޑުންނެވެ. މާޒިޔާއިން ލީޑް ނަގާފައިވަނިކޮށް ނިއުރޭޑިއަންޓަށް އެއްވަރުކޮށްދިނީ އޭގެ ދިހަ މިނެޓް ފަހުން އަހުމަދު ހުސާމް އެވެ.

މިމެޗްގައި ނިއުރޭޑިއަންޓްގެ އަލީ ފާސިރު، ސެންޓޭއަށް ލަނޑުޖަހާނެ ރަނގަޅު ފުރުސަތުތައް ފުރަތަމަ ހާފްގައި ލިބުނެވެ. ކަޕްވިނާސްކަޕް ފައިނަލުގައި ނިއުރޭޑިއަންޓާއި މާޒިޔާ ބައްދަލުކުރާ މެޗް ކުޅުމަށް ހަމަޖެހިފައިވަނީ އަންނަ ބުދަދުވަހުގެ ރެއެވެ.