48 ގަޑިއިރު ތެރޭ ޣައްޒާއިން 200 މީހުން ޝަހީދުކޮށްލައިފި; ދުނިޔޭގެ ސަމާލުކަން އިސްރާއިލް-އީރާން ހަނގުރާމައަށް

ދުނިޔޭގެ ސަމާލުކަން އިސްރާއިލް-އީރާން ހަނގުރާމައަށް އަނބުރާލުމަށްފަހު، ނިރުބަވެރި އިސްރާއިލުން ޣައްޒާގައި ހިންގަމުންދާ ޤަތުލުޢާއްމު ވަރުގަދަކޮށް، ފާއިތުވެދިޔަ 48 ގަޑިއިރުތެރޭގައިވެސް 200 އަށްވުރެ ގިނަ މީހުން ޝަހީދުކޮށްލައިފިއެވެ.

ޣައްޒާގެ ޞިއްޙީ ވުޒާރާއިން ބުނެފައިވާ ގޮތުން، ޣައްޒާގައި އިޒްރޭލުން ހިންގަމުންދާ ލާއިންސާނީ ޙަމަލާތަކުގައި ފާއިތުވި 48 ގަޑިއިރު ތެރޭ 202 އަށް ވުރެ ގިނަ މީހުން ޝަހީދުކޮށްލައި، 1037 އަށް ވުރެ ގިނަ މީހުން ވަނީ ޒަޚަމްކޮށްލާފައެވެ.

އިސްރާއިލްގެ މި ޙަމަލާތައް ދީފައިވަނީ ޣައްޒާގެ ރައްޔިތުން ބަނޑަށްޖެއްސުމަށްފަހު، އެ މީހުންނަށް ކާނާއާއި އިންސާނީ އެހީތެރިކަން ފޯރުކޮށްދިނުމުގެ ހުއްދަދިން މަދު ސަރަހައްދުތަކަށް އެހީ ހޯދަން ޣައްޒާގެ ރައްޔިތުން އެއްވާ ވަގުތުތައް ބަލާފައި އެ ތަންތަނަށް އަމާޒުކޮށެވެ.

ފަލަސްތީނަށް ކާބޯތަކެތި ފޯރުކޮށްދޭ މައިގަނޑު ދޮރުތައް ބަންދުކޮށްގެން ގާތްގަނޑަކަށް ދެމަސްދުވަސް ތިބުމަށްފަހު، ފުދޭ މިންވަރެއްގެ ކާނާ ފޯރުކޮށްދިނުމަށް އިސްރާއިލުން ހުއްދަ ދިންތާ އަދި މާ ގިނަ ދުވަހެއް ނުވެއެވެ.

އެގޮތުން ކާބޯތަކެއްޗާއި އިންސާނީ އެހީ ފޯރުކޮށްދިނުމުގެ ހުއްދަ ދީފައިވަނީވެސް އެމެރިކާއަށް ނިސްބަތްވާ އިންސާނީ އެހީ ފޮރުކޮށްދޭ ޖަމާއަތެއް ކަމަށްވާ ޣައްޒާ ހިއުމެނިޓޭރިއަން ފައުންޑޭޝަން (ޖީ.އެޗް.އެފް)އަށް ކަން ފާހަގަކޮށްލަން ޖެހެއެވެ. އެ ހުއްދަ ދިން ފަހުން، އެ ސަރަހައްދަށް ކާބޯތަކެތި ހޯދަން އެއްވާ މީހުންނަށް އަމާޒުކޮށް ހުއްޓުމެއްނެތި އިސްރާއިލުން އަންނަނީ ހަމަލާތައްދެމުންނެވެ.

އެކަމާ ގުޅިގެން ދުނިޔޭގެ ބޮޑެތި ޖަމާޢަތްތަކުން ވަނީ، "އެހީ ހަތިޔާރަކަށް" ހަދައި ޣައްޒާގެ ރައްޔިތުން ޝަހީދުކުރަމުންދާ ކަމަށް ބުނެ މިފަދަ އެހީދޭ ޖަމާޢަތްތައް ހިންގާ ގޮތް ކުށްވެރިކޮށްފައެވެ.

އިއްޔެ އެކަނިވެސް އިޒްރޭލުން ދިން ޙަމަލާތަކުގައި 26 މީހުން ވަނީ ޝަހީދުކޮށްލާފައެވެ.

މީގެ އިތުރުން، ވައްފާ ނިއުސް އެޖެންސީއިން ރިޕޯޓްކޮށްފައިވާ ގޮތުގައި، ޣައްޒާގެ ދެކުނު ސަރަޙައްދުގައި ހުންނަ އަލް-މަވާސީގައި ދިރިއުޅުން ދޫކޮށް އެހެން ތަންތަނަށް ހިޖުރަކޮށްފައިވާ ފަލަސްތީނުގެ ރައްޔިތުންނަށް އަމާޒުކޮށް އިޒްރޭލުގެ ޑްރޯނަކުން ދިން ޙަމަލާއެއްގައި ތިން މީހުން ޝަހީދުކޮށްލައި، ގިނަ ބަޔަކު ޒަޚަމްކޮށްލާފައިވެއެވެ. މި ޙަމަލާ އަމާޒުކޮށްފައިވަނީ، ޝައްރާބް އާއިލާގެ މެންބަރުން ދިރިއުޅެމުން ދިޔަ ފޭލިގެއަކަށެވެ. މި ފޭލިގެ ހުރީ، އިޒްރޭލު ސިފައިން މީގެ ކުރިން "ސޭފް ޒޯން" ކަމަށް ކަނޑައަޅާފައިވާ ސަރަޙައްދެއްގައެވެ.

އޮކްޓޯބަރ 2023 ގައި އިޒްރޭލުން ޣައްޒާއަށް ޙަމަލާދޭން ފެށި ފަހުން، ޣައްޒާގައި 55,908 އަށް ވުރެ ގިނަ މީހުން ޝަހީދުކޮށްލައި، 131,138 މީހުން ޒަޚަމްކޮށްލާފައިވާ ކަމަށް ޣައްޒާގެ ޞިއްޙީ ވުޒާރާއިން ބުނެއެވެ.

ކަން މިހެން ހުރިއިރު، ޣައްޒާގެ ޤަތުލްޢާއްމަށްވުރެ ބޮޑަށް ދުނިޔޭގެ ސަމާލުކަން މިހާރު އޮތީ އީރާން އިސްރާއިލް ހަގުރާމައަށްކަން ފާހަގަކޮށްލަންޖެހެއެވެ.

މިމަހު 13 ވަނަ ދުވަހު، އިސްރާއިލުން އީރާނަށް ހަމަލާދީ ހަނގުރާމަ ފަށާފައިވަނީ، ޣައްޒާގެ އެހީދޭ ތަންތަނަށް އެއްވާ ފަލަސްތީނުގެ ރައްޔިތުން ޝަހީދުކުރަމުންދާތީ އިސްރާއިލަށް މުޅި ދުނިޔޭގެ ނުރުހުން އަމާޒުވެފައި ވަނިކޮށެވެ. އެގޮތުން، ޣައްޒާ ޤަތުލްޢާއްމާ ގުޅިގެން ގިނަ ގައުމުތަކުގެ ފިއްތުންތައްވެސް އިސްރާއިލަށް ކުރިމަތިވެގެންދިޔައިރު، އީރާނު-އިސްރާއިލް ހަނގުރާމައަށްފަހު ޣައްޒާއަށް ދުނިޔެއިން ދެމުންދިޔަ ސަމާލުކަން ވަނީ ކުޑަވެފައެވެ.