ކޮންމެ ދުވަހަކު ހަތަރު ގަޑިއިރަށް ގަތުލުއާންމު މެދުކަނޑައިލަން އިޒްރޭލުން އެއްބަސްވެއްޖެ!

ނިރުބަވެރި އިސްރާއީލުގެ ސިފައިން ޣައްޒާގެ އުތުރަށް ހުއްޓުމެއްނެތި ދެމުންދާ ހަމަލާތައް ކޮންމެ ދުވަހަކު ވެސް ހަތަރު ގަޑިއިރަށް މެދުކަނޑައިލަން ޔަހޫދީން އެއްބަސްވެފައިވާ ކަން އެމެރިކާއިން ހާމަކޮށްފިއެވެ.

މިކަން އިއުލާންކޮށް، ވައިޓް ހައުސްގެ ޤައުމީ ސަލާމަތާ ބެހޭ ކައުންސިލްގެ ތަރުޖަމާނު ޖޯން ކަރބީ ބުނެފައިވަނީ، އިސްރާއީލުގެ ހަމަލާތައް ހަތަރު ގަޑިއިރަށް ހުއްޓައިލުމަށް އެމީހުން އެއްބަސްވެފައި ވަނީ އެމެރިކާގެ ރައީސް ޖޯ ބައިޑަނާއި ޒަޔަނިސްޓު އިސްރާޢީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫއާ ދެމެދު ކުރި މަޝްވަރާތަކަކަށް ފަހު ކަމަށެވެ. އަދި އެ ނިންމުމަކީ ރަނގަޅު ނިންމުމެއް ކަމަށް ވެސް އޭނާ ބުންޏެވެ.

މީގެ އިތުރުން ކަރބީ ބުނެފައިވާ ގޮތުން، ނިރުބަވެރި ޔަހޫދީން އެއްބަސްވެފައި ވަނީ، ހަމައެކަނި ޣައްޒާގެ އުތުރުގައިވާ ސަރަޙައްދުތަކަށް ދެމުންދާ ހަމަލާތައް އެވަގުތަށް މެދުކަނޑައިލަން ކަމަށެވެ.

އަދި އެކަން ކުރަން ނިންމާފައިވަނީ އެ ސަރަޙައްދުތަކުގައި ދިރިއުޅޭ މުސްލިމުންނަށް ޣައްޒާގެ ދެކުނަށް ދަތުރު ކުރުމުގެ ފުރުޞަތު ދިނުމަށާއި، ޣައްޒާގައި ހާލުގައި ޖެހިފައިވާ 2.3 މިލިޔަނެއްހާ މީހުންނަށް އިންސާނީ އެހީގެ ސާމާނު ފޯރުކޮށްދެވޭނެ ކަމަށް ވެސް އޭނާ ބުންޏެވެ.

ނަމަވެސް ހަގީގަތުގައި އެކަން ކުރުމުގެ އެންމެ މުހިންމު މަގުސަދަކީ ކުރިންވެސް ބައިޑަން އިއުލާން ކުރި ގޮތަށް ޙަމާސް ޖަމާޢަތުން ރަހީނު ކޮށްފައިވާ އަސީރުން މިނިވަން ކޮށް އެމީހުންގެ މައުލޫމާތު ކަށަވަރު ކުރަން ވަގުތު ދިނުމެވެ.

ނިރުބަވެރި ޔަހޫދީން ފަލަސްތީނުގެ މުސްލިމުން ޝަހީދުކޮށް، ނަސްލު ނައްތާލަން ކުރާ މަސައްކަތަށް މަސް ދުވަހަށްވުރެ ގިނަ ދުވަސްވެފައި ވަނިކޮށް އެފަދަ ނިންމުމެއް ނިންމާފައިވާއިރު، މި އޮކްޓޫބަރު 7 ވަނަ ދުވަހުން ފެށިގެން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 10,812 އަށް އުފުލިފައެވެ. އޭގެ ތެރޭގައި 4,300 އަށްވުރެ ގިނަ ޢަދަދެއްގެ ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު މިހާރު ވަނީ 24,000 އަށް އުފުލިފައެވެ.