ހިޔާ ފުލެޓް ތަކުގެ ކުލި ކުޑަކުރަނީއެއް ނޫން؛ ކުއްޔަށް ލުއި ދެނީ: އަކްރަމް

މި މަހުން ފެށިގެން ހިޔާ ފުލެޓުތަކުގެ ކުއްޔަށް ގެނެވޭ ބަދަލަކީ، ކުލި ދައްކަމުންދާ ފަރާތްތަކަށް ކުލި ދެއްކުމަށް ދެވޭ ލުއެއް ކަމަށާ، ކުލި ކުޑަ ނުކުރާ ކަމަށް ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.

ހިޔާ ފުލެޓުތަކުގެ ކުއްޔަށް ގެނެވޭ ބަދަލާއި ގުޅިގެން މިއަދު ޕްލޭނިންގ މިނިސްޓްރީ އާއި އާބަންކޯއިން ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުން އަކްރަމް ވިދާޅުވީ ހިޔާ ފުކެޓްތަކުގެ ކުއްްޔަށް ލުއި ދީފައިވަނީ 7 އަހަރު ދުވަހަށް ކަމަށެވެ. އެގޮތުން، ލުއި ދޭ 7 އަހަރުގައި ކުކީގެ ގޮތުގައި ދައްކަން ޖެހޭނީ 5,300 ކަމަށްވެސް އޭނާ ވިދާޅުވި އެވެ.

ކުލި ކުޑަކުރީކީ ނޫން. އެއީ އަޅުގަނޑުމެން އަބަދުވެސް ބުނަމުން މިއައީ ކުލި ނެތޭ ކުޑަ ކުރެވޭކަށް. ކުއްޔަށް ލުއެއް މި ދިނީ. ރައީސް މި ނިންމެވީ ކުއްޔަށް ލުއެއް ދެއްވުމަށް. އެހެންވީމާ އެގޮތުން މިދެންނެވިހެން 5,300ރ 7 އަހަރު ދުވަހުގެ ތެރޭގައި ދައްކަން ނިންމަވާފައި، ދެ އަހަރު އިތުރު ކުރެއްވީ.

އަކްރަމް ކަމާލުއްދީން

އަކްރަމް ވިދާޅުވީ ކުއްްޔަށް ދެވުނު މި ލުޔަކީ ރިޔާސީ އިންތިޚާބާއި ގުޅިގެން ގެނެވުނު ލުއެއް ނޫން ކަމަށާ، ފާއިތުވި ތިން އަހަރު ދުވަހުގެ ތެރޭގައިވެސް ހިޔާ ފުލެޓުތަކުގެ ކުއްޔަށް ލުއިތައް ދެވިފައިވާ ކަމަށެވެ.

ހިޔާ ފުލެޓްތަކުގެ ކުއްޔަށް މިގެނެވުނު ލުއާއިއެކު މީގެ ކުރިން 25 އަހަރުގެ މުއްްދަތަކަށް މަހަކު 7,500ރ ދައްކަމުން އައި އައުން، ކުރިއަށް އޮތް 7 އަހަރުގައި މަހަކު 5,300ރ އަށް ދައްކާ ޖުމުލަ 27 އަހަރަށް ކުލި ދެއްކުން ދަންމާލާ ގޮތަށް ވަނީ ބަދަލުކުރެވިފައެވެ. މިއާއެކު ކުރިއަށް އޮތް 7 އަހަރުގައި ފުލެޓް ތަކުގެ ކުލިން މަހެއްގެ މައްޗަށް 2,200ރ ލުއި ވަނީ ލިބިފައެވެ.

މިބަދަލާއިއެކު 7 އަހަރު ދުވަހުގެ މުއްދަތަކަށް، ކުލީގެ އިތުރުން، މެއިންޓެނެންސްފީއާއެކު، ހިޔާ ފްލެޓްގެ ކުލީގެ ގޮތުގައި ދައްކަންޖެހޭ އަދަދަކީ 6300 ރުފިޔާއެވެ. އަދި އެ 7 އަހަރު ނިނުމަށް ފަހު، ކުލި އަނެއްކާވެސް 7500 ރުފިޔާއަށް ބަދަލުވާނެއެވެ.

ލޯނުގެ މުއްދަތު ދަންމާލައިގެން ނަމަވެސް ކުލި މިހާރަށްވުރެ ކުޑަ ކުރެވޭކަމަށް ވާނަމަ ފްލެޓުތަކުގައި ދިރިއުޅޭ ފަރާތްތަކަށް މުހިންމީ އެފަދަ ލުއި ފަސޭހައެއް ލިބުން ކަމަށް އެފަރާތްތަކުން މީގެ ކުރިން ވަނީ ބުނެފައެވެ.

ކުރީގެ ރައީސް ޔާމީން އަބްދުލްގައްޔޫމްގެ ސަރުކާރުން އެޅި މި ފުލެޓްތަކަށް އެ ސަރުކާރުން ނަގަން ނިންމީ މަހަކަށް 5,500ރ އެވެ. ނަމަވެސް މި ސަރުކާރުން އެ ކުލި ބޮޑު ކުރުމުން ރައްޔިތުންނަށް ބޮޑު ތަކުލީފެއް ވެގެން ގޮސްފައިވާ ކަމަށް ބުނެ އެތަނުގައި ދިރިއުޅޭ ފަރާތްތަކުން އެތަށް ފަހަރަކު ވަނީ ކުލި ކުޑަ ކުރަން އެދިފައެވެ.