ސިޔާސީ ޚިޔާލުތަފާތުވުމަކީ ޤައުމީ ވިސްނުން ތަފާތުވާން ޖެހޭ ސަބަބެއް ނޫން: އަބްދުއްރަހީމް
ސިޔާސީ ޚިޔާލުތަފާތުވުންތަކަކީ ޤައުމީ ކަންކަމުގައި ގެންގުޅޭ ވިސްނުން ތަފާތުވާން ޖެހޭ ސަބަބެއް ނޫން ކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.
އަބްދުއްރަހީމް މިފަދައިން ވިދާޅުވެފައިވަނީ ފޯޅަވަހި މައްސަލައިގައި ސަރުކާރުން އަމަލުކޮށްފައިވާ ގޮތުގެ ސަބަބުން ރާއްޖޭގެ ދެކުނުން ކަނޑުގެ ސަރަހައްދެއް ގެއްލިގެން ދިއުމާއި ގުޅިގެން އެކަމުގައި އިހުމާލުވެފައިވާ ފަރާތްތައް ޒިންމާ ކުރުވުމަށް ސިޔާސީ ޕާޓީތަކުން ގުޅިގެން މަސައްކަތް ކުރަން ނިންމާ، އެ މަސައްކަތުގެ ތެރެއިން ބަންޑާރަނައިބު އިބްރާހިމް ރިއްފަތުގެ އިތުބާރު ނެތްކަމުގެ ވޯޓު ނެގުމަށް މަޖިލީހަށް މައްސަލައެއް ހުށައަޅާ އެކަން އިއުލާނު ކުރުމާއި ގުޅިގެން، އެ މަސައްކަތުގައި ޝާމިލުވާ ހުރިހާ ފަރާތްތަކަށް މަރުހަބާ ދަންނަވާ ކުރެއްވި ޓްވީޓެއްގަ އެވެ.
އަބްދުއްރަހީމްގެ އެ ޓްވީޓުގައި ވަނީ އެ މައްސަލައިގައި ގުޅިގެން މަސައްކަތް ކުރުމަށް އުފައްދާފައިވާ އިއްތިހާދުގެ މެމްބަރުން ފެނިގެންދާ ފޮޓޯއެއް ވެސް ހިއްސާކުރައްވާފަ އެވެ.
އޭނާ ވިދާޅުވީ އެ ފޮޓޯއިން ފެނިގެން ދަނީ ސިޔާސީ ޚިޔާލު ތަފާތުވުންތައް ހުރި ނަމަވެސް ޤައުމުގެ ހައްގުގައި ބަސް ބުނަން ކެރޭ ފަރާތްތައް ދިވެހިންގެ ތެރޭގައި އަބަދުވެސް ތިބޭނެކަމުގެ މަންޒަރުތައް ކަމަށެވެ.
މި މައްސަލައިގައި ޤައުމީ ވިސްނުން އިސްކުރެއްވި ހުރިހާ ލީޑަރުންނަށް ވަކިން ޚާއްސަކޮށް މިވަގުތު ޖަލުހުކުމެއް ތަންފީޒު ކުރައްވަން ޖެހިވަޑައިގެންފައިވާ ޕީޕީއެމްގެ ރައީސް އަދި އެ ޕާޓީގެ ރިޔާސީ ކެންޑިޑޭޓޫ އަބްދުالله ޔާމިން އަބްދުލްގައްޔޫމަށް ވަރަށް ޚާއްސަ ޝުކުރެއް އަދާކުރައްވާކަމަށް އަބްދުއްރަހީމް ވިދާޅުވި އެވެ.
ޗާގޯސް އާއި ރާއްޖެއާއި ދެމެދު ފުށުއަރާ ސަރަހައްދުގެ މައްސަލަ ޙައްލުކުރުމަށް މޮރިޝަސްއިން އިޓްލޮސްއަށް މައްސަލަ ހުށައަޅާ، މައްސަލައިގެ ހުކުމާއި ހަމަޔަށް ވާސިލްވެފައި ވަނިކޮށް ރައީސް ޔާމިންގެ އިރުޝާދަށް ޕީޕީއެމުން ވަނީ އިޓްލޮސްއަށް ސިޓީއެއް ފޮނުވާފަ އެވެ. އެފަހުން އެހެން ބައެއް ސިޔާސީ ޕާޓީތަކުންވެސް ރައްޔިތުންގެ ފަރާތުން އިޓްލޮސްއަށް ސިޓީތައް ފޮނުވާފައި ވެއެވެ.
އެ މައްސަލައާއި ގުޅިގެން ރައީސް ޔާމިން ވިދާޅުވީ އިޓްލޮސްއިން ނިންމި މައްސަލަ ބޮލާލާ ޖައްސަވާނެ ކަމަށެވެ. އަދި ރައްޔިތުންގެ މަސްލަހަތާއި ރާއްޖޭގެ ސަރަހައްދު ހިމާޔަތްކުރުމަށް ކުރެވެން އޮތް ހުރިހާކަމެއް ކުރައްވާނެކަމުގެ ޔަގީންކަންވެސް ދެއްވާ ކަމަށެވެ.
ގުޅިފައިވާ ސިޔާސީ ޕާޓީތަކުން ކުރަމުންދަނީ އެ މަސައްކަތް ކަމަށާއި، އެ ޕާޓީތަކާއި އެކު ކުރީގެން ބަންޑާރަ ނައިބު ޑރ މުހައްމަދު މުނައްވަރާއި އާޒިމާ ޝުކޫރުވެސް ގެންދަވަނީ މަސައްކަތްޕުޅު ކުރައްވަމުން ނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
