23 ބައިވެރިންނާއެކު ހައުސް ކީޕާސް އެސޯސިއޭޝަންގެ ޕްރޮގްރާމެއް ހިންގުމަށް އިންޑިއާއަށް!

ރިސޯޓުތަކުގެ ހައުސް ކީޕިން ދާއިރާގެ ކަންކަން ކުރިއަރުވާ ތަރައްގީ ކުރުމަށް ރާއްޖޭގައި ރަޖިސްޓާ ކޮށްގެން ހިންގާ މޯލްޑިވްސް ހައުސް ކީޕާސް އެސޯސިއޭޝަން (އެމް.އެޗް.އޭ) ގެ މުހިންމު ޕްރޮގްރާމެއް ހިންގުމަށް 23 ބައިވެރިންނާއެކު އިންޑިއާގެ މުންބާއީއަށް ފުރައިފި އެވެ.

ހައުސް ކީޕާސް އެސޯސިއޭޝަނުން މުމްބާއީގައި ހިންގުމަށް ހަމަޖެހިފައިވާ ޕްރޮގްރާމަކީ "ޕްރިންސިޕަލްސް އޮފް ކްލީން" ގެ ނަމުގައި ކުރިއަށް ގެންދާ ޕްރޮގްރާމެކެވެ.

އެ ޕްރޮގްރާމާއި ގުޅޭގޮތުން އެ އެސޯސިއޭޝަންގެ ޖެނެރަލް ސެކެޓްރީ ވޮއިސް އަށް ދިން އިންޓަވިއުއެއްގައި ވިދާޅުވީ އެ ޕްރޮގްރާމަކީ އެ އެސޯސިއޭޝަންގެ ފަރާތުން ހައުސް ކީޕިން ދާއިރާގައި ހިމެނޭ ހުރިރާ އެގްޒެކެޓިވް ހައުސް ކީޕަރުންނާއި ލޯންޑަރީ މެނޭޖުންނަށް ޚާއްސަކޮށްގެން ތައްޔާރުކޮށްފައިވާ ޕްރޮގްރާމެއް ކަމަށެވެ.

ހައުސް ކީޕާސް އެސޯސިއޭޝަންގެ ފަރާތުން 23 ބައިވެރިންނާއެކު އިންޑިއާގެ މުމްބާއީގައި ކުރިއަށް ގެންދާ އެ ޕްރޮގްރާމުގައި،  ލޯންޑްރީއާއި ހައުސް ކީޕިންގައި ދިމާވާ އެކި އެކި މައްސަލަތަކާއި، ހައުސް ކީިޕިންއަށް ބޭނުންވާ އެކި ފެބްރިކްއާއި ކެމިކަލްސްތަކާއި ގުޅޭ މައުލޫމާތުތައް ލިބިގެންދާނެކަމަށް އެ އެސޯސިއޭޝަނުން ވަނީ ބުނެފަ އެވެ.

" މިވަގުތު މި ބައިވެރިންގެ ރިސޯޓުތަކުގެ އެމީހުންނަށް ދިމާވެފައި ހުރި މައްސަލަތައް އައިޑެންޓިފައިކޮށް އެ މައްސަލަތައް ހިފައިގެން އަޅުގަނޑުމެން މި ދަނީ މުމްބާއީއަށް. އިރާދަކުރެއްވިއްޔާ އަޅުގަނޑުމެން އެނބުރި އަންނާނީ އެ ހުރިހާ މައްސަލަތަކަށް ވެސް ޙައްލު ހޯދައިގެން"

ހައުސް ކީޕާސް އެސޯސިއޭޝަންގެ ގެނެރަލް ސެކެޓްރީ

ހައުސް ކީޕާސް އެސޯސިއޭޝަނުން ބުނީ މުންބާއީގައި ކުރިއަށް ގެންދާ "ޕްރިންސިޕަލް އޮފް ކްލީނިން" ޕްރޮގްރާމަކީ ހައުސްކީޕިން ދާއިރާގައި މަސައްކަތް ކުރާ ފަރާތްތަކަށް ވަރަށް މުހިންމު މައުލޫމާތުތަކެއް ލިބިގެންދާނެ، ވަރަށް ބޭނުންތެރި ޕްރޮގްރާމަކަށް ވެގެންދާނެ ކަމަށެވެ.

މިފަދަ ޕްރޮގްރާމުތަކުގައި ހައުސްކީޕިން ދާއިރާގައި ހަރަކާތްތެރިވާ ފަރާތްތައް ބައިވެރިވުމަކީ ވަރަށް މުހިންމުކަމެއްގެ ގޮތުގައި އެ އެސޯސިއޭޝަނުން ވަނީ ފާހަގަކޮށްފަ އެވެ.

ހައުސް ކީޕާސް އެސޯސިއޭޝަން އަކީ ރިސޯޓުތަކުގެ ހައުސް ކީޕިން ދާއިރާގެ ކަންކަން ކުރިއަރުވާ ތަރައްގީ ކުރުމަށް ރާއްޖޭގައި ރަޖިސްޓާ ކޮށްގެން ހިންގާ ހަމައެކަނި އެސޯސިއޭޝަނެވެ.

2008 ވަނަ އަހަރު ފޯރަމެއްގެ ގޮތުގައި ވުޖޫދުވި މަސައްކަތް ރަސްމީކޮށް އެސޯސިއޭޝަނެއްގެ ގޮތުގައި ރަޖިސްޓްރީ ކުރެވިގެން ދިޔައީ 2021 ވަނަ އަހަރުގައެވެ.

އެހިސާބުން ފަތުރުވެރިކަމުގެ ދާއިރާގައި، ޚާއްސަކޮށް ހައުސް ކީޕިން އާއި ގުޅުންހުރި ކަންކަން ޕްރޮމޯޓުކޮށް، އެ ދާއިރާގައި ހަރަކާތްތެރިވާ ފަރާތްތަކުގެ ކުރިއެރުމަށް އެ އެސޯސިއޭޝަނުން ދަނީ ގިނަ ކަންތައްތަކެއް ކޮށްދެމުންނެވެ.

އެގޮތުން އެ އެސޯސިއޭޝަން މެދުވެރިވެގެން ފަތުރުވެރިކަމުގެ ދާއިރާގައި މަސައްކަތް ކުރާ ފަރާތްތައް ރާއްޖެއިން ބޭރުގައި ތަމްސީލު ކުރެވޭނެ ފަހި ފުރުސަތުތަކެއް ދަނީ ހޯދާދެމުން ނެވެ. ރާއްޖެއިން ބޭރުގައި ބާއްވާ އެކި ސެމިނާތަކާއި ފޯރަމްތަކުގައި ރާއްޖޭގެ ރިސޯޓުތަކުގައި މަސައްކަތް ކުރާ ފަރާތްތަކުގެ ހުނަރާއި ގާބިލުކަން ދައްކާލެވޭނެ ފުރުސަތުތައް ހައުސް ކީޕާސް އެސޯސިއޭޝަނުން ދަނީ ފޯރުކޮށްދެމުން ނެވެ.