ދީނާއި ސިޔާސަތު ވަކި ކުރުމަކީ ސެކިއުލާ ފިކުރު ފެށިގެން އައި ގޮތް: ޝެއިޚް ފިކުރީ

ދީނާއި ސިޔާސަތު ވަކި ކުރުމަކީ ސެކިއުލާ ފިކުރު ފެށިގެން އައި ގޮތް ކަމަށް ރާއްޖޭގެ ފުންނާބު އުސް ދީނީ ޢިލްމުވެރިޔާ އައްޝެއިޚު ހަސަން މޫސާ ފިކުރީ ވިދާޅުވެއްޖެއެވެ.

ދީނީ އެކިއެކި މުނާސަބަތުގައްޔާއި، ދީނީ ދަރުސްތަކުގައްޔާއި، ޚުޠުބާތަކުގައި ވަކި ކެންޑިޑޭޓަކަށް ނުވަތަ ވަކި ޕާޓީއަކަށް ތާއީދު ހޯދުމަށް ނުވަތަ ތާއީދު ކުޑަކުރުމަށް އެއްވެސް ވާހަކައެއް ދައްކައިގެން ނުވާނެ ކަން އަންގައި، އިލެކްޝަންސް ކޮމިޝަނުން އިއްޔެ އާންމު ވަނީ ރިޔާސީ އިންތިހާބުގެ ގަވައިދު އާއްމު ކޮށްފައެވެ.

އެކަމާއި ގުޅިގެން ޝެއިޚް ފިކުރީ ކުރެއްވި ޓްވީޓެއްގައި ވިދާޅުވީ، ދީނަކީ ދިރިއުޅުމުގެ ހުރިހާ ކަމެއްގެ މައްޗަށް އިސްވެ އޮންނަންޖެހޭ އަސާސް ކަމަށެވެ. އަދި އެއާއި ޚިލާފަށް ކަންކަން ގެންދިޔުމަކީ ލާދީނިއްޔަތު ކަމަށްވެސް ވެސް ޝެއިޚް ވިދާޅުވި އެވެ.

"ދީނާއި ސިޔާސަތު ވަކި ކުރުމަކީ ސެކިޔުލާ ފިކުރު ފެށިގެން އައި ގޮތެވެ." ޝެއިޚް ފިކުރީ ވިދާޅުވިއެވެ.

އިލެކްޝަންސް ކޮމިޝަންގެ ރިޔާސީ އިންތިހާބުގެ ގަވާއިދުގެ މި ބަޔާއި ގުޅިގެން ދީނީ ޢިލްމުވެރިންގެ ނުރުހުން އެ ކޮމިޝަނަށް އަމާޒުވަމުން އަންނައިރު، ޢާއްމުންގެ ފާޑުކިޔުންތައް ސަރުކާރަށް އަންނަނީ އަމާޒުވަމުންނެވެ.

އެގޮތުން ސަރުކާރުން އިލެކްޝަންސް ކޮމިޝަނަށް ނުފޫޒު ފޯރުވާ ކަމަށާ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެސް ވެރިކަމަށް ވަޑައިގެންނެވީ ދީނީ ޢިލްމުވެރިން ރަށްރަށް ދަތުރުކޮށް ދީނީ ދަރުސްތައް މެދުވެރިކޮށް ކެންޕެއިން ކޮށްގެން ކަމަށްވާއިރު، އެފަދައިން ކަން ކުރުން މަނާ ކުރީ ވެރިކަން ވެއްޓިދާނެ ކަމުގެ ބިރު ހީވެގެން އިލެކްޝަން ކޮމިޝަނަށް ނުފޫޒު ފޯރުވައިގެން ކަމަށް ގިނަ ބަޔަކު ދެކެއެވެ.