އިންޑިއާ ސިފައިންނާ ގުޅޭ ގޮތުން ހާމަކުރެވެން ހުރި ކަންކަން ހާމަކުރާނަން: ރައީސް ޞާލިހު
ރާއްޖޭގައި އިންޑިއާ ސިފައިން ތިބި މައްސަލައާއި މޮރިޝަސް މައްސަލާގައިވެސް ހާމަކުރެވެން ހުރި ކަންކަން ކުރައްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމަށް ދެއްވި ބަސްދީގަތުމެއްގައި ރައީސް ޞާލިހު ވިދާޅުވީ ކެމްޕެއިން ތެރޭގައި ސަރުކާރަށް އަމާޒުކޮށް ދެއްކި ދޮގު ވާހަކަތަކެއް އެބަހުރި ކަމަށެވެ.
އެގޮތުން ރާއްޖޭގެ މިނިވަންކަމާ އިސްތިގުލާލު ގެއްލުވާލުމަށް ސަރުކާރުން މަސައްކަތްކޮށްފައި ހުރި ވާހަކައަކާ, ބޭރުގެ ސިފައިން ރާއްޖޭގަ ތިބޭ ވާހަކައަކާ, އެކަހަލަ ބައެއް ދޮގު ވާހަކަތައް ހުރި ކަމަށް އެމާނިކުފާނު ވިދާޅުވިއެވެ.
"ގައުމުގެ މިނިވަންކަމާ އިސްތިގުލާލު ގެއްލުވާލުމަށް އަޅުގަނޑުމެން މަސައްކަތްކޮށްފައި ހުރި ވާހަކައަކާ، ބޭރުގެ ސިފައިން މިތާ ތިބޭ ވާހަކަ އަކާ، އެކަހަލަ ބައެއް ދޮގު ވާހަކަތައް ކިޔާދީގެން ރައްޔިތުންގެ ބޮލަށް އެ ގަބޫލުކުރެވޭވަރަށް އެވާހަކަ ދެކެވިފައި އެބަހުރި" ރައީސް ޞާލިހް ވިދާޅުވިއެވެ.
ރައީސް ޞާލިހް ވިދާޅުވީ އެވާހަކަ ތަކަކީ ހަގީގަތެއް އޮތް ތެދެއް ނޫން ކަމަށާއި އެކަން ރައްޔިތުންނަށް އޮޅުންފިލުވަދޭން ކެންޕެއިންގެ ތެރެއިން މަސައްކަތް ކުރެވިފައި ނެތް ކަމަށެވެ. އަދި ދެވަނަ ބުރުގައި, ހާމަކުރެވެން ހުރި ހުރިހާ އެއްޗެއް ހާމަކުރައްވާނެ ކަމަށް ވިދާޅުވިއެވެ.
އިރާދަކުރެއްވިޔާ ދެވަނަ ބުރުގައި ހާމަ ކުރެވެން ހުރި ހުރިހާ އެއްޗެއް ހާމަކޮށް، އެކަން ރައްޔިތުންނަށް އޮޅުން ފިލުވައިދޭނަން. އޭތި ދޮގު ކަމާ. ރާއްޖޭގެ ސަރަހައްދުން ބައެއް ގެއްލިފައި ނޯންނާނެ ކަމާ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހް ވިދާޅުވީ ރައްޔިތުންނަށް އެވާހަކަތައް ކިޔައިދެއްވުމުން ރައްޔިތުންނަށް އެކަން ވިސްނޭނެ ކަމަށެވެ.
ރައީސް ޞާލިހް މިފަދައިން ވިދާޅުވެފައިވާ ނަމަވެސް ރާއްޖޭގައި އިންޑިޔާ ސިފައިން ތިބި ކަމަށާ، ނަމަވެސް އެ ތިބި އަދަދު ހާމަކުރެވެން ނެތް ކަމަށް ސަރުކާރުން ވެސް އަންނަނީ ހައިކޯޓުގައި ބުނަމުންނެވެ. އަދި އެފަދައިން ކަން ކޮށްފި ނަމަ، ރާއްޖެއަށް ކާޑުގެ ބާވަތްތައްވެސް ނުލިބިދާނެ ކަމަށް ސަރުކާރުން ބުނެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
