މަހްރަމަކު ނުލައި ހައްޖާއި އުމްރާ ވެވޭނެ ގޮތް ހަދައިފި
ހައްޖާއި އުމްރާގެ އަޅުކަން އަދާކުރުމަށް ދާ އަންހެން ހައްޖުވެރިންނާއެކު މަހްރަމެއް ހުރުން ލާޒިމް ކުރާ އުސޫލު އުވާލައި އިތުރު ބަދަލުތަކެއް ސައުދީ އަރަބިއްޔާއިން ބަދަލުކޮށްފިއެވެ.
މިސްރުގެ ވެރިރަށް ގާހިރާގައި ހުންނަ ސައޫދީ އެމްބަސީގައި ނޫސްވެރިންނާ ވާހަކަ ދައްކަވަމުން، ސައޫދީގެ ހައްޖާއި އުމްރާގެ ކަންކަމާ ބެހޭ ވަޒީރު ޑރ. ތައުފީގު އައްރަބީއާ އިއްޔެ ވިދާޅުވީ، ދުނިޔޭގެ އެއްވެސް ގައުމަކުން އުމްރާ ނުވަތަ ހައްޖުގެ އަޅުކަން އަދާކުރުމަށްޓަކައި ސައޫދީއަށް އެތެރެވާ އިރު، މަހްރަމަކު ގެނައުން މިހާރު މަޖުބޫރު ނޫން ކަމަށެވެ.
މިހާތަނަށް ސައޫދީ އަރަބިއްޔާ އިން އަމަލުކުރަމުން އައި އުސޫލުގައި އޮންނަ ގޮތުން، އުމްރާ ނުވަތަ ހައްޖުގެ އަޅުކަން އަދާކުރުމަށްޓަކައި ސައޫދީ އަށް އެތެރެވާ ކޮންމެ އަންހެނަކު، އޭނާއާ އެކުގައި މަހްރަމަކު ގެންދަންޖެހެ އެވެ. އެގޮތުން މަހްރަމުންގެ ގޮތުގައި މީގެކުރިން ބަލައިގަންނަމުން ދިޔައީ ފިރިމީހާ، ބައްޕަ ނުވަތަ ދާއިމަށް ކައިވެނި ހަރާމް ފިރިހެނުންނެވެ. އެ އުސޫލު ދޫކޮށްލީ ކީއްވެގެން ކަމެއް ސައޫދީ ސަރުކާރުން ނުބުނެ އެވެ.
މީގެ އިތުރުން، އުމްރާގެ އަޅުކަން އަދާކުރުމަށް ވިސާ ދިނުމުގައި ސައޫދީން މިހާތަނަށް އަމަލު ކުރަމުން އައި އުސޫލަކީ، ކޮންމެ މަހަކު ވެސް ވަކި އަދަދަކަށް ވިސާ ދޫކޮށް އުމްރާގެ އަޅުކަން ކުރުމަށްވެސް އެކަމަށް ޚާއްސަ ވިސާއެއް ނަގައިގެން ކަމަށް ވީ ނަމަވެސް ސައުދީ ވަޒީރު ވިދާޅުވީ، މީގެ ފަހުން ވިސާ ދޫކުރުމުގައި ވަކި އަދަދެއް ނޯންނާނެކަމަށާ އަދި ކޮންމެ ކަހަލަ ވިސާއެއްގައިވެސް ސައުދީއަށް އެތެރެވާ މީހަކަށް އުމްރާގެ އަޅުކަން އަދާކުރެވޭނެކަމަށެވެ.
"މިހާރު މި ހަމަޖެއްސި ގޮތުން، ކޮންމެ ކަހަލަ ވިސާއެއްގައި ސައޫދީ އަށް އެތެރެވާ މީހަކަށް ވެސް އުމްރާގެ އަޅުކަން އަދާކުރެވޭނެ. ކޮންމެ މަހަކަށް ވަކި ކޯޓާއެއްގެ ވެސް މިހާރަކު ނޯންނާނެ." ސައޫދީގެ ހައްޖާއި އުމްރާގެ ކަންކަމާ ބެހޭ ވަޒީރު ވިދާޅުވިއެވެ.
ހައްޖުވެރިންނަށް ލުއިފަސޭހަ ގޮތްތައް ހަމަޖައްސައިދިނުމަށް އަބަދުވެސް ވަރަށް ބޮޑު އިސްކަމެއް ދޭ ކަމަށްވެސް ސައުދީ ސަރުކާރުން ބުނެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
