ޕާކިސްތާނުގެ ބޮޑު ވަޒީރު ކަމަށް ޝެހެބާޒް ޝަރީފް އައްޔަނުކޮށްފި

ޕާކިސްތާނުގެ ބޮޑު ވަޒީރު ކަމުގެ ދެވަނަ ދައުރަކަށް، އެގައުމުގެ ގާނޫނު ހަދާ މަޖިލީހުން ކުރީގެ ބޮޑުވަޒީރު ޝެހެބާޒް ޝަރީފް އައްޔަނުކުރައްވައިފިއެވެ.

މި މަގާމް ޝެހެބާޒް އަށް އަލުން ލިބިވަޑައިގަތީ، މިދިޔަ މަހުގެ 8 ގައި ބޭއްވި އާންމު އިންތިހާބުގައި އޭނަ ނިސްބަތްވާ ޕާކިސްތާން މުސްލިމު ލީގް-ނަވާޒް (ޕީއެމްއެލްއެން) އާއި ޕާކިސްތާން ޕީޕަލްސް ޕާޓީ (ޕީޕީޕީ) އިން މަޝްވަރާކޮށް، ކޯލިޝަން ސަރުކާރެއް އެކުލަވައިލަން ނިންމި ނިންމުމާއި ގުޅިގެންނެވެ.

ޕާކިސްތާނުގެ ބޮޑު ވަޒީރު ކަމުގެ ހުވާ ޝެހެބާޒް މިއަދު ކުރެއްވުމަށް ހަމަޖެހިފައިވާއިރު، ހުވާކުރެއްވުމުގެ ރަސްމިއްޔާތު އޮންނާނީ މިއަދު ގެ މެންދުރު ގެ ވަގުތެއްގައި، އެގައުމުގެ ރިޔާސީގަނޑުވަރުގައި އެވެ.

ޕާކިސްތާނުގައި ސަރުކާރެއް އެކުލަވައިލުމަށް ޓަކައި 266 މެންބަރުން ހިމެނޭ ގާނޫނު ހަދާ މަޖިލީހުގެ 133 ގޮނޑި ޕާޓީއަކަށް ލިބެންޖެހެއެވެ. ޕާކިސްތާނުގެ ގައުމީ އިންތިހާބުގައި ޕީއެމްއެލްއެން އިން 73 ގޮނޑި ކާމިޔާބުކުރި އިރު، ޕީޕީޕީ އިން 54 ގޮނޑި ކާމިޔާބުކުރިއެވެ. މި އިންތިހާބުގައި އެންމެ ގިނަ ގޮނޑި ކާމިޔާބު ކޮށްފައިވަނީ ކުރީގެ ބޮޑު ވަޒީރު އިމްރާން ޚާން އަށް ތާއީދު ކުރެއްވި އަމިއްލަ ކެންޑިޑޭޓުންނެވެ. އެގޮތުން، ޕާޓީ އަށް އިންތިހާބުގައި ވާދަކުރުމުގެ ފުރުސަތު ނެތުމުން އެ ޕާޓީގެ މެންބަރުންތަކެއް ވަނީ އަމިއްލަ ގޮތުން ވާދަކުރައްވައި 102 ގޮނޑި ކާމިޔާބު ކުރައްވާފައެވެ.

ޝެހެބާޒް ޝަރީފް އަކީ ޕާކިސްތާންގެ ކުރީގެ ބޮޑުވަޒީރު ނަވާޒު ޝަރީފުގެ ކޮއްކޯފުޅެވެ. އެބޭފުޅާ ޕާކިސްތާނުގެ ބޮޑު ވަޒީރުކަން މީގެ ކުރިން ކޮށްފައިވަނީ 2022 ވަނަ އަހަރުގެ އޭޕްރިލް މަހުން ފެށިގެން 2023 ވަނަ އަހަރުގެ އޮގަސްޓް މަހުގެ ނިޔަލަށެވެ.  އޭރު އެމަގާމަށް ޝެހެބާޒް އައްޔަނު ކުރެއްވީ، ކުރިން އެމަގާމުގައު ހުންނެވި އިމްރާން ޚާންގެ މައްޗަށް އިތުބާރު ނެތްކަމުގެ ވޯޓެއް ނަގައި މަގާމުން ދުރުކުރުމާ ގުޅިގެންނެވެ.