ޣައްޒާގައި "އަންރުވާ" މަނާކުރަން އިސްރާއީލުން ފާސްކުރި ބިލާއި އދ އިން ދެކޮޅު!

ފަލަސްތީނުގެ ޣައްޒާގައި، އދ ގެ ފަލަސްތީނުގެ ރެފިއުޖީންނަށް އިންސާނީ އެހީތެރިކަން ފޯރުކޮށްދިނުމަށް ޚާއްސަ ޖަމިއްޔާ، ޔުނައިޓެޑް ނޭޝަންސް ރިލީފް އެންޑް ވޯކްސް އެޖެންސީ ފޯ ޕަލެސްޓިން ރެފިއުޖީސް އިން ދަ ނިއާ އީސްޓް (އަންރުވާ) މަނާކުރުމަށް ޔަހޫދީންގެ ޣައިރު ގާނޫނީ ދައުލަތް، އިސްރާއީލުން ނިންމުމާއި ގުޅިގެން އދ އިން ކަންބޮޑުވުން ފާޅުކޮށްފިއެވެ.

ޔަހޫދީ ދައުލަތުގެ މި ނިންމުމާއި ގުޅިގެން އދގެ ސެކްރެޓަރީ ޖެނެރަލް އެންޓޯނިއޯ ގުޓަރެސްވެސް މިކަމާއި ނުރުހުން ފާޅުކުރައްވާފައިވާއިރު، އދ ގެ އިންސާނީ ހައްގުތަކާ ބެހޭ ވެރިޔާ ވޯލްކަރ ޓާކް ވިދާޅުވީ، އަންރުވާ އަކީ ޣައްޒާއަށް އެހީ ފޯރުކޮށްދޭ މައި ޖަމިއްޔާއަށް ވާއިރު، މިކަމުގެ ސަބަބުން ވަރަށް ބޮޑެތި ނޭދެވޭ ނަތީޖާތަކެއް ނުކުންނާނެކަމަށެވެ.

މިއާއިއެކު، ޖެނީވާގައި ހުންނަވާ އދގެ ހިއުމަން ރައިޓްސް އޮފީސް (އޯއެޗްސީއެޗްއާރު) ގެ ތަރުޖަމާނު ޖެރެމީ ލޯރެންސް ވިދާޅުވީ، މި ނިންމުމުގެ ސަބަބުން ޣައްޒާގެ ރައްޔިތުންނަށް ފޯރުކޮށްދޭ ކާބޯތަކެއްޗާއި ތައުލީމާއި ސިއްހީ ހިދުމަތްތަކުގެ އިތުރުންވެސް އެނޫންވެސް ޒަރޫރީ ބޭނުންތައް ފޯރުކޮށްދިނުން އެއްކޮށް ހުއްޓިގެންދާނެ ކަމަށެވެ. އަދި ޣައްޒާގައި ހިންގަމުންދާ އުދުވާންގެ ސަބަބުން މިހާރު ޣައްޒާގެ ރައްޔިތުން ތިބި ހާލަތަށް ވުރެ ދަށަށް ދިރިއުޅުމުގެ ކަންކަން ވެއްޓިގެންދާނެކަމަށް ވެސް އޭނާ ވިދާޅުވިއެވެ.

އިސްރާއީލުގެ މި ނިންމުމާއިއެކު، އދ ގެ އެކި ޖަމިއްޔާތަކުގެ އިތުރުން ޣައްޒާއަށް އެހީ ފޯރުކޮށްދިނުމަށް މަސައްކަތްކުރާ ގިނަ ޖަމާއަތްތަކުން މިކަން ކުށްވެރިކޮށްފައިވާއިރު، ދުނިޔޭގެ ނުރުހުމާއި ފާޑުކިޔުން އަންނަނީ އެމީހުންނަށް އަމާޒުވަމުންނެވެ.