"ރުކުގެ އާ ޖީލެއް" ބިނާކުރުމަށް ރުއް އާލާކުރުމުގެ ޕްރޮގްރާމެއް ސަރުކާރުން ފަށައިފި
ރާއްޖޭގެ އާބާދީ އިތުރުވަމުން އަންނަ މިންވަރާއި ގާތަށްވެސް ދިވެހި ރުކުގެ އާބާދީ އިތުރުވަމުން ނުދާތީ ދެމެހެއްޓެނިވި ގޮތެއްގައި ކާއްޓާއި ކުރުބާ ލިބޭނީ ރުކުގެ އާބާދީ އިތުރުކޮށްގެން ކަމަށްވާތީ މިނިސްޓްރީ އޮފް ފިޝަސީސް އެންޑް އެގްރިކަލްޗާއިން ރުއް އާލާ ކުރުމުގެ ޕްރޮގްރާމެއް ފަށައިފި އެވެ.
ރާއްޖޭގައި ރުއްގަހަށް ޖެހޭ ބަލީ އިތުރުވުމާއި، ރުކުގެ އާބާދީ ދަށްވުމުގެ ސަބަބުން ކުރުނބާ އަދި ކާށި ލިބުން ދަތިވެފައިވާކަން ފާހަގަކުރެވޭތީ މި މައްސަލައަށް ދެމެހެއްޓެނިވި ޙައްލެއް ގެނައުމަށް ސަރުކާރުން ފެއްޓެވި މަސައްކަތުގެ ދަށުން ވަނީ ފަސް ހާސް ރުއް ރާއްޖެ ގެނެސްފަ އެވެ.
އަދި އެ ރުއްތަށް އަތޮޅުތެރޭގެ އެކި ރަށްތަކަށް ދަނީ ބަހަމުންނެވެ. އެގޮތުން 7 އަތޮޅެއްގެ 11 ރަށަކަށް މި ރުއްތައް ބެހުމަށް ސަރުކާރުން ނިންމާފައިވެއެވެ. މި ޕްރޮގްރާމްގެ ދަށުން ހއ އަދި ހދގެ ބައެއް ރަށްތަކަށް މިހާރު ވަނީ ރުއް ހަދިޔާކޮށްފައެވެ. އަދި މިހާރު ކުރިއަށްދަނީ ނ އަދި ރ އަތޮޅުގެ ރަށްތަކަށް ރުއް ހަދިޔާކުރުމުގެ މަސައްކަތެވެ.
ރުއް އާލާކުރުމުގެ ޤައުމީ ޕްރޮގްރާމްގެ ދަށުން ނ.ކެނދިކުޅުދޫގައި ރުއް އިންދުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ.ޙުސައިން ރަޝީދު ޙަސަން ވިދާޅުވީ، ރުއް އިންދުގެ ޤައުމީ ޕްރޮގްރާމް ކުރިއަށް ގެންދަވަނީ ރުއްގަނޑެއް ހެއްދޭނެ ޖާގަ އޮތް ރަށްރަށުގައިކަމަށެވެ.
މިނިސްޓަރ ވަނީ ރާއްޖޭގައި ކާއްޓާއި ކުރުނބާ ލިބުން ދަތިވި ސަބަބުތަކުގެ މައްޗަށްވެސް އަލިއަޅުއްވާލައްވާ ވާހަކަފުޅު ދައްކަވާފައެވެ. އެގޮތުން ރާއްޖޭގައި އާބާދީ އިތުރުވަމުން އަންނަ މިންވަރާ ގާތަށްވެސް ރުކުގެ އާބާދީ އިތުރު ކުރެވިފައިނުވާކަމަށާއި، މިހާރު ރާއްޖޭގެ ރުތުކުގެ އާބާދީގައި ހިމެނޭ ރުއްތަކަކީ މުސްކުޅި ރުއްތަކެއްކަން މިނިސްޓަރ ފާހަގަކުރެއްވިއެވެ.
"ކުރުގެ އާ ޖީލެއް" ބިނާކުރުމަށް ސަރުކާރުން ފަށާފައިވާ ޕްރޮގްރާމުގެ ތެރެއިން ރަށްތަކަށް ބަހަމުން އަންނަނީ، އެ ރުއްތަކަކީ ބައްޔެއް ނެތްކަން ކަށަވަރުކުރުމަށް ފަހުގައިކަމަށް ފިޝަރީސް މިނިސްޓްރީން ވަނީ ބުނެފަ އެވެ.
އޭގެ އިތުރުން މިނިސްޓްރީން ބުނީ އެ ރުއްތައް ރަނގަޅަށް ބެލެހެއްޓިއްގެކަމަށް ވާނަަމަ، އެ ރުއްތަށް ފޯދި ދެއަހަރާއި ބައިގެ ތެރޭގައި މަންފާ ލިބެން ފަށާނެ ކަމަށެވެ. އަދި ރަށްތަކުގައި އިންދާ ރުއްތަކުން ކައުންސިލަށް އާމްދަނީ ހޯދޭނެކަމަށް ވެސް ފިޝަރީސް މިނިސްޓްރީން ވަނީ ބުނެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
