މި ސަރުކާރުން މަހުލޫފަށް ޖެއްސި ހާލަށް ހަމްދަރުދީވަން: ތާރިގު
އެމްޑީޕީ އިސްވެ އޮވެ ހިންގާ ކޯލިޝަން ސަރުކާރުން ޔޫތު މިނިސްޓަރު އަހުމަދު މަހުލޫފަށް ޖެއްސި ޙާލަށް ހަމްދަރުދީވާ ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެ އެވެ.
ތާރިގު މިފަދައިން ވިދާޅުވެފައިވަނީ ޗާގޯސް މައްސަލައާއި ގުޅިގެން އެޓާނީ ޖެނެރަލް އިބްރާހިމް ރިއްފަތުގެ އިތުބާރު ނެތްކަމުގެ މައްސަލަ މަޖިލީހަށް ވެއްދުމާއި ގުޅިގެން މަހުލޫފު ފާޑުވިދާޅުވެ ދައްކަވަމުންދާ ވާހަކަތަކަށް ރައްދުދެއްވާ ކުރެއްވި ޓްވީޓެއްގަ އެވެ.
މަހުލޫފު ވިދާޅުވީ ޗާގޯސް މައްސަލައިގައި ދިވެހިންނަށް ލިބުނީ މޮޅެއް ކަމަށެވެ. އަދި އެ މައްސަލައިގައި ރާއްޖޭގެ ބަންޑާރަ ނައިބު ކުރެއްވި މަސައްކަތްޕުޅު ކާމިޔާބު ކަމަށާއި، އެއީ އެމަނިކުފާނުގެ ކަރުގައި މާފަތި އަޅުވަން ޖެހޭ ކަމެއް ކަމަށެވެ.
"ހަގީގަތް އޮޅުވާ ނުލައްވާށެވެ. ޗާގޯސް މައްސަލައިގައި ރާއްޖެއަށް ލިބުނީ ބޮޑު ކާމިޔާބީއެއް. ލިބުނީ ބޮޑު ބައެއް. މޮރިޝަސްގެ މައްޗަށް ގަދަވީ މި ކުޑަކުޑަ ދިވެހިރާއްޖެ. ހަގީގަތުގައި އެޓާނީ ޖެނެރަލް ރިއްފަތުގެ ކަރުގައި އަޅުވަންވީ މާފައްޗެއް"
ޔޫތު މިނިސްޓަރު އަހުމަދު މަހުލީފު
މަހުލޫފުގެ އެ ވާހަކަތަކާއި ގުޅިގެން ތާރިގު ވިދާޅުވީ ރައްޔިތުންގެ މަޖިލީހުގެ ކަންކަން ނިންމާނީ މަޖިލީހުން ކަމަށެވެ. އޭޖީ ރިއްފަތުގެ އިތުބާރު ނެތްކަމުގެ މައްސަލައާއި މިނިސްޓަރު މަހުލޫފު ނޫޅުއްވުމަށް ތާރިގު އެދިވަޑައިގެންނެވި އެވެ.
އެއާއެކު އޭނާ ވިދާޅުވީ ހަގީގަތުގައި މިނިސްޓަރު މަހުލޫފަށް މި ސަރުކާރުން ފާއިތުވި 4 ވަރަކަށް އަހަރު ޖެއްސި ޙާލަށް ރައްޔިތުންގެ މަޖިލީހުގެ މެމްބަރެއްގެ ހައިސިއްޔަތުން އޭނާ ހަމްދަރުދީވާ ކަމަށެވެ.
"މިނިސްޓަރު މަހްލޫފުއެވެ! ރައްޔިތުންގެ މަޖިލީހުގެ ކަންކަން ނިންމާނީ މަޖިލީހުންނެވެ. ރިފްއަތުގެ އިތުބާރުނެތް މައްސަލައާ އެހާ ބޮޑަށް ނޫޅުއްވާށެވެ. މަނިކުފާނަށް ފާއިތުވެދިޔަ 4 އަހަރު ސަރުކާރުން ޖައްސާފައިވާ ހާލާމެދުގައި އެކުގައި އުޅުނު މެންބަރެއްގެ ހައިސިއްޔަތުން ހަމްދަރުވީވަމެވެ"
މަހިބަދޫ ދާއިރާގެ މެމްބަރު ތާރިގު
މަހުލޫފުގެ ހާލާއި މެދު ހަމްދަރުދީވާކަމަށް ތާރިގު ވިދާޅުވީ ބެލެވޭގޮތުގައި އެމްއެމްޕީއާރުސީގެ މައްސަލައާއި ގުޅިގެން ސަރުކާރުން މަހުލޫފާއި މެދު އަމަލުކޮށްފައިވާ ގޮތާއި ގުޅިގެންނެވެ.
އެމްއެމްޕީއާރުސީގެ މައްސަލައާއި ގުޅިގެން މަހުލޫފުގެ މައްސަލަ ތަހުގީގުކުރަން ފެށުމާއެކު ސަރުކާރުން ވަނީ އޭނާ ސަސްޕެންޑުކޮށްފަ އެވެ. އެގޮތުން ދެ މަހަށްވުރެ ގިނަ ދުވަސް މަހުލޫފު މަސައްކަތުން އެކަހެރި ކުރުމަށްފަހު ބެހެއްޓިއެވެ.
އެފަހުން އޭނާގެ މައްޗަށް ދައުވާ އުފުލާ ކޯޓާއި ހިސާބަށް މައްސަލަ ގެންދިޔައެވެ. އެކަމާއި ގުޅިގެން މަހުލޫފަށް ބޮޑެތި ފާޑުކިޔުންތަކާއި ތުހުމަތުތައް އަމާޒުވެގެން ދިޔައެވެ.
ނަމަވެސް، ފަހުން އެ މައްސަލަ އަނބުރާ ޕީޖީ އޮފީހުން ވަނީ ގެނެސްފައެވެ. އަދި އެފަދައިން އެ އޮފީހުން ކަން ކޮށްފައިވަނީ ރައީސް ޞާލިހުގެ ކެންޕެއިންގެ ކަންކަމުގައި އިސްކޮށް މަހްލޫފް ހަރަކާތްތެރިވާން ފެށިފަހުންކަން ފާހަގަކޮށްލެވެއެވެ.
އެހެންކަމުން ސިޔާސީ މަޝްރަހު ދިރާސާކުރައްވާ ގިނަ ފަރާތްތަކުން ވިދާޅުވަމުން ދަނީ ރައީސް ޞާލިހުގެ އަރިހުގައި މަހުލޫފު ހުންނަވަނީ މަޖުބޫރުވެގެން ކަމަށެވެ. ރައީސް ޞާލިހު ހިތްޕުޅު ޖަމަހެިވަޑައިނުގަންނަވާ ގޮތަކަށް މަހުލޫފު އެއްޗެއް ވިދާޅުވާ ހިސާބުން އަނެއްކާވެސް އެމްއެމްޕީއާރުސީގެ މައްސަލަ ފެންމަތިކޮށް އޭނާގެ މައްޗަށް ދައުވާ އުފުލާނެކަމަށް ގިނަ ބަޔަކު އިއްތިފާގުވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
