އެންސްޕާ ބަޖެޓުގެ 55 އިންސައްތަ ހުސްވެއްޖެ
މި އަހަރަށް ކަނޑައަޅާފައިވާ ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ގެ ބަޖެޓުގެ 55 އިންސައްތަ ހުސްވެފައިވާކަން ފިނޭންސް މިނިސްޓްރީެ ތަފާސް ހިސާބުތަކުން ހާމަވެއްޖެ އެވެ.
ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މިއަހަރު ފެށިގެން މި މަހުގެ ހަތަރުވަނަ ދުވަހުގެ ނިޔަލަށް އެންސްޕާއަށް ވަނީ 1061 މިލިއަން ރުފިޔާ ހަރަދުކޮށްފަ އެވެ.
މި އަހަރުގެ ބަޖެޓުގައި އެންސްޕާއަށް ކަނޑައަޅާފައިވަނީ 1920.3 މިލިއަން ރުފިޔާ އެވެ. އެހެންކަމުން އެ ހިސާބުތަކަށް ބަލާއިރު އެ ބަޖެޓުގެ 55 އިންސައްތަ ޚަރަދުކުރެވިފައިވާކަން ފާހަގަކޮށްލެވެއެވެ.
އެންސްޕާއިން އާންމުގޮތެއްގައި ކަވަރު ކުރަނީ އާސަންދައިން ކަވަރު ނުކުރެވޭ ކަންކަމަށެވެ. އެގޮތުން ރާއްޖެއިން ބޭރަށް ބޭސްފަރުވާކުރަން ދާ ފަރާތްތަކުގެ ޓިކެޓާއި ފައިސާ ދިނުމާއި ރާއްޖޭގައިވެސް ހާލު ބޮޑު ފަރާތްތަކަށް އާސަންދައިގެ ބޭރުން ކުރަންޖެހޭ ހަރަދުތައް އެންސްޕާއިން ކުރެއެވެ.
އެންސްޕާ ބަޖެޓުގެ ދެބައިކުޅަ އެއްބަޔަށްވުރެ ބޮޑުބައި ހުސްވެފައިވާއިރު، ޤައުމީ ހެލްތު އިންޝިއުރެންސް ސްކީމް (އާސަންދަ) ބަޖެޓުގެ 80 އިންސައްތަ ޚަރަދުކުރެވިފައިވާކަން ތަފާސް ހިސާބުތަކުން ވަނީ ހާމަވެފަ އެވެ.
މި މަހުގެ ހަތަރުވަނަ ދުވަހުގެ ނިޔަލަށް އާސަންދައަށް 862 މިލިއަން ރުފިޔާ ހަރަދުކޮށްފައިވާއިރު މިއަހަރުގެ އާސަންދައިގެ ޖުމްލަ ބަޖެޓަކީ 1045 މިލިއަން ރުފިޔާ އެވެ.
އެންސްޕާ އަދި އާސަންދައިގެ ބަޖެޓުގެ ބޮޑުބައެއް ހުސްވެފައިވާއިރު، ނިމިދިޔަ ގުރައިދޫ ދާއިރާގެ ބައި-އިލެކްޝަނާއި ދިމާކޮށް ސަރުކާރުން އާސަދަން އަދި އެންސްޕާއިން ގިނަ ޚަރަދުތަކެއް ކޮށްފައިވާކަމުގެ ތުހުމަތު އިދިކޮޅު ފަރާތްތަކުން ވަނީ ކޮށްފަ އެވެ. އަދި އިންތިޚާބުތަކަށް ނުފޫޒު ފޯރުވުމަށް ހެލްތު ސްކީމުގެ ބޭނުން ނަހަމަ ގޮތުގައި ހިފަމުންދާކަމަށް އެ ފަރާތްތައް ގެންދަނީ ތުހުމަތު ކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
