ޣައްޒާގެ އަލް ޝިފާ ހޮސްޕިޓަލުން އަނެއްކާވެސް ކަށްވަޅެއް!

ޣައްޒާގެ އަލް ޝިފާ ހޮސްޕިޓަލުން ތިން ވަނަ ކަށްވަޅެއް ފެނިއްޖެއެވެ.

ޣައްޒާގައި ހުންނަ ސަރުކާރުގެ މީޑިއާ އޮފީހުން ބުނީ މި ކަށްވަޅުން މިހާތަނަށް 49 ހަށިގަނޑު ފެނިފައިވާ ކަމަށާއި، އެތަނުން ބައެއް ހަށިގަނޑުތައް ފެނުނުއިރު ބޯ ވެސް ނެތް ކަމަށެވެ.

އެ އޮފީހުން އިތުރަށް ބުނީ އެ ކަށްވަޅުން އަދިވެސް އިތުރު ހަށިގަނޑުތައް ހޯދަމުން އަންނަ ކަމަށާއި އެ މަސައްކަތް އަދިވެސް ނުހުއްޓޭ އިރު، އަދިވެސް އިތުރު ހަށިގަނޑުތައް ފެންނާނެ ކަމަށް ލަފާ ކުރާ ކަމަށެވެ.

ޣައްޒާގައި ހަރަކާތްތެރިވަމުން އަންނަ ނޫސްވެރިން ނަގާފައިވާ ވީޑިއޯތަކުން ފެންނަ ގޮތުގައި ސިވިލް ޑިފެންސް ޓީމުތަކުން ދަނީ ޔަހޫދީންގެ ހަމަލާތަކުން ގެއްލުން ލިބިފައިވާ މެޑިކަލް ފެސިލިޓީން ފެނުނު ކަށްވަޅުން ހަށިގަނޑުތައް ނަގާ ބަލަން ޖެހޭ ބެލުންތައް ބަލަމުންނެވެ.

އަލަށް މި ފެނުނު ކަށްވަޅާއިއެކު ޣައްޒާގެ ތިން ހޮސްޕިޓަލަކުން މިވަނީ ޖުމްލަ 7 ކަށްވަޅު ފެނިފައެވެ. އެ ތަންތަނުން ގާތްގަނޑަކަށް ގާތްގަނޑަކަށް ފިރިހެނުންނާއި އަންހެނުންނާއި ކުޑަކުދިން ހިމެނޭހެން 520 ހަށިގަނޑު ވަނީ ފެނިފައެވެ.

މިދިޔަ އޭޕްރިލް މަހު ޔަހޫދީ ފައުޖުން އަލް ޝިފާ ހޮސްޕިޓަލުން ނުކުމެފައިވާއިރު، ހަމަ އެމަހު އެ ހޮސްޕިޓަލުން ވަނީ ފުރަތަމަ ކަށްވަޅު ފެނިފައެވެ. އެއާއިއެކު އެކަމުގެ ފުރިހަމަ ތަހުގީގެއް ހިންގުމަށް އދ އިން އެންގިއެވެ.

މި ތަހުގީގުގެ ރިޕޯޓާއި ގުޅިގެން އދ ގެ އިންސާނީ ހައްގުތަކަށް މަސައްކަތް ކުރާ ފަރާތްތަކުން ބުނީ މި ރިޕޯޓުން ހާމަވެގެން ދިޔައީ "ފިތްކަނޑައިގެންދާ ފަދަ" ވާހަކަތަކެއް ކަމަށާއި، އަނިޔާ ކުރުމާއި، ދިރިހުއްޓާ ވަޅުލުން ފަދަ ލާއިންސާނީ އަމަލުތައް ހާމަވެގެން ދިޔަ ކަމަށެވެ.

ޝިފާ ހޮސްޕިޓަލުން މި ކަށްވަޅު ފެނިފައިވަނީ ޔަހޫދީ ފައުޖުން ރަފާޙް އަށް އަރައިގަނެ ޣައްޒާ އާއި މިޞްރާއި ދެމެދު އޮންނަ ބޯޑަރުގެ ކޮންޓްރޯލް ނަގައި ރަފާހަށް ހަމަލާތައް އަމާޒުކޮށްފައިވަނިކޮށްކަން ފާހަގަކޮށްލަން ޖެހެއެވެ.