އެންސްޕާއިން އިތުރަށް 198 މިލިއަން، އާސަންދައިން 487 މިލިއަން ޚަރަދުކޮށްފި

ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އަދި އާސަންދައަށް މިއަހަރަށް ކަނޑައެޅި ބަޖެޓު ހުސްވެ އިތުރަށް ބޮޑެތި ޚަރަދުތަކެއް ކޮށްފި އެވެ.

މިއަހަރުގެ ބަޖެޓުގައި އެންސްޕާއަށް ކަނޑައަޅާފައި ވަނީ 1920.3 މިލިއަން ރުފިޔާއެވެ.

އެހެން ނަމަވެސް ފިނޭންސް މިނިސްޓްރީން އާންމުކޮށްފައިވާ ތަފާސް ހިސާބުތަކުން ދައްކާގޮތުގައި މިއަހަރުގެ ސެޕްޓެމްބަރުގެ 28 ގެ ނިޔަލަށް އެންސްޕާއިން ވަނީ 2118.3 މިލިއަން ޚަރަދުކޮށްފަ އެވެ. އެއީ ކަނޑައަޅާފައިވާ ބަޖެޓަށްވުރެ 198 މިލިއަންގެ އިތުރުވުމެކެވެ.

އޭގެ އިތުރުން މިއަހަރުގެ ނިޔަލަށް އެންސްޕާއަށް ކުރާ ޚަރަދު 2 ބިލިއަނަށް އަރާނެކަމަށް ފިނޭންސް މިނިސްޓްރީން ވަނީ އަންދާޒާކޮށްފަ އެވެ.

އެންސްޕާގެ އިތުރުން އާސަންދައަށް ކަނޑައެޅި ބަޖެޓު ހުސްވެ، އިތުރަށް 487 މިލިއަން ޚަރަދުކޮށްފައިވާކަމަށް ފިނޭންސް މިނިސްޓްރީގެ ތަފާސް ހިސާބުތަކުން ދައްކައެވެ.

މިއަހަރު އާސަންދައަށް ބަޖެޓުކޮށްފައި އޮތީ 1.045 ބިލިއަން ރުފިޔާއެވެ.

އެހެން ނަމަވެސް ފިނޭންސްގެ ހިސާބުތަކަށް ބަލާއިރު ސެޕްޓެމްބަރުގެ ނިޔަލަށް 1.531 ބިލިއަން ރުފިޔާ ވަނީ ޚަރަދުކޮށްފަ އެވެ. އެހެންކަމުން މިއަހަރަށް ކަނޑައެޅި ބަޖެޓަށްވުރެ 487.6 މިލިއަން ރުފިޔާ ވަނީ އިތުރަށް ޚަރަދުކޮށްފަ އެވެ.

މި އަހަރަށް ބަޖެޓު އެކުލަވާލަމުން ސަރުކާރުން ބުނެފައިވަނީ އާސަންދައަށް ކުރާ ޚަރަދުތައް ކުޑަކޮށް ބަޖެޓު ޑެފިސިޓް ކުޑަކުރުމަށް ޚާއްސަ ސަމާލުކަމެއް ދޭނެ ކަމަށެވެ.

އެހެން ނަމަވެސް އާސަންދައާއި އެންސްޕާއިން ބަޖެޓުކުރި ވަރަށް ވުރެ އިތުރަށް ބޮޑެތި ޚަރަދުތަކެއް ކޮށްފައިވާއިރު، އިންތިޚާބުތަކާއި ދިމާކޮށް އާސަންދައިން ކުރާ ޚަރަދުތައް އިތުރުވަމުން އަންނަކަން ފާހަގަކޮށް ރައްޔިތުންގެ މަޖިލީހުންވެސް ވަނީ މީގެ ކުރިން ކަންބޮޑުވުން ފާޅުކޮށްފަ އެވެ.