ޣައްޒާގެ ރައްޔިތުން ޣައްޒާއިން ފައިބަން އެންގި އެންގުން ދިވެހި ދައުލަތުން ކުށްވެރިކޮށްފި

ފަލަސްޠީނުގެ ޣައްޒާގެ ރައްޔިތުން ޣައްޒާއިން ފައިބަން އެންގި އެންގުން ދިވެހި ދައުލަތުން ކުށްވެރިކޮށްފިއެވެ.

ދިވެހި ދާޚިލީ ވުޒާރާއިން ނެރެފައިވާ ބަޔާނެއްގައި ބުނެފައިވަނީ އިޒްރާއިލުގެ ޔަހޫދީން ވަނީ ޣައްޒާގެ ރައްޔިތުން ޣައްޒާދޫކޮށް ފޭބުމަސް އެންގި އެންގުން ކުށްވެރި ކުރާކަމަށެވެ.

ދާޚިލީ ވުޒާރާގެ ބަޔާނުގައި ބުނެފައިވަނީ އެނބުރި އާދެވޭނެ ކަމުގެ ގެރެންޓީއަކާ ނުލައި އެފަދަ ކަމެއް ކުރުވުމަކީ ހަނގުރާމައިގެ ޖަރީމާއެއް ކަމަށާއި އެއީ މަޖުބޫރު ކުރުވުން ކަމަށާއި އެ އަމުރު ބަދަލުކުރަން ޖެހޭ ކަމަށެވެ.

ދާޚިލީ ވުޒާރާގެ ބަޔާނުގައި ބުނެފައިވަނީ ފަލަސްތީނުގެ ރައްޔިތުންނާ ދެކޮޅަށް ހިންގާ މި ޢުދުވާނަކީ ބައިނަލް އަޤްވާމީ އަދި އިންސާނީ ހައްޤުތަކާބެހޭ ޤާނޫނުތަކާ ޚިލާފަށް ހިންގާ ޖަރީމާއެއް ކަމަށެވެ.

"ފަލަސްޠީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ހަމަލާތައް ވަގުތުން ހުއްޓުވުމަށް މަޖުބޫރުކުރުވައި ޣައްޒާއަށް މިހާރުން މިހާރަށް ބޭނުންވާ ބޭހާއި ކާބޯތަކެއްޗާއި ޒަރޫރީ ބޭނުންތަކަށް ބޭނުންވާނެ ތަކެތި ފޯރުކޮށްދިނުމަށް އިންސާނިއްޔަތުކަމުގެ ކޮރިޑޯއެއް ހުޅުވުން ކަށަވަރުކުރުމަށް ބާރުއެޅުމަށް ބައިނަލްއަޤްވާމީ މުޖުތަމައަށް ދިވެހި ސަރުކާރުން ގޮވާލަން" ބަޔާނުގައި ވެއެވެ.

ފަލަސްތީނުގެ ރައްޔިތުން ވަކި ދައުލަތެއް އުފެއްދުމަށާއި، އެ ޤައުމުގެ ރައްޔިތުންގެ ހައްޤުތައް ކަށަވަރު ކުރުމަށް ކުރަމުން އަންނަ މަސައްކަތްތަކުގައި އެއްވެސް ޝަރުތަކާ ނުލައި ދުވެހި ސަރުކާރު ތާއީދުކުރުންމަތީ ދެމިތިބޭނެ ކަމަށް ބަޔާނުގައި ބުނެފައި ވެއެވެ.

އެ މައްސަލައަށް ދެމެހެއްޓެނިވި ހައްލެއް ހޯދޭނީ އިރުމަތީ ގުދުސް ފަލަސްތީނުގެ ވެރިކަމެއްގެ ގޮތުގައި ހިމެނޭހެން، 1967ގެ ކުރީގެ ބޯޑަރުތަކުގެ މައްޗަށް އެކުލެވިފައިވާ ގޮތުގެ މައްޗަށް މިނިވަން އަދި މުސްތަގިއްލު ފަލަސްތީނުގެ ދައުލަތެއް ގާއިމު ކުރެވިގެން ކަމަށް ވެސް އެބަޔާނުގައި ބުނެފައިވެއެވެ.

ޣައްޒާއަށް އިޒްރާއިލްގެ ޔަހޫދީން ދެމުން އަންނަ ހަމަލާތަކުގެ ސަބަބުން ޣައްޒާގެ އެތައް ބަޔަކު ވަނީ ޝަހީދުވެފައެވެ. އަދި އެތައް ބަޔަކު ވަނީ ޒަޚަމްވެފައެވެ. ޣައްޒާގެ އެތައް ގެއެއް ހަލާޚުވެފައި ވާއިރު ބައެއް ހޮސްޕިޓަލް އަދި މެޑިކަލް ކްލިނިކް ތަކަށްވެސް ވަނީ ގެއްލުން ލިބިފައެވެ.