ޣައްޒާގެ ހޮސްޕިޓަލްތައް، އެޑްމިޓް ކުރެވިފައިވާ ކުޑަކުދިންނަށް ފުރިހަމަ ފަރުވާ ދިނުމަށް ނުކުޅެދިފައި

ޣައްޒާގެ ހޮސްޕިޓަލް ތަކުގައި އެޑްމިޓް ކުރެވިފައިތިބި ކުޑަކުދިންނަށް ފުރިހަމަ ފަރުވާ ދިނުމަށް އެހޮސްޕިޓަލް ތައް ނުކުޅެދިފައިވާ ކަަމަށް ޣައްޒާގެ ހެލްތް އޮފިސަރުން ބުނެފިއެވެ.

އަލްޖަޒީރާ އާއި ވާހަކަ ދެއްކި އަލް އަޤްޞާ ހޮސްޕިޓަލްގެ ކުޑަކުދިންގެ އައިސީޔޫގެ ނަރުހެއް ކަމަށްވާ ވަރްދާ އަލް އަވަވްދާ ބުނެފައިވަނީ އައިސީޔޫގެ ޚިދްމަތަށް ބޭނުންވާ އަލަށްއުފަންވާ ކުދިންގެ ޢަދަދު އަންނަނީ އިތުރުވަމުން ކަމަށެވެ.

“ޢާންމުކޮށް ދުވާލެއްގެ މައްޗަށް އަންނަ ކޭސްތަކަށް ވުރެ ގިނައިން މިހާރު ކޭސްތައް އެބަ ލިބޭ، ލިބެމުންދަނީ ހަމައެކަނި ދުވަސްނުފުރޭ ކުދިންގެ ކޭސްތަކެއް ވެސް ނޫން” ވަރްދާ ބުނެފައިވެއެވެ.

“ބޮން އަޅައިގެން ޒަޚަމްތައް ލިބިފައިވާ ކުދިންވެސް އެބަ ގެނޭ، ބައްޕަ ޝަހީދުވެފައިވާ ކުދިންވެސް އެބަގެނޭ، އެނދުތައް ހުރީ ފުރިފައި، ދެތިން ގަޑިއިރުތެރޭގައި ރޭ ވެސް 8 ކުދިން ގެނައި، އެކުދިން މި އެޑްމިޓް ކުރެވުނީ 6 އިންކިޔުބޭޓާއެއްގައި” ވަރްދާ އިތުރަށް ބުނެފައިވެއެވެ.

ވަރްދާ ވަނީ ބޭސްކުރުމަށް ބޭނުންކުރާ ވަސީލަތް މަދުވުމުގެ ސަބަބުން ދަތިތަކެއް ދިމާވަމުންދާ ކަމަށެވެ. އެގޮތުން ނޭވާލާނިޒާމުގެ ބަލިތަކަށް ފަރުވާ ދޭން ޖެހިފައިވާ ކުދަކުދިންނާއި ހިތުގެ ބައްޔަށް ފަރުވާ ދޭން ޖެހިފައިވާ ކުދިންނަށް ދޭނެ ބޭސް ނެތިފައިވާ ކަމަށްވެސް ވަރްދާ ވަނީ ބުނެފައެވެ.

މީގެ އިތުރުން އަތް ދޮންނަ ސައިބޯންޏާއި ސެނެޓައިޒަރވެސް ވަނީ ހުސްވެފައިވާ ކަމަށް އޭނާ ވަނީ ބުނެފައެވެ.

“ނިކޫގައި ތިބި ކުދިންނަށް ދޭން ޖެހޭ ފޯމިޔުލާ ކިރު ހެދުމަށް ބޭނުންކުރާނެ ސާފު ފެންވެސް އަހަރެމެން އަތުގައި މިހާރު ނެތް” ވަރްދާ ބުނެފައިވެއެވެ.

ޣައްޒާގެ ސިއްޚީ ފަރުވާ ފޯރުކޮށްދޭ ތަންތަން މިވަގުތު ހުރީ ފަރުވާއަށް ބޭނުންވާ މީހުންނަށް ފަރުވާ ފޯރުކޮށްދެވޭ ވަރަށް ވުރެ ދަތި ހާލަތްތަކަކަށް ވެއްޓިފައި ކަމަށް ޣައްޒާގެ ޑޮކްޓަރުން ދަނީ ބުނެމުންނެވެ.

ގިނަ ހޮސްޕިޓަލްތަކުގައި ބޮޑެތި އޮޕަރޭޝަންތައް ހޭނެއްތުމަކާއި ނުލައި ނުވަތަ އައްސިކުރުމަކާއި ނުލައެވެ.